ރަޝިޔާއާ ދެކޮޅަށް ހުޅަނގުން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ނިއުދިއްލީއަށް ކުރިމަތިވި ހީނަރުކަމަށް ލުޔެއް ހޯދުމުގެ ގޮތުން، ރަޝިޔާއާއެކު ވިޔަފާރީގެ މުއާމަލާތް ކުރުމަށް ރުޕީސް ޕޭމަންޓް މެކޭނިޒަމެއް ގާއިމްކުރެވޭނެ ގޮތްތައް ބެލުމަށް އިންޑިއާއިން މަސައްކަތް ފަށައިފިއެވެ.
ރަޝިޔާއާ ދެކޮޅަށް އަޅާފައިވާ ދަތިކުރުމުގެ ސަބަބުން އިންޑިއާއިން އެގައުމުން އެތެރެކުރާ ގަސްކާނާއަށް ހުރަސްތަކެއް ކުރިމަތިވެ އިންޑިއާގެ ދަނޑުވެރިކަމުގެ ދާއިރާއަށް ނޭދެވޭ އަސަރުތައް ކުރާނެތީ އިންޑިއާއިން ކަން ބޮޑުވެއެވެ.
ރަޝިޔާއަށް ފައިސާ ދެއްކުން ފަސޭހަ ކުރުމުގެ ގޮތުން އިންޑިއާއިން ހުށަހަޅާ ގޮތަކީ ރަޝިޔާ ކުންފުނިތަކުން އިންޑިއާގެ ސަރުކާރު ހިއްސާވާ ބެންކުތަކުގައި އިންޑިއާ ރުޕީސްއިން އެކައުންޓް ހުޅުވުމަށެވެ. މިއީ އިންޑިއާއާއެކު ކުރާ ވިޔަފާރި މުއާމަލާތު ސެޓްލްކުރުމަށް ހުޅުވާ އެކައުންޓްތައް ކަމުގައި ވާނެއެވެ.
މި އެކައުންޓްތަކުގައި ހުންނަ ފައިސާއަކީ ދެ ގައުމުގެ ދެމެދުގައި ބަދަލުކުރެވޭ ވިޔަފާރީގެ މުއާމަލާތްތަކަށް ފައިސާ ދެއްކުމުގެ ގެރެންޓީއެއްގެ ގޮތުގައި ބޭނުން ކުރެވޭނެ އެއްޗެކެވެ. އަދި ދެ ފަރާތުން ފައިސާ ބަދަލު ކުރުމުގެ ބަދަލުގައި އެއް ބަޔަކު އަނެއް ބަޔަކަށް މުދާ ބަދަލުކޮށް ބާޓާ ސިސްޓަމަށް އަމަލު ކުރުމަކީވެސް އިންޑިއާއިން ވިސްނާ އަދި އިންޑިއާއިން ހުށަހަޅާ ގޮތެކެވެ.
މިއީ ގިނަ ފަހަރަށް ދަތިކުރުމުގެ ފިޔަވަޅުތަކުގެ ނުރައްކަލުން ސަލާމަތްވުމަށް ގައުމުތަކުން ބޭނުން ކުރާ މެކޭނިޒމެކެވެ. ނިއުކްލިއާ ހަތިޔާރު ޕްރޮގްރާމެއް ހިންގުމުގެ ސަބަބުން ހުޅަނގުން އީރާނާ ދެކޮޅަށް ދަތިކުރުމުގެ ފިޔަވަޅު އެޅުމަށް ފަހު އިންޑިއާއިން ވެސް އީރާނާ އެކު އެ މެކޭނިޒަމް ބޭނުން ކުރާ ކަމަށް އިންޑިއާގެ ފަރާތްތަކުން ބުނެއެވެ.
2012 ވަނަ އަހަރުން ފެށިގެން އިންޑިއާއިން މި މެކޭނިޒަމް އީރާނާއެކު ތަޢާރަފްކޮށް ގިނަ އަހަރުތަކެއް ވަންދެން ވަރަށް ރަނގަޅަށް މަސައްކަތް ކޮށްފައި ވެއެވެ.
އިންޑިއާ ސަރުކާރުގެ އޮފިޝަލަކު ވިދާޅުވީ، ރަޝިޔާއާ ގުޅޭ މަޝްވަރާތައް އަދިވެސް އޮތީ ވަރަށް އަވަސް މަރުހަލާއެއްގައި ކަމަށާއި، ދެފަރާތުގެ ދެމެދުގައި ރަސްމީ މަޝްވަރާތައް މިކަމާ ބެހޭ ގޮތުން އަދި ފެށިފައި ނުވާ ކަމަށެވެ.
ރަޝިޔާގެ ރައީސް ވްލަޑިމިއަރ ޕޫޓިންއާއި އޭނާގެ ބައިވެރިންނަށް ދަތިކުރުމުގެ ފިޔަވަޅު އެޅުމަށް އެމެރިކާއާއި އިނގިރޭސިވިލާތާ އީޔޫން ވަނީ ނިންމައި ފިޔަވަޅުތައް އަޅަން ފަށާފައެވެ.
ދަތިކުރުމުގެ ފިޔަވަޅުތަކުގެ ސަބަބުން ބޭރު ފައިސާއިން ވިޔަފާރިކުރުމުގައި ރަޝިޔާއަށް ހުރަސް އެޅޭނެއެވެ. މިކަން ވަކިވަކި ބޭންކުތަކާއި ސަރުކާރު ހިއްސާވާ ވިޔަފާރިތަކަށް އަމާޒުވާނެއެވެ.
2021 ވަނަ އަހަރު ރަޝިޔާއިން އިންޑިއާއަށް އެކްސްޕޯޓްކުރި މުދަލުގެ އަގު 6.9 ބިލިއަން ޑޮލަރަށް އަރައެވެ. މައިގަނޑު ގޮތެއްގައި ރަޝިޔާއިން އެކްސްޕޯޓް ކުރީ މިނަރަލް އޮއިލް، ތަރުކާރީ އަދި ނުކަނޑައި ހުރި އަލިމަހެވެ.
އިންޑިއާއިން 2021 ވަނަ އަހަރު ރަޝިޔާއަށް 3.33 ބިލިއަން ޑޮލަރުގެ މުދާ އެކްސްޕޯޓްކޮށްފައިވެއެވެ. އެގައި މައިގަނޑު ގޮތެއްގައި ފާމަސޫޓިކަލް ޕްރޮޑަކްޓްސް، ޓީ އަދި ކޮފީގެ ބާވަތްތައް ހިމެނެއެވެ.
އިންޑިއާގެ މުޅި ޕޮޓޭޝްގެ މާއްދާ އިމްޕޯޓްގެ ގާތްގަނޑަކަށް ތިންބައިކުޅަ އެއްބަޔާ ގާތްކުރާ އަދަދަކަށް ހިއްސާކުރާ ދެ ގައުމަކީ ރަޝިއާ އާއި ބެލަރޫސެވެ.
އިންޑިއާ ސަރުކާރުން ދަނީ ފާޓިލައިޒާ އުފައްދާ ފަރާތްތަކުގެ މަސްއޫލުވެރިންނާ އެކު ބައްދަލުވުން ބާއްވަމުންނެވެ. އަދި ރަޝިއާ އާއި ބެލަރޫސްއިން ސަޕްލައި ހޯދޭނެ ގޮތްތައް ދެނެގަތުމަށްވެސް މަޝްވަރާ ކުރަމުން ދެއެވެ.
