ދެ ދުވަހުގެ މުއްދަތަށް ރާއްޖޭގައި ކުރިއަށްދާ ފަސް ވަނަ ކޮލޮމްބޯ ސެކިއުރިޓީ ކޮންކްލޭވްގައި ދިވެހިރާއްޖެއާއި އިންޑިއާ، ސްރީލަންކާ، މޮރިޝަސް، ބަންގްލަދޭޝް އަދި ސީޝެލްސްގެ ހަ ޤައުމުގެ ނޭޗަނަލް ސެކިއުރިޓީ އެޑްވައިޒަރުން ބައިވެރިވެ ވަޑައިގަންނަވައެވެ.
ކޮލަމްބޯ ސެކިއުރިޓީ ކޮންކްލޭވްއަކީ އިންޑިއާ، ސްރީލަންކާ އަދި ރާއްޖެއާ ދެމެދު ޓްރައިލޭޓަރަލް ސެކިއުރިޓީ ފްރޭމްވޯކެއްގެ ގޮތުގައި އުފެއްދިގެން އައި ކޮންކްލޭވެކެވެ.
މި ކޮންކްލޭވްގައި ބަހުސް ކުރަނީ ސަލާމަތީ ގޮތުން އިންޑިއާ ކަނޑުގެ ސަރަހައްދުގެ މި ގައުމުތަކަށް ދިމާވާ ގޮންޖެހުންތަކާއި އެ ގޮންޖެހުންތަކަށް ހައްލު ހޯދުމާ ބެހޭ ގޮތުންނެވެ.
މިއަހަރުގެ ކުރީކޮޅު އިންޑިއާއިން އިންތިޒާމު ކުރި މަސައްކަތު ބައްދަލުވުމުގައި މައުލޫމާތުގެ ރަސްމަގުގެ ސަލާމަތާ ބެހޭ ގޮތުން ބަހުސްކޮށްފައި ވެއެވެ.
ސައިބަރ ސެކިއުރިޓީ، ޑާކް ވެބް އަދި ޑިޖިޓަލް ފޮރެންސިކްގެ ދާއިރާއިން ހުރި ބޮޑެތި ގޮންޖެހުންތަކަށް ހައްލު ހޯދުމުގެ މަޤްޞަދުގައި ފުރަތަމަ "ކޮލަމްބޯ ސެކިއުރިޓީ ކޮންކްލޭވް ވަރޗުއަލް ވޯކްޝޮޕް" ކުރިއަށް ގެންގޮސްފައި ވަނީ އިންޑިއާއިންނެވެ. މި އަހަރުގެ ޖަނަވަރީ މަހުގެ 10-11 އަށް ކުރިއަށް ގެންދިޔަ މި ވަރޗުއަލް ވޯކްޝޮޕްގައި ދިވެހިރާއްޖެ، އިންޑިއާ، ސްރީލަންކާ، ސީޝެލްސް، ބަންގްލަދޭޝް އަދި މޮރިޝަސްގެ މަންދޫބުން ބައިވެރިވެވަޑައިގެންނެވިއެވެ.
މިއަދު ރާއްޖޭގައި އިފްތިތާހު ކުރި ކޮންކްލޭވްގެ ރަސްމިއްޔާތުގައި ދިވެހިރާއްޖޭގެ ދިފާޢީ ވަޒީރު މާރިޔާ އަހުމަދު ދީދީ ވަނީ މި ސަރަޙައްދުގެ ޞުލްޙައާއި، ސަލާމަތާއި، ހަމަޖެހުމަށް ދިވެހިރާއްޖެއިން ދޭ އަހައްމިއްޔަތުގެ މައްޗަށް އަލިއަޅުއްވާފައެވެ.
މޮރީޝިއަސް އަށް ކޮންކްލޭވްގެ ފުރިހަމަ މެމްބަރުކަން ލިބިފައި ވަނީ މިއަދުގެ ބައްދަލުވުމުގައެވެ. އެހންވެ، މޮރިޝަސްއަށް މިނިސްޓަރ މާރިޔާ ވަނީ މަރުޙަބާ ވިދާޅުވެފައެވެ. އަދި އިތުރު އޮބްޒަރވަރ ސްޓޭޓްތަކުން ވަރަށް އަވަހަށް މި ކޮންކްލޭވްގައި ބައިވެރިވާނެކަމަށް އުއްމީދުކުރައްވާކަމަށްވެސް މިނިސްޓަރ ވިދާޅުވިއެވެ.
މި ކޮންކްލޭވްގެ އެންމެ އާ މެމްބަރު ގައުމަކަށް މޮރިޝަސް ވުމާއި އެކު، ކޮލަމްބޯ ސެކިއުރިޓީ ކޮންކްލޭވްގައި މިހާރު ދާއިމީ 4 މެމްބަރު ގައުމު ހިމެނެއެވެ. އެއީ ދިވެހިރާއްޖެ، އިންޑިއާ، ސްރީލަންކާ، އަދި މޮރިޝަސްއެވެ.
އިންޑިޔާއިން މި ކޮންކްލޭވްގައި އިންޑިއާ ތަމްސީލުކޮށްދެއްވަނީ އިންޑިއާގެ ނޭޝަނަލް ސެކިއުރިޓީ އެޑްވައިޒަރ އަޖިތު ޑޮވަލް އެވެ. އޭނާގެ ވާހަކަފުޅުގައި، ސަރަޙައްދީ ސަލާމަތާއި ރައްކާތެރިކަމާ ބެހޭގޮތުންނާއި ސަރަޙައްދުގެ ޤައުމުތަކުގެ ސަލާމަތާއި ރައްކާތެރިކަމާއި، މަސްތުވާތަކެތީގެ ވިޔަފާރިއާއި، އިންސާނީ ވަގުފާރިއާއި، ކަނޑުފޭރުމާއި، ޓެރަރިޒަމާއި ހައްދުފަހަނައަޅައި ދިއުން ފަދަ މައްސަލަތަކުގެ މައްޗަށް އަލިއަޅުއްވައިލެއްވިއެވެ.
