ފޮޓޯޝޮޕް ބޭނުން ކޮށް އުޅޭނަމަ، ހިޓްލަރުގެ ފޮޓޯއަކާއި ރަޝިޔާގެ ޕޫޓިންގެ ފޮޓޯއެއް މާސްކް ކޮށްފައި މޯފްކޮށްލާށެވެ. އެއިރުން ޓައިމް މެގަޒިންއިން މިހަފްތާގެ ބޭރުގަނޑުކަމަށް ބުނާ ފޮޓޯ އަމިއްލައަށްވެސް ތައްޔާރުކޮށް ލެވިދާނެއެވެ.
ޓައިމް މެގަޒިންގެ ކަވަރުކަމަށް ބުނެ، މީސްމީޑިއާގައި ދައުރުވަމުންދާ ޖަރުމަނުގެ ޑިކްޓޭޓަރު އެޑޮލްފް ހިޓްލަރާއި ރަޝިއާގެ ރައީސް ލަޑީމިއާ ޕޫޓިން ދައްކުވައިދޭ ފޮޓޯ ވަނީ ވައިރަލްވެފައެވެ.
ފެކްޓް ޗެކިންގެ ގިނަ ވެބްސައިޓްތަކަކުން ބުނަނީ މި ދެ ފޮޓޯ އަކީ އާޓްވޯކްގެ ގޮތުގައި ގްރެފިކް ޑިޒައިނަރަކު އުފައްދާފައިވާ ދެ ފޮޓޯއެއް ކަމަށެވެ.
މި ފޮޓޯތައް މަގްބޫލުވެ، ގިނަ ބަޔަކު ޝެއާ ކުރަމުން ދިއުމުގެ ސަބަބަކީ މިހާރު ދުނިޔޭގެ އެންމެ ބޮޑު އިބްލީސްކަމަށް ހުޅަނގުގެ މީޑިއާއިން ޕޫޓިން ސިފަކޮށްފައި ވުމުންނެވެ.
ވައިރަލް ޕޯސްޓްތަކުން ބުނާ ގޮތުން މި ފޮޓޯތަކަކީ ޓައިމް މަޖައްލާގެ ފެބްރުއަރީ 28-މާޗް 7 ގެ އަދަދުގެ ބޭރުގަނޑެވެ.
ޓައިމް މަޖައްލާގެ ރަސްމީ ކަވަރުގައި ޝާއިއުކުރާ ރަނގަޅު ފޮޓޯ އެ މަޖައްލާގެ ރަސްމީ ޓްވިޓާ ހޭންޑްލްއިން ވަނީ ޓުވީޓުކޮށްފަ އެވެ.
މި އާޓްވޯކް ހެދި ގްރެފިކް ޑިޒައިނަރ ޕެޓްރިކް މުލްޑަރ ބުނަނީ، އޭނާ ބޭނުންވީ ޔޫކްރެއިންގެ ހަނގުރާމައިގެ ނުބައިކަން މީޚުންގެ ސަމާލުކަމަށް ގެންނާށެވެ.
