ރަޝިޔާގެ ޚާރިޖީ ވުޒާރާއިން ޔޫރަޕިއަން ޔޫނިއަންއާއި ނޭޓޯގެ ގައުމުތަކަށް ގޮވާލާފައިވަނީ ޔޫކްރެއިންއަށް ހަތިޔާރު ފޮނުވުން ހުއްޓާލުމަށެވެ.
މޮސްކޯއިން ބުނީ، ކޮނޑުމަތިން ގެންގުޅޭ ސްޓިންގަރ މިސައިލްތައް ޓެރަރިސްޓުންގެ އަތްމައްޗަށް އަރާފާނެތީ މޮސްކޯއިން ވަރަށް ބޮޑަށް ކަންބޮޑުވާ ކަމަށާއި، މިކަމުގެ ސަބަބުން އެއަރލައިންތަކަށް ނުރައްކަލެއް ކުރިމަތިވެދާނެ ކަމަށެވެ.
ޔޫރަޕުގެ ގައުމުތަކުން ދަނީ ޔުކްރެއިންއަށް ހަތިޔާރު ސަޕްލައިކޮށްދެމުންނެވެ.
ފިންލެންޑަކީ ނޭޓޯގައި ނުހިމެނޭ ގައުމެއްކަމުގައި ވިއަސް ޔޫކްރެއިންއަށް ހަތިޔާރު ފޮނުވުމަށް އެގައުމުން ނިންމައިފިއެވެ. އޭގެ ތެރޭގައި 2500 އެސޯލްޓް ރައިފަލްއާއި، 150،000 ބުރުގެ ގޮވާތަކެއްޗާއި، 15000 ރޮކެޓް ލޯންޗަރު އަދި 70،000 ޕެކެޓް ސިފައިންގެ ކާނާ ފޮނުވާނެކަމަށް ބުނެފައެވެ.
ޑެންމާކުން ވެސް ވަނީ 2،700 އެންޓި ޓޭންކް ހަތިޔާރު ފޮނުވާނެ ކަން އިއުލާނުކޮށްފައެވެ. ޑެންމާކުގެ ވޮލަންޓިއަރުން ޔޫކްރެއިންގައި އެކުލަވާލާ އިންޓަނޭޝަނަލް ބްރިގޭޑްސް އާ ގުޅެން ފުރުސަތު ދޭނެ ކަމަށްވެސް ބުނެފައިވެއެވެ.
ނޯރވޭއިން ބުނެފައި ވަނީ ހެލްމެޓާއި ވަޒަން ނާރާވައްތަރުގެ ވެސްޓްގެ ޝިޕްމަންޓްތައް ފޮނުވާނެ ކަމަށެވެ. އަދި ޓެންކާއި ދެކޮޅަށް ބޭނުންކުރާ 2000 އެމް72 އެންޓި ޓޭންކް ހަތިޔާރުވެސް ފޮނުވާނެ ކަމަށެވެ.
ކްރޮއޭޝިއާއިން ވަނީ 16 މިލިއަން ޔޫރޯގެ ޕްރޮޓެކްޓިވް ގިއާރ އާއި ލުއި ހަތިޔާރު ފޮނުވުމަށް ނިންމާފައެވެ.
ސްލޮވީނިއާ އިން ވަނީ ރައިފަލް އާއި ގޮވާތަކެއްޗާއި ހެލްމެޓް ދޭނެ ކަމަށް ވައުދުވެފަ އެވެ.
އެމެރިކާއިން ޔޫކްރެއިންއަށް 350 މިލިއަން ޔޫރޯގެ އަސްކަރީ އެހީގެ ޕެކޭޖެއް އިޢްލާން ކޮށްފައި ވެއެވެ. އެމެރިކާގެ ޚާރިޖީ ވަޒީރު އެންޓޮނީ ބްލިންކެން ވިދާޅުވި ގޮތުގައި، މިއީ "އާދަޔާ ޚިލާފު ފިޔަވަޅެއް" ކަމަށާއި، ފާއިތުވި އަހަރެއްހާ ދުވަހުގެ ތެރޭގައި ވޮޝިންޓަންއިން ޔޫކްރެއިންއަށް ދިން އަސްކަރީ އެހީގެ ޖުމްލަ އަދަދު ގާތްގަނޑަކަށް އެއް ބިލިއަން ޔޫރޯއަށް އަރާފައިވާ ކަމަށެވެ.
ޔޫކްރެއިންގެ ރައްޔިތުން ހާއްސަ ގޮތެއްގައި ޖަވިލިއަން އެންޓި ޓޭންކް މިސައިލް ހޯދުމަށް އެދިފައިވާ ކަމަށާއި، އެ މިސައިލްތައް ޕެކޭޖުގައި ހިމަނާނެ ކަމަށް އެމެރިކާގެ ރައީސް ޖޯ ބައިޑަން ވަނީ ވިދާޅުވެފައެވެ.
ކެނެޑާއިން ވަނީ ހެލްމެޓާއި ވަޒަން ނާރާ ވެސްޓް ފަދަ އަސްކަރީ ޕްރޮޓެކްޓިވް އިކުއިޕްމަންޓް ތައް ފޮނުވާފައެވެ.
ޕޯޗުގަލް، ޗެކް ރިޕަބްލިކް އަދި ރޫމޭނިއާއިންވެސް ދަނީ އަސްކަރީ އާލާތްތައް ފޯރުކޮށްދީގެން ޔޫކްރެއިންގެ ދިފާއަށް އެއްބާރުލުން ދެމުންނެވެ.
ޕޯޗުގަލް އިން ވަނީ ވޒަން ނާރާ ވެސްޓް އަދި ހެލްމެޓް ފަދަ ރައްކާތެރިކަމުގެ އާލާތްތަކުގެ އިތުރުން ނައިޓް ވިޝަން ގޮގްލްސް، ގްރެނޭޑް އަދި އެކި ފެންވަރުގެ ގޮވާތަކެތި ވެސް ފޮނުވަން ބުނެފައެވެ.
ޗެކް ރިޕަބްލިކުން ފޮނުވަނީ 30،000 ފިސްތޯލަ އާއި 7،000 އެސޯލްޓް ރައިފަލް އާއި 3،000 މެޝިން ބަޑި އާއި އެތައް ޑަޒަން ސްނައިޕަރު ރައިފަލްގެ އިތުރުން އެއް މިލިއަން ބުރުގެ ގޮވާތަކެތި ކަމަށް ޗެކް ރިޕަބްލިކުން ބުންޏެވެ.
ރޫމޭނިއާއިން ތެލާއި، ބޮޑީ އާރމަރ، ހެލްމެޓް، ގޮވާތަކެތި އަދި އެހެނިހެން އަސްކަރީ އާލާތްތައް ފޯރުކޮށްދެމުން ދެއެވެ.
އޭގެ އިތުރުން، ހަނގުރާމައިގައި ޔޫކްރެއިންގެ ޒަޚަމްވެފައިވާ މީހުންނަށް ހަންގެރީގެ 11 އަސްކަރީ ހޮސްޕިޓަލެއް ތައްޔާރުކޮށްފައިވާކަމަށް ބުކަރެސްޓުން ވަނީ އިޢްލާން ކޮށްފައެވެ.
އަދި ސްވިޑްންއިން ވަނީ އެ ޤައުމުން ކިއެވްއަށް އެންޓި-ޓޭންކް ހަތިޔާރު ފޯރުކޮށްދޭނެކަން އިޢުލާނުކޮށްފައެވެ.
ފަރަންސޭސިވިލާތުން ވަނީ ދިފާޢީ އާލާތްތަކާއި ތެލުގެ ސަޕޯޓް ވެސް ކޮށްފައެވެ.
މީގެ އިތުރުން ބެލްޖިއަމް އާއި ނެދަލެންޑްސް އިން ހަތިޔާރާއި ޕްރޮޓެކްޓިވް އިކުއިޕްމަންޓް ފޯރުކޮށްދޭނެ ކަމަށް ބެލްޖިއަމް ސަރުކާރުން ވައުދުވެފައިވާ އިރު، ބެލްޖިއަމް ސަރުކާރުން ވަނީ 2،000 މެޝިން ބަޑި އާއި 3،800 ޓަނުގެ ތެލާއި އިތުރު 3،000 އޮޓޮމެޓިކް ރައިފަލް އަދި 200 އެންޓި ޓޭންކް ހަތިޔާރު ދޭނެ ކަމަށް ބުނެފަ އެވެ.
މީގެ އިތުރުން ރައްކާތެރިކަމުގެ އާލާތްތަކުގެ އިތުރުން ނެދަލެންޑްސް އިން 200 ސްޓިންގަރ އެންޓި އެއާކްރާފްޓް މިސައިލް ވެސް ވީ އެންމެ އަވަހަކަށް ފޯރުކޮށްދޭނެ އެވެ.
އެހެން ބޮޑު ޝިފްޓެއްގައި ޖަރުމަނުން ވަނީ ހަނގުރާމަވެރި ސަރަހައްދުތަކަށް ލީތަލް ހަތިޔާރު އެކްސްޕޯޓް ކުރުން މަނާކުރުމަށް ޒަމާނުއްސުރެ ގެންގުޅެމުން އައި ހާރިޖީ ސިޔާސަތު އުވާލައި، 1000 އެންޓި ޓޭންކް ރޮކެޓް ލޯންޗަރު، 500 ސްޓިންގަރ ސާފޭސް ޓު އެއަރ މިސައިލް، ނުވަ ހަވިޓްޒަރ، 14 އާމަޑް ވެހިކަލް އަދި 10،000 ޓަނުގެ ތެޔޮ ޔޫކްރެއިންއަށް ފޯރުކޮށްދޭނެ ކަމަށް ބުނެފައެވެ.
ޔޫރަޕިއަން ކޮމިޝަންގެ ރައީސް އުރުސުލާ ވޮން ޑަރ ލެޔެން ހޯމަ ދުވަހު ވަނީ ޔޫކްރެއިންއަށް ހަތިޔާރު ގަނެ ޑެލިވަރީ ކުރުމަށް އީޔޫއިން 450 މިލިއަން ޔޫރޯ ހަރަދުކުރާނެ ކަން އިއުލާން ކުރައްވާފައެވެ.
