ޔުކްރެއިންގައި ރަޝިޔާއިން ކުރާ ހަނގުރާމައަކީ ނުތަވަސްވާން ޖެހޭ ކަމެއްކަށް އިންޑިއާއިން ބުނެއެވެ. އެހެންނަމަވެސް އިންޑިއާއިން ރަޝިޔާ ކުށްވެރިކޮށްފައެއް ނުވެއެވެ. އިންޑިއާއިން ވަނީ ދެގައުމުންވެސް މަޝްވަރާއަށް ފުރުސަތު ދިނުމަށް ގޮވާލާފައެވެ.
ނިއުދިއްލީއިން ބުނަނީ، މަޝްވަރާއަކީ ދެބަސްވުންތައް ހައްލުކުރަން އޮތް މަގުކަމަށެވެ. އަދި ޑިޕްލޮމަސީގެ މަގު އިޚުތިޔާރު ނުކުރާތީވެ ހިތާމަކުރާ ކަމަށެވެ.
މިހާތަނަށް އިންޑިއާއިން ރަޝިޔާގެ މިހަނގުރާމަ ސީދާ ގޮތުން ކުށްވެރިކޮށްފައެއް ނުވެއެވެ.
އިންޑިއާއިން ރަޝިޔާ ކުށްވެރި ނުކުރާ ފަސް ސަބަބަބެއް ވެއެވެ.
ރަޝިޔާއަކީ އިންޑިއާގެ ޒަމާންވީ ރަހުމަތްތެރިޔާއެވެ. އަދި ހުޅަނގުގެ ގައުމުތަކާއި އެމެރިކާއަކީ އަލަކަށް އިންޑިއާއާ ބަދަހި ގުޅުމެއް ބާއްވަން ފަށާފައިވާ ގައުމުތަކެވެ.އެހެންވެ، އެމެރިކާއާއި ހުޅަނގުގެ ފިއްތުންތަކާ ހެދި އިންޑިއާއިން ދަނީ ހަމަހަމަކަމެއް ގެންގުޅުމަށް ވިސްނަމުންނެވެ.
ރަޝިޔާއަކީ އިންޑިއާއަށް ދިފާއީ ހަތިޔާރު އެންމެ ގިނައިން ސަޕްލައިކުރާ ގައުމެވެ.
އިންޑިއާގެ ސިފައިން ރަޝިއާގައި އުފައްދާ އެސްޔޫ 30 މަރުކާގެ ފައިޓާ ޖެޓްގެ 272 ބޯޓް އޮޕަރޭޓް ކުރެއެވެ. އިންޑިއާގެ ކަނޑުގެ ސިފައިން ރަޝިއާގައި އުފައްދާ ކިލޯ ކްލާސް ސަބްމެރިންގެ 8 އުޅަނދު ބޭނުން ކުރެއެވެ. އަދި ރަޝިޔާގެ ޓީ90ގެ 1300 ޓޭންކުވެސް އިންޑިއާއިން ގެންގުޅެއެވެ.
އިންޑިއާގެ މިސައިލް ދިފާއީ ނިޒާމަކީ ރަޝިޔާއިން އުފައްދާފައިވާ ދުނިޔޭގެ އެންމެ ޒަމާނީ ދިފާއީ ނިޒާމެވެ. އެސް 400ގެ މިނިޒާމު އިންޑިއާއަށް ރަޝިޔާއިން ވިއްކާފައި ވެއެވެ. މިމިސައިލް ސިސްޓަމް ގަތުމަށް އިންޑިއާއިން ރަޝިޔާއާއެކު 5 ބިލިއަން ޑޮލަރުގެ އެއްބަސްވުމެއްގައި ސޮއިކޮށްފައިވަނީ 2018 ވަނަ އަހަރުއެވެ.
މީގެ އިތުރުން ރަޝިޔާއިންވެސް ވަނީ ހުރިހާ މައްސަލަތަކެއްގައިވެސް އދގެ ސަލާމަތީ މަޖިލީހުގައި އިންޑިއާއާ އެއްކޮޅަށް ވަކާލާތު ކޮށްފައެވެ.
ރަޝިޔާއަކީ އިންޑިއާގެ ދިފާއީ ރޮނގުންނާއި އަދި ވިޔަފާރިއާއި ޓެކްނޮލޮޖީގެ ރޮނގުން މުހިންމު ބައިވެރިއެކެވެ.
