ޔުކްރެއިންގެ ނޭޝަނަލް ސެކިއުރިޓީ އެންޑް ޑިފެންސް ކައުންސިލްގެ ސެކްރެޓަރީ އޮލެކްސީ ޑެނިލޯވް ވިދާޅުވީ، ޔޫކްރެއިންގެ ރައީސް އަވަހާރަކޮށްލުމަށް ޗެޗްނިއާގެ "އެލީޓް ގްރޫޕެއް" ކިޔޭވްއަށް އައިސްފައިވާ ކަމަށެވެ. އަދި ޔޫކްރެއިންގެ ރައީސް ވޮލޮޑިމީރް ޒެލެންސްކީ އަވަހާރަކޮށްލުމަށް ޗެޗްނިއާ ހަނގުރާމަވެރިން ދިން ހަމަލާ ނާކާމިޔާބު ކޮށްލާފައިވާ ކަމަށް ޔުކްރެއިންގެ މަސްއޫލުވެރިން ވިދާޅުވެއެވެ.
ޗެޗެން ހަނގުރާމަވެރިންނަކީ ޗެޗްނިއާ ރައީސް ރަމަޟާން ގާދިރޯފް ގެންގުޅުއްވާ އެލީޓް ގްރޫޕެއްގެ ބައެކެވެ. މިމީހުންނަކީ ކުލީ ސިފައިންގެ ބައެކެވެ. ޕޫޓިންއަށް ނުރައްކާ ކުރާ މީހުން ނައްތާލުމަށްވެސް ގާދިރޯފް މިމީހުން ފޮނުވައެވެ.
ޔުކްރެއިން ބުނާ ގޮތުން ޗެޗްނިޔާ ހަނގުރާމަވެރިން ތިބީ ދެ ޔުނިޓެއްގައި ކަމަށާއި އޭގެ ތެރެއިން އެއް ޔުނިޓް އަތުލައިގަނެވުނު އިރު އަނެއް ޔުނިޓަށް ޔޫކްރެއިންގެ ސިފައިން ފާރަލަމުން ގެންދެއެވެ.
ޔުކްރެއިންގެ ރައީސް ޒެލެންސްކީ ހުންނެވި ހިސާބާއި މިމީހުންނަށް ގާތްވީ ކިހާ ހިސާބަކަށް ކަމެއް ސާފެއް ނުވެއެވެ.
އެމެރިކާގެ ޖާސޫސީ އިދާރާތަކުން ބުނާ ގޮތުގައި ރަޝިއާގެ އަމާޒަކަށް ވެފައި އޮތީ ޔޫކްރެއިންގެ ސަރުކާރު ބަދލުކޮށްލުމަށްޓަކައި ވެރިން ނައްތާލުމެވެ.
ޕޫޓިންގެ ބައިވެރިއެއް ކަމަށްވާ ކާދިރޯފް ވަނީ ޔޫކްރެއިންއަށް ޕޫޓިން ދެއްވި ހަމަލާއަށް އެއްބާރުލުން ދެއްވާފައެވެ.
