އެމރިކާގެ ސުޕްރީމް ކޯޓަށް އައްޔަން ކުރެވޭ އެފްރިކާ ނަސްލުގެ ފުރަތަމަ އަންހެން ފަނޑިޔާރަކަށް ފެޑެރަލް އެޕީލްސް ކޯޓުގެ ފަނޑިޔާރު ކެތާންޖީ ބްރައުން ޖެކްސަންގެ ނަން އެމެރިކާގެ ރައީސް ހުށަހަޅުއްވައިފިއެވެ. ފަނޑިޔާރު ޖެކްސަންގެ ނަން އެމަގާމަށް ހުށަހަޅާފައި ވަނީ ސުޕްރީމް ކޯޓުގެ ފަނޑިޔާރު ސްޓެފަން ބްރޭޔަރ ރިޓަޔަރ ކުރެއްވުމުންނެވެ.
އުމުރުން 51 އަހަރުގެ ޖެކްސަންއަށް އެމެރިކާގެ ގާނޫނު ހަދާ މަޖިލީހުގައި އަދި އަޣުލަބިއްޔަތު ލިބިވަޑައި ގަންނަވާނެކަން ކަށަވަރެއް ނޫނެވެ.
ފަނޑިޔާރު ޖެކްސަން ޅަފަތުގައި އުޅުއްވީ ފްލޮރިޑާގެ މިއާމީގައެވެ. އޭނާގެ މަންމައަކީ ސްކޫލެއްގައި ޕްރިންސިޕަލްކަން ކުރެއްވި ބޭފުޅެކެވެ. އަދި ބައްޕައަކީ ސްކޫލް ޓީޗަރެއްގެ އިތުރުން، ގާނޫނު ވަކީލުކަންވެސ ކުރެއްވި ބޭފުޅެކެވެ.
އެކަޑެމިކް ގޮތުން ފާހަގަ ކުރެވޭ ޖެކްސަން 1996 ވަނަ އަހަރު ހާވާޑް އިން ލޯ ޑިގްރީ ހާސިލްކުރައްވައިގެން ލޯ ރިވިއުގެ އެޑިޓަރުކަން ވެސް ކުރެއްވިއެވެ.
ޖަސްޓިސް ޖެކްސަން ވަނީ މެސަޗޫސެޓްސްގެ ޑިސްޓްރިކްޓް ކޯޓުގެ ފަނޑިޔާރުކަމާއި 1 ވަނަ ސަރކިޓް ކޯޓުގައި އެޕީލް ފަނޑިޔާރެއްގެ ގޮތުގައި މަސައްކަތް ކުރައްވާފައެވެ. މީގެ އިތުރުން ވޮޝިންޓަން ޑީސީގައި އެސިސްޓެންޓް ފެޑެރަލް ޕަބްލިކް ޑިފެންޑަރެއްގެ މަގާމުވެސް އޭނާ ފުރުއްވިއެވެ. ޕްރައިވެޓް ސެކްޓާގައި ޖެކްސަން ތިން އަހަރު ވަންދެން މަސައްކަތް ކުރެއްވިއެވެ.
