ޔުކްރެއިންގެ ހަނަގުރާމައިގެ ހިތާމަވެރި ކަންކަން ދަނީ އެންމެގެ ލޯމަތިން ޓީވީން ފެންނަމުންނެވެ. ސްޓްރެޓިޖިކް ގޮތްގޮތަށް މި ހަނގުރާމައާ މެދު ކަންކަން ނިންމާއިރު މި ހަނގުރާމަ ހުއްޓާލުމަށް އެންމެންވެސް ގޮވާލައެވެ. އަދި މިކަމުން އެންމެންވެސް ވަނީ މާޔޫސްކޮށްލާފައެވެ.
ޔޫކްރެއިންގެ މައްސަލައާ ގުޅިގެން ފާހަގަކޮށްލެވޭ ބައެއް ނާޒުކު ނުކުތާތަކެއް ވަނީ ފާހަގަކުރެވިފައެވެ. ބެލަރޫސް އާއި ހޮންގްކޮންގްގައި ކަން ހިނގައި ދިޔަގޮތަށާއި އަދި މިޔަންމާގެ ބަޣާވާތުގެ ހާލަތަށް ބަލާއިރު، ދުނިޔޭގެ ގައުމުތަކުގައި މީގެ 75 އަހަރުން ފެށިގެން އަމަލު ކުރަމުން އަންނަ ބައިނަލްއަގްވާމީ ގާނޫނަށް އިހުތިރާމް ކުރާ ރޫލްސް ބޭސްޑް އޯޑަރާ ކަނޑައެޅިގެން ޚިލާފް ބޮޑެތި ކަންތައްތަކެއް ފާޅުކަން ބޮޑު ގޮތެއްގައި، މިފަހަކަށް އައިސް ވަނީ ފެނިގެން ގޮސްފައެވެ.
ބައިނަލްއަގުވާމީ މުޖުތަމައުން މިކަމާ ދެކޮޅަށް ތެދުވުމަށް ކެނޑި ނޭޅި ގޮވާލަމުން ދެއެވެ. މި ގައުމުތަކާއި ސަރަހައްދުތަކުގައި ގަދަބާރުން ކޮށްފައިވާ ކަންކަމުގައި ބައިނަލްއަޤުވާމީ މުޖުތަމަޢު ބައިވެރިވާ ހެން ހީވުމަކީ ދުނިޔޭގެ އުސޫލާއި ހަމަތަކަށް ބަރޯސާވާ ބަޔަކަށް އިތުބާރު ނުހިފޭ ބައެއްގެ ގޮތުގައި ބޮޑެތި ގައުމުތައް ފެނިގެންދާ ކަމެކެވެ. މި ކަންކަމުގައި ބައިނަލްއަގްވާމީ މުޖުތަމައުން ފެނިގެން ދިޔަ ވަޅޯތާފަނާކަން ކަނޑުވާލައި މި ޙާލަތު އަވަސް ގޮތަކަށް ރަނގަޅު ނުކުރެވިއްޖެނަމަ، ދުނިޔޭގައި ގާއިމްވެފައިވާ ޑިމޮކްރެޓިކް ވެލިއުސްތަކަށް ކުޑަވެސް ޖާގައެއް ނުދެވި، ދުނިޔޭގެ ޑިމޮކްރެޓިކް ނިޒާމު ގެއްލިގެން ގޮސް، ކުރިމަތިލުމަކަށް ދުނިޔެއަށް މަޖުބޫރުވެދާނެކަމަށް ތަކުރާރުކޮށް ވަކާލާތުކުރެވެއެވެ. ރަޝިޔާއިން ޔޫކްރެއިންއަށް ދިން އުދުވާނީ ހަމަލާގެ ސަބަބުން ޑިމޮކްރެޓިކް ދުނިޔޭގެ ގިނަ ބަޔަކު އެއްގަލަކަށް އެރުވުމަށް މިކަން ފަހިވެގެން ދިޔައެވެ.
ރަޝިޔާގެ ގޭހުގެ އާމްދަނީއަށް ޕޫޓިން ވަރަށް ބޮޑަށް ބަރޯސާވުމުގެ ސަބަބުން ރަޝިޔާގެ ޔޫރަޕްގެ ހުރިހާ ރަހުމަތްތެރިން ވެސް ވަނީ ރަޝިޔާއާ ދެކޮޅަށް މި ހަނގުރާމައިގައި އެއްގަލަކަށް އަރާފައެވެ.
ޔޫކްރެއިންގައި ހިނގަމުންދާ ހަނގުރާމަ އިތުރަށް ވަރުގަދަވެފައި، މި އުދުވާނަށް ނިމުމެއް ނެތް ކަން ފެނެއެވެ. އަދި މި ހަނގުރާމައގެ ނަތީޖާއެއްވެސް އަދި ސާފުވެފައި ނުވާއިރު، މިހާރު ވެސް ހާމަވަމުންދާ އީޖާބީ އެއް ހެއްކަކީ، ބާރުގަދަ ގައުމުތަކުގެ އެއްބައިވަންތަކަމާއި ބާރުވެރިކަން ދައްކާލުމުގެ ތެރެއިން ބައިނަލްއަގުވާމީ މުޖުތަމައުގެ ހަރުދަނާކަން ފެނިގެންދާ ކަމެވެ. އަދި ބޮޑެތި ގައުމުތަކުން އުދުވާނެއްގައި ޖިއޮގްރަފީގެ ގޮތުން ކުދި ކުދި ގައުމުތަކަށް ދޭނެ ރައްކާތެރިކަމާއި ޔަގީން ކަމެވެ. އަދި، މުހިންމު މައްސަލަތަކުގައި، އަމިއްލަ މަޞްލަޙަތުތަކާއި ބައިބައިވުންތަކުން އެއްކިބާވެ، އެއްބައިވަންތަކަން އިސްކުރުމުގެ ޤާބިލުކަން، އެ ފަރާތްތަކުގެ ކިބައިގައި ހުރިކަން އެއީ، އެ ގައުމުތަކަށް ލިބިގެންދާނެ ވަރަށް ބޮޑު ހިތްހަމަޖެހުކެވެ.
ދުނިޔޭގެ އެންމެ ބާރުގަދަ ގައުމު އެމެރިކާއާއި އެ ގައުމުގެ އެކުވެރި ގައުމުތަކުން ޔުކްރެއިން ހަނގުރާމައިގައި ކުރިމަތިލާއިރު އުފެދޭ އަނެއް ސުވާލަކީ، އެމެރިކާ ފަދަ ގައުމެއްގެ ރައީސްކަމުގައި ޑޮނަލްޑް ޓްރަމްޕް ފަދަ މީހަކު އެއް ދައުރުގައި ހުރެގެން ލިބޭ ގެއްލުން އަލުން ތަކުރާރު ކުރުމަށް އެފަދަ ލީޑަރަކު ރައްޔިތުން ދެވަނަ ފަހަރަށް އިންތިޚާބު ކޮށްފާނެ ބާވައެވެ؟
ގައުމުތަކުގެ ވެރިކަމުގެ އެންމެ މަތީ ފަންތީގެ އޮފީސްތަކަށް ޚަސީލަތް ނުބައި ނަފްސާނީ ގޮތުން ހަމަހަމަކަން ގެއްލިފައިވާ، ތަންދޮރު ވަކި ނުކުރެވޭ، ނުރައްކާތެރި މީހުން އިޚްތިޔާރު ކުރުމުން ލިބޭ ގެއްލުމުން ދައްކުވައިދެނީ، ޓްރަމްޕްގެ ބައިބައި ކުރަނިވި ސިޔާސަތާއި ފިތުނަވެރިކަމުން ޕޫޓިންފަދަ ލީޑަރަކަށް ނުބައި މަގުން ހިނގުމަށް ވަސްވާސް ލިބުމެވެ.
މިފަދަ ވަސްވާހަކުން ހިތްވަރު ލިބިގެން ބައިނަލްއަގްވާމީ ގާނޫނާ ޚިލާފަށް ދުނިޔޭގެ ޑިމޮކްރެޓިކް ހަމަތަކުން އެއްބަސްވެފައިވާ ރޫލްސް ބޭސްޑް އޯޑަރާ ޚިލާފްވެ، ބޮޑެތި ޖަރީމާތަކެއް ހިންގާ، އަދަބު ނުލިބޭ، ބަޔަކު ތިބުމަށް އެފަދަ ވެރިއަކު ފަހިކޮށްދޭނެއެވެ.
އެމެރިކާގެ ރައީސް ޑޮނަލްޑް ޓްރަމްޕްގެ ވެރިކަމުގައި ބައިނަލްއަގްވާމީ ނިޒާމު ހީނަރު ކޮށްފައި ނުވިނަމަ، މިއަދު ޔުކްރެއިންއަށް އަރައި ގަތުމަށް ޕޫޓިންއަށް ހިތްވަރެއް ނުލިބުނީހެވެ.
ޓްރަމްޕުގެ މިދެންނެވި ދުނިޔޭގެ ހާލަތާ އަޅައި ބަލާއިރު އަނެއް ކޮޅުގައި އޮތީ ޔޫކްރެއިންގެ ރައީސް ވޮލޮޑިމީރް ޒެލެންސްކީއެވެ. ދާދި ފަހަކާ ޖެހެންދެން ވެސް އޭނާއާ ބެހޭ ގޮތުން ދުނިޔޭގެ މީހުން އަޑު އަހާފައެއް ނުވާނެއެވެ. މިއަދު ދުނިޔޭގެ އެތައް ބަޔަކު ދެކޭ ހަގީގީ ހިތްވަރުގަދަ ލީޑަރެއް އުފެދުމުގެ އަސްލަކީ އެއްވެސް މީހަކު ހީވެސް ނުކުރާ ފަދަ ގޮތަކަށް ޔޫކްރެއިންއިން ދުނިޔޭގެ މީހުން އެއްގަލަކަށް އެރުވުމުގައި އޭނާ ސަބަބަކަށް ވެގެން ދިއުމެވެ.
"ނިއުސްވީކް"ގެ އެޑިޓޯރިއަލްއެއްގައި ކީތު ނޯބަލްސް އާއި ޖިމީ ސެންގަންބަރގަރ އިޝާރާތް ކުރެއްވި ފަދައިން "ޒެލެންސްކީ އާއި ޔޫކްރެއިން މީހުން ވަނީ އެންމެން ގުޅިގެން ރަނގަޅު ކަމެއް ކުރުމަށް ދުނިޔެ އަށް ބާރުއަޅާފައެވެ. މީގެ ހަފްތާއެއްހާ ދުވަސްކުރިން މިފަދަ އެއްބައި ވަންތަ ކަމެއް ފެނިގެން ނުދިޔައީހެވެ. އާދަޔާ ޚިލާފް ފިޔަވަޅެއްގައި ރަޝިޔާގެ ބެންކުތަކާއި މާލީ ނިޒާމު ވަނީ ސްވިފްޓް އިންޓަނޭޝަނަލް ފައިނޭންޝަލް ނެޓްވޯކުން ރަޝިޔާ ބާކީކޮށްލާފައެވެ. މިއީ މީގެ ކުރިން ހީކުރެވިފައި އޮތް ކަމެއް ނޫނެވެ.
ރަޝިޔާގެ ހަކަތައިގެ މައްޗަށް ވަރަށް ބޮޑަށް ބަރޯސާވެފައިވާ ޖަރުމަނުވިލާތުން ދަނީ ދެވަނަ ބޮޑު ހަނގުރާމައަށްފަހު ފުރަތަމަ ފަހަރަށް ގައުމުން ބޭރަށް ނުރައްކާތެރި ހަތިޔާރު ފޮނުވަމުންނެވެ. ޔުކްރެއިންއަށް ޖަރމަނީން ހަތިޔާރު ފޮނުވައެވެ.
ތުރުކީވިލާތުން ދަނީ ރަޝިޔާގެ ހަނގުރާމަމަތީ ބޯޓުތައް ބްލެކް ސީއަށް ވަނުން ލިމިޓްކުރުމުގެ މުއާހަދާއެއް ތަންފީޒުކުރަމުންނެވެ.
ދެކުނު ކޮރެއާއިން ވަނީ ބައިނަލްއަގްވާމީ ދަތިކުރުމުގެ ފިޔަވަޅުތަކާ ގުޅިފައެވެ. ޒެލެންސްކީ ވަނީ ޔުކްރެއިންގެ ވަކި ވަކި ފަރުދުންގެ ދިފާއީ ރޫހު ތަމްސީލުކޮށްދީފައެވެ.
