ރަޝިޔާ ޔޫކްރެއިންގެ ހަނގުރާމައިގެ ސަބަބުން އެމެރިކާގެ ހައްސާސް މަރުކަޒުތަކަށް ސައިބާ ހަމަލަތައް ރަޝިޔާއިން ދީފާނެކަމަށް ލަފާކޮށްފިއެވެ. އެމެރިކާ ސަރުކާރުން ވަނީ މިދަނޑިވަޅުގައި ދިމާވާ ގޮންޖެހުންތަކަށ ޖަވާބުދާރީވާނެ އެންމެ އިސް އިދާރާއަކީ ޑިޕާޓްމަންޓް އޮފް ހޯމްލޭންޑް ސެކިއުރިޓީ ކަމުގައި ހަމަޖައްސާފައެވެ.
ޑިޕާޓްމަންޓް އޮފް ހޯމްލޭންޑް ސެކިއުރިޓީއަކީ، ރަޝިޔާއާއި ޔޫކްރެއިންގެ މައްސަލާގައި ގައުމުގެ އެތެރެއަށް ދިމާވާ ހަމަލަތައް މެނޭޖްކުރާ އެންމެ އިސް ފެޑެރަލް އޭޖެންސީގެ ގޮތުގައި ކަނޑައަޅާފައި މިވަނީ، އެމެރިކާއަށް އަމާޒުކޮށް ދެވިދާނެ ސައިބާ ހަމަލާތަކާއި، ރަޝިޔާގެ ދޮގު މައުލޫމާތު ފެތުރުމުގެ ކެމްޕޭންތައް ކުރިއަށް ގެންދާނެ ކަމުގެ އިންޒާރުތައް ލިބިފަައި ވަނިކޮށެވެ.
މި މަސައްކަތުގެ ދަށުން ހޯމްލޭންޑް ސެކިއުރިޓީން ވަނީ ރަޝިއާގެ ހަރަކާތްތައް މޮނިޓާކޮށް ފެޑެރަލް އޭޖެންސީތަކުގެ މެދުގައި ވިލަރެސް ކުރުމަށް ގްރޫޕެއް އެކުލާލައިފައެވެ.
ސައިބަރ ސެކިއުރިޓީ އެންޑް އިންފްރާސްޓްރަކްޗަރ ސެކިއުރިޓީ އޭޖެންސީގެ އެގްޒެކެޓިވް ޑިރެކްޓަރ ބްރެންޑަން ވޭލްސް އިސްކޮށް ހުންނަވައިގެން އުފައްދާފައިވާ މި އާ ގްރޫޕުން އެމެރިކާގެ މަރުކަޒީ ސަރުކާރުގެ އެކި ދިމަދިމާގައި މަސައްކަތްކުރާނީ އެމެރިކާއަށް ކުރިމަތިވެދާނެ ނުރައްކާތަކަށް ތައްޔާރުވެ، އެކަމަށް އިޖާބަދިނުމަށެވެ.
