އިންޑިއާއާއި ޗައިނާއިން ވަނީ ޔޫކްރެއިންއާ ދެކޮޅަށް ރަޝިޔާއިން ދިން ހަމަލާއަށް "ހިތާމަކުރާ" ކަމަށް ބުނެ އދ. ގެ ސަލާމަތީ މަޖިލީހުން ފާސްކުރި ގަރާރަށް ވޯޓު ނުދިނުމަށް ނިންމާފައެވެ. އެ ގަރާރުގައި ވަނީ ޔުކްރެއިން އިން ރަޝިއާގެ ސިފައިން ވަގުތުން، ޝަރުތެއް ނެތި ފޭބުމަށް ގޮވާލައި، ކިޔޭވްއާ ދެކޮޅަށް މޮސްކޯއިން ހިންގި އުދުވާން ކުށްވެރިކޮށްފަ އެވެ. މި ގަރާރަށް 11 ގައުމަކުން ތާއީދުކޮށް ވޯޓު ދީފައިވާއިރު، ޗައިނާއާއި ޔޫއޭއީއާއެކު އިންޑިއާއިން ވެސް ވަކި ކޮޅަކަށް ވޯޓު ނުދީ ހިފެހެއްޓިއެވެ.
އދ. ގެ ސަލާމަތީ މަޖިލީހުގައި އިންޑިއާގެ ދާއިމީ މަންދޫބު ޓީ.އެސް ތިރުމުރްތީ ވިދާޅުވީ، އިންޑިއާއިން ގަބޫލުކުރާ ގޮތުގައި، މަޝްވަރާއަކީ، ދެބަސްވުންތައް ހައްލުކުރުމަށް ހައްލު ހޯދުމަށް އޮތް ހަމައެކަނި މަގުކަމަށެވެ. މިދިޔަ ފެބްރުއަރީ މަހުގެ 24 ވަނަ ދުވަހު ރަޝިޔާއިން ދޭން ފެށި ހަމަލާތަކާ މެދު ފުންކޮށް ކަންބޮޑުވާކަމަށް ވިދާޅުވަމުން އޭނާ ހާމަކުރެއްވީ ޑިޕްލޮމެސީގެ މަގުން ކަސިޔާރުވުމުން އިންޑިއާއިން ހިތާމަކުރާ ކަމަށެވެ.
އިންޑިއާއިން ބުނެފައި ވަނީ ޑިޕްލޮމަސީގެ މަގު އިޚުތިޔާރުކޮށްފައި ނުވާތީ ހިތާމަ ކުރާކަމަށާއި ޑިޕްލޮމެސީއަށް ރުޖޫޢަވާންޖެހޭނެ ކަމަށެވެ. އަދި މި ހުރިހާ ސަބަބުތަކާ ހުރެ އިންޑިއާ އިން އިޚުތިޔާރުކުރީ މި ގަރާރާ ދުރުވާންކަމަށް ތިރުމުރުތީ ވިދާޅުވި އެވެ.
ޗައިނާއިންވެސް މިގަރާރަށް ވޯޓް ނުލާން ނިންމިއެވެ. ޗައިނާއިން އދ. އަށް ކަނޑައަޅާފައި ހުންނަ ދާއިމީ މަންދޫބު ޒަންގް ޖުން ވިދާޅުވީ އެއް ގައުމެއްގެ ސަލާމަތާއި ރައްކާތެރިކަން އަނެއް ގައުމުގެ ސަލާމަތާއި ރައްކާތެރިކަން ނަގާލައިގެން ދެމެހެއްޓޭނެ ގޮތެއް ނޯންނާނެ ކަމަށެވެ. މި ހަނގުރާމައިގައި ޔޫކްރެއިންގެ ސިޔާދަތާއި އިސްތިޤްލާލަށް އިޙްތިރާމް ކުރުމަށް ގޮވާލައްވަމުން، އެމްބެސެޑަރ ޖުން އިތުރަށް ވިދާޅުވީ، އ.ދ.ގެ ޗާޓަރުގެ ހުރިހާ މަޤްޞަދުތަކާއި އުޞޫލުތައް ހިފަހައްޓަންޖެހޭ ކަމަށެވެ. އޭނާ ވިދާޅުވީ ޔޫކްރެއިން އަކީ އިރުމައްޗާއި ހުޅަނގާ ދެމެދު އޮތް ބްރިޖަކަށް ހަދަން ޖެހޭ ކަމަށެވެ.
