ތާލިބާނުންނަށް ފާޑުވިދާޅުވަމުން ގެންދެވި އަފްޣާނިސްތާނުގެ ޔުނިވާސިޓީގެ ޕްރޮފެސަރ އަދި ޕޮލިޓިކަލް އެނަލިސްޓެއް ކަމަށްވާ ސައްޔިދު ބާޤިރު މުހްސީނީ، ވަނީ ވީނުވީއެއް ނޭނގި ގެއްލިފައެވެ.
ތުލޫޢު ނިއުސްއިން މުހުސިނީގެ އާއިލާއާ ހަވާލާ ދީ ރިޕޯޓްކުރާ ގޮތުގައި، އެންމެ ފަހުން މުހުސިނީގެ ޚަބަރެއް ވީ، އޭނާއާއި އޭނާގެ ތިމާގެ މީހަކު ހުކުރު ދުވަހުގެ މެންދުރުފަހު ކާބުލްގައި ޓީވީ ޕްރޮގްރާމެއްގައި ބައިވެރިވުމަށް ދަތުރުކުރަމުން ދަނިކޮށެވެ. އޭގެ ފަހުން ދެމީހުން ވަނީ ގެއްލިފައެވެ.
އާއިލާއިން ވަނީ ތާލިބާންގެ ސަލާމަތީ ޑިޕާޓްމަންޓްތަކަށް ގުޅައި މައްސަލަ ހުށަހަޅާފައެވެ. އެކަމަކު އަދިވެސް ޖަވާބެއް ލިބިފައެއް ނުވެއެވެ.
އޭނާގެ ފޯނުވެސް ވަނީ ނިއްވާލާފައި ކަމަށް އާއިލާއިން ބުނެއެވެ.
ތާލިބާނުން މުހްސިނީ ހިފަހައްޓާފައިވާ ކަމަށް ބުނެ ސޯޝަލް މީޑިއާގައި ރައްޔިތުން ދަނީ ވާހަކަ ދައްކަމުންނެވެ. މިކަމުގައި ރަސްމީ އެއްވެސް ފަރާތަކުން އަދި ވަކި އެއްޗެއް ބުނެފައެއް ނުވެއެވެ.
ގިނަ ޓީވީ ޕްރޮގްރާމްތަކުން ސައްޔިދު ބާޤިރު މުހްސީނީ ފެނިގެންދިޔައީ ޠާލިބާނުންގެ ސިޔާސަތުތަކަށް ފާޑުކިއުންތައް އަމާޒުކުރައްވާ ބޭފުޅެއްގެ ގޮތުގައެވެ.
