ޔުކްރެއިން ހަނގުރާމައިގެ ސަބަބުން އުފެދިފައިވާ ނުތަނަވަސްކަމުގެ ސަބަބުން ގޮދަން އިމްޕޯޓްކުރާ ގައުމުތަކުން ދަނީ އެހެން ގައުމުތަކުން ގޮދަން އިމްޕޯޓް ކުރުމަށް މަސައްކަތް ކުރަމުންނެވެ. ސިންގަޕޫރުގައި ހުންނަ އެގްރޯކޯރޕް އިންޓަރނޭޝަނަލް އިން ލަފާ ކުރާ ގޮތުގައި މި ހަމަނުޖެހުންތައް ދިގުދެމިގެން ހިނގައްޖެނަމަ 2021-22 ވަނަ އަހަރު އިންޑިއާގެ ގޮދަން އެކްސްޕޯޓްކުރާ މިންވަރު ރެކޯޑް އަދަދަކަށް 7 މިލިއަން ޓަނަށްވުރެ މައްޗަށް އަރައިގެން ހިނގައިދާނެ ކަމަށެވެ.
އެގްރޯ ކޯޕް އިންޓަރނޭޝަނަލް އަކީ އަހަރަކު ގާތްގަނޑަކަށް 12 މިލިއަން ޓަނުގެ ގޮދަނުގެ ވިޔަފާރި ކުރާ ކުންފުންޏެކެވެ. އެކުންފުނިން ބުނާ ގޮތުގައި މިހާރު ގޮދަނަށް ޑިމާންޑް ބޮޑުވެފައި ވަނީ އޭޝިއާގެ ގައުމުތަކުގައި އުފެދިފައިވާ ނުތަނަސްކަމުންނެވެ.
އޭޕްރީލް-މެއި މަހުގެ މުއްދަތަށް އޭޝިއާ މާކެޓުތައް ރަނގަޅަށް ސަޕްލައި ކުރެވޭ ކަމަށާއި ނަމަވެސް ޖުލައި މަހާއި އޮގަސްޓް މަހުން ފެށިގެން ސަޕްލައި ދަށްވާނެ ކަމަށް ލަފާ ކުރެވެއެވެ.
ޔޫކްރެއިންގެ ގޮދަނުގެ އެންމެ ބޮޑު ބައެއް ގަންނަނީ އިންޑޮނޭޝިއާ، އާޖެންޓީނާ، ބްރެޒިލް، އިންޑިއާ އަދި ޔޫރަޕްގެ ބައެއް ގައުމުތަކުންނެވެ. މިފަރާތްތަކުންވެސް ދަނީ ބަދަލުގައި އެހެން ގައުމުތަކުން ގޮދަން ލިބޭތޯ ބަލަމުންނެވެ.
އެމެރިކާގެ އެގްރިކަލްޗަރ ޑިޕާޓްމަންޓްގެ އަންދާސާއަކީ އިންޑިއާއިން މިއަހަރު 7 މިލިއަން ޓަނުގެ ގޮދަން އެކްސްޕޯޓް ކުރާނެ ކަމަށެވެ. ޔުކްރެއިންގެ މައްސަލައާ ހެދި އިންޑިއާ ވެގެންދާނީ ދުނިޔޭގައި ނުވަ ވަނައަށް އެންމެ ގިނައިން ގޮދަން އެކްސްޕޯޓް ކުރާ ގައުމަށެވެ.
