އިންޑިއާ ސަރުކާރުން ދަނީ މަގުތަކުގެ ސަލާމަތާއި ރައްކާތެރިކަމަށްޓަކައި އާޓިފިޝަލް އިންޓެލިޖެންސްގެ މައްޗަށް ބިނާކޮށް ޓެކްނޮލޮޖީ ބޭނުންކުރުމަށް ތައްޔާރު ވަމުންނެވެ. އިންޑިއާއިން ބުނާ ގޮތުގައި ތަރައްގީ ވަމުން އަންނަ ގައުމުތަކުގައި މަގުމަތީގެ ސަލާމަތާއި ރައްކާތެރިކަމަކީ މިވަގުތު އެންމެނަށްވެސް ދިމާވެފައިވާ ގޮން ޖެހުމެކެވެ.
އާޓިފިޝަލް އިންޓެލިޖެންސް ބޭނުންކޮށްގެން އިސްކަން ދޭ ދާއިރާތަކުގެ ތެރޭގައި ފޮރެންސިކް ޕޯސްޓް ކްރޭޝް އިންވެސްޓިގޭޝަންސްއާއި ބްލެކް ސްޕޮޓްތަކުގެ ސަބަބުން ހިނގާ އެކްސިޑެންޓްތައް ހިނގާ ގޮތް ދަނެގަތުމަށާއި ނިދީގައި ދުއްވާ މީހުން ދަނެގަތުމަށާއި ކުރިއަށް ލަފާކޮށް އެކްސިޑެންޓެއް ހިނގާފާނެކަމަށް ލަފާ ކުރުން ފަދަ ނިޒާމުތައް ގާއިމް ކުރުން ހިމެނެއެވެ.
އިންޑިއާ ސަރުކާރުގެ ޑޭޓާއަށް ބަލާއިރު، މަގުމަތީގެ އެކްސިޑެންޓްތަކުގެ 35 ޕަސެންޓަށް ވުރެ ބޮޑު ބަޔަކީ ހައިވޭތަކުގައި ހިނގާ އެކްސިޑެންޓްތަކެވެ.
މި ވަގުތު އިންޑިއާގައި އާޓިފިޝަލް އިންޓެލިޖެންސް ބޭނުންކޮށްގެން މަގުމަތި ބެލެހެއްޓުމުގެ ޕައިލެޓް ޕްރޮޖެކްޓެއް ހިނގަމުން ދަނީ ނާގްޕޫރުގައެވެ. އެ ޕްރޮޖެކްޓަކީ މަގުތަކުގައި އެކްސިޑެންޓް މެދުވެރިވާން ދިމާވާ ބްލައިންދް ސްޕޮޓްތައް ދެނެގަތުމުގެ ޕްރޮޖެކްޓެކެވެ. އޭގެ އިތުރުން ގައުމީ ހައިވޭތަކަށް މެޝިން ލާނިން އާއި އާޓިފިޝަލް އިންޓެލިޖެންސް އިންޓަގްރޭޓް ކުރުމުގެ މަސައްކަތް ވެސް ފަށާފައިވެއެވެ.
މި ވަގުތު އެޑްވާންސް ޓްރެފިކް މޮނިޓަރިންގ ސިސްޓަމެއް އިންޑިއާގައި ގާއިމް ކޮށްފައި ވަނީ ދިއްލީއާއި މީރަޓްއާ ދެމެދު އޮންނަ އީސްޓަން އެކްސްޕްރެސްވޭގައެވެ. މުސްތަގްބަލުގައި މި ނިޒާމު ހުރިހައި ގައުމީ ހައިވޭތަކެއްގައި ބޭނުން ކުރުމަށްވެސް ނިންމާފައި ވެއެވެ.
މި ސިސްޓަމަކީ ވެހިކަލްތަކުގެ ނަމްބަރު ޕްލޭޓްތައް ދަނެގަނެ، ވެހިކަލްތަކުގެ ޑޮކިއުމެންޓޭޝަންގައި ހުރި ތަފާތުތައް ވަކިކޮށް ޓްރެފިކް ރޫލްސްއަށް ހުރުމަތްތެރިކޮށް ހިތާ މިންވަރު ބަލަހައްޓާ ނިޒާމެކެވެ. މި އިން ލިބޭ މައުލޫމާތު ސަރަހައްދުތަކުގެ މަސްއޫލު ފަރާތްތަކަށް ޓެކްނޮލޮޖީ މެދުވެރިކޮށް އެލާޓްތައް ދާނެއެވެ.
