ރަޝިޔާގެ ރައީސާއި ޚާރިޖީ ވަޒީރާއި ބޮޑެތި ވިޔަފާރިވެރިންނާއި ޕާލަމެންޓްގެ މެމްބަރުންނާ ދެކޮޅަށް ޔޫރަޕާއި އެމެރިކާއިން ވަނީ ފިޔަވަޅު އަޅާފައެވެ. މިކަންކަމާ ހެދި ރަޝިޔާގެ ކުރީގެ ރައީސް ވިދާޅުވަނީ ރަޝިޔާއިން ބަދަލު ހިފުމަށް ފިޔަވަޅު އަޅަން ވެއްޖެ ކަމަށެވެ.
ރަޝިޔާގެ ކުރީގެ ރައީސް އަދި މިހާރު ރަޝިޔާގެ ސަލާމަތީ މަޖިލީހުގެ ނާއިބް ރައީސް ޑިމިޓްރީ މެޑްވެޑޭވް މީސްމީޑިއާގައި ކުރެއްވި ޕޯސްޓެއްގައި ވިދާޅުވީ، ރަޝިޔާއިން އެންމެ ފަހުން އެމެރިކާއާއެކު ވެފައިވާ ނިއުކްލިއަރ ހަތިޔާރުގެ އެއްބަސްވުމުން ވަކި ވުމަށާއި އެމެރިކާއާއި އީޔޫގެ ގައުމުތަކާއެކު އޮތް ސިޔާސީ ގުޅުން ކަނޑާލައި، ހުޅަނގުގެ ގައުމުތަކުގެ އެސެޓްތައް ރަޝިޔާއިން ފްރީޒްކުރުމަށް މޮސްކޯއިން ވިސްނަމުންދާ ކަމަށެވެ.
މެޑްވެޑޭވް އިތުރަށް ވިދާޅުވީ، ޔޫރަޕްގެ ހައްގުތަކަށް މަސައްކަތްކުރާ ޖަމާއަތަކުން ރަޝިޔާ ވަކިކޮށްލުމުން މޮސްކޯއިން ދަނީ މަރުގެ ހުކުމް އަލުން ތަންފީޒު ކުރުމަށް ވިސްނަމުންނެވެ.
މެޑްވެޑޭވް ވިދާޅުވީ ރަޝިޔާ އެކަހެރިކޮށް ޖަމާއަތްތަކުން ބޭރުކޮށް، އަދަބުދީ، ބިރު ދައްކަމުން ދިޔަނަމަވެސް ރަޝިޔާ ސިއްސައި ނުލެވޭނެ ކަމަށެވެ.
އަދި އޭނާ ވިދާޅުވީ، އެމެރިކާ ސިފައިން އަފްޣާނިސްތާނުން ފައިބައިގެން ދިޔައީ ނިގޫ ވަތަށް ޖަހައިގެންނެވެ. އަދި މިލަދު ބެއްދުމަށްޓަކައި މިހާރު ރަޝިޔާއާ ދެކޮޅަށް ދަތިކުރުމުގެ ފިޔަވަޅު އަޅަނީ ކަމަށެވެ. އަދި ހުޅަނގުގެ ދަތިކުރުމުގެ ފިޔަވަޅުތަކަކީ "ސިޔާސީ ނާގާބިލްކަން" ދައްކައިދޭ ކަމުގެ ހެއްކެއްކަމުގައި އޭނާ ސިފަކުރެއްވި އެވެ.
