އިންޑިއާގެ ބައެއް ހިސާބުތަކުގައި ކޮވިޑާ ހެދި އަޅާފައިވާ ބައެއް ފިޔަވަޅުތައް މިއަދުން ފެށިގެން ލުއިކޮށްފިއެވެ. މިނިސްޓްރީ އޮފް ހެލްތުން އާންމުކުރި ތަފާސް ހިސާބުތައް ދައްކާ ގޮތުން، އިންޑިއާއިން އަލަށް ކޮވިޑް-19 އަށް ފައްސިވެފައި ވަނީ 8013 މީހުންނެވެ. އަދި ކޮވިޑް ޖެހިގެން 24 ގަޑި އިރު ތެރޭ މަރުވެފައި ވަނީ 119މީހުންނެވެ.
ބެންގަލޯރގައި ސްކޫލުތައް ހުޅުވުމަށް ސްޓޭޓް ސަރކާރުން ވަނީ ހުއްދަ ދީފައެވެ. އަދި ރެސްޓޯރެންޓްތައްވެސް އެއްކޮށް ހުޅުވުމަށާއި ސަރުކާރު އޮފީސްތަކަށް މުވައްޒަފުން ވަޒީފާއަށް އެއްކޮށް ނިކުތުންވެސް ވަނީ ހުއްދަ ކޮށްފައެވެ. އެކަމަކު ސިނެމާތަކާއި ސުއިމިންގ ޕޫލްތަކާއި ޖަލްސާ ހޯލުތަކުގައި އަދިވެސް މީހުންނަށް އެއްވެވޭނީ ދެބައިކުޅަ އެއްބަޔަށެވެ.
ނިއު ދިއްލީގައި މެޓްރޯ ގައި މީހުން ތޮއްޖެހިގެން ދަތުރުކުރުމަށް ހުއްދަ ދީފައި ވެއެވެ. އަދި ކިލާހަށް ހާޒިރުވެގެން ކިޔެވުމާއި ރެސްޓޯރެންޓްތަކަށް މީހުން ތޮއްޖެހުންވެސް ހުއްދަ ކޮށްފައި ވެއެވެ. އާންމު ތަންތާނގައި މާސްކު ނާޅާނަމަ ކުރިން ޖުރިމާނާ ކުރާ 2000 މިހާރު ވަނީ 500 އަށް ކުޑަ ކޮށްފައެވެ. ރޭގަނޑު ބޭރަށް ނިކުމެ އުޅުންވެސް ވަނީ ހުއްދަ ކޮށްފައެވެ.
