ނިއުދިއްލީއާއި ކޮލަމްބޯއިން ދަނީ އިންޑިއާގެ ސްޓްރެޓީޖިކް މަސްލަހަތުތަކަށް އަދި ވަކިން ޚާއްސަކޮށް ޓްރިންކޮމަލީ ބަނދަރުގެ ސަރަހައްދުގައި އިންޑިއާއިން ބަހައްޓާ ޝައުގުވެރިކަމަށް ޚާއްސަ ސަމާލުކަމެއްދީގެން އެކަންކަން ދިރާސާކުރަމުންނެވެ. އިންޑިއާއިން ޓްރިންކޮމަލީ ސަރަހައްދުގެ ސަލާމަތަށް ދޭ ސަމާލުކަމާއެކު އިންޑިއާއިން ވަނީ ސެކިއުރިޓީ ރޮނގުން ބައެއް ފިޔަވަޅުތައް ލަންކާއާ ގުޅިގެން އެޅުމަށް ނިންމާފައެވެ.
އެގޮތުން ލަންކާއަށް ސަރަހައްދު ބެލެހެއްޓުމަށް ލަންކާ ވައިގެ ސިފައިންނަށް ޑޯނިއަރ ސަރވެއިލެންސް އެއަރކްރާފްޓް ދިނުމާއި ސްރީލަންކާގެ ނޭވީއަށް ޓްރިންކޮމަލީގައި ބޮޑެތި ބޯޓު މަރާމާތު ކުރުމަށް ޝިޕް ރިޕެއަރ ޑޮކްއެއް ހަދައި ދިނުން ހިމެނެއެވެ.
މިކަންކަމުގެ އިތުރުން އިންޑިއާއިން ހުށަހަޅާފައި ވަނީ ބަހްރައިންގައި ހުންނަ ބައިނަލްއަޤްވާމީ ޓެރަރިޒަމާއި، މަސްތުވާތަކެތީގެ ވިޔަފާރި ހުއްޓުވުމުގެ މަގްސަދުގައި އިންޓެލް ހިއްސާ ކުރާ އޮފީހެއް ކަމުގައިވާ އިންޓެލިޖެންސް ފިއުޝަން ސެންޓަރަށް ސްރީލަންކާގެ ކަނޑުގެ ސިފައިންގެ އޮފިސަރުންގެ ތެރޭން މަންދޫބަކު އައްޔަންކޮށްފައި ބެހެއްޓުމަށެވެ. އަދި މި ސަރަޙައްދުގައި ކަނޑު ހުރަސްކުރާ ވިޔަފާރި އުޅަނދު އާގުބޯޓުތަކަށް ރައްކާތެރިކަމާއެކު ބައިނަލްއަޤްވާމީ ކަނޑުގެ ސަރަހައްދު ހުރަސްކުރުން ކަށަވަރު ކޮށްދިނުމަށްވެސް އިންޑިއާއިން ވަނީ ލަންކާއަށް ހުށަހަޅާފައެވެ.
ޓްރިންކޮމަލީ ސަރަހައްދު ތަރައްގީ ކުރުމަށް އިންޑިއާއިން ހުށަހަޅާ ހުށަހެޅުންތަކުގެ ތެރޭގައި، ޓްރިންކޮމަލީ ކައިރީގައި އޮންނަ ސަމްޕޫރުގައި އިއާދަކުރަނިވި ހަކަތައިގެ މަޝްރޫއެއް ފެށުމުގެ ޝައުގުވެރިކަންވެސް އިންޑިއާއިން ވަނީ ފާޅުކޮށްފައެވެ.
މި މަހު ފަހުކޮޅު ލަންކާގެ ފިނޭންސް މިނިސްޓަރު ބެސިލް ރާޖަޕަކްސަ އިންޑިއާއަށް ވަޑައިގަންނަވާއިރު ދެ ގައުމުގެ ދެމެދު އިގްތިސާދީ ބައެއް މަޝްރޫއުތަކާ ބެހޭ ގޮތުން ބަހުސް ކުރުމަށް އެޖެންޑާ ކުރެވޭއިރު މި މަޝްރޫއުވެސް އެޖެންޑާ ކުރެވޭނެއެވެ.
ސްރީލަންކާގެ އިޤްތިޞާދު އަލުން ކޮޅަށް ޖެހުމަށްޓަކައި ފާއިތުވީ 6 މަސްދުވަހުގެ ތެރޭގައި ސްރީލަންކާގެ ވަޒީރުންނާއި އިންޑިއާގެ އޮފިޝަލުން ގެންދަވަނީ އެއްގައުމުން އަނެއް ގައުމަށް ޒިޔާރަތް ކުރައްވައި މަޝްވަރާތައް ބާއްވަވަމުންނެވެ.
ކޮލަމްބޯއިން ވަނީ އެގައުމުގެ އިގުތިސާދަށް އަލުން ދިރުމެއް ދިނުމަށްޓަކައި އިންޑިއާއާ ގުޅިގެން ކުރިއަށް ގެންދަން ބޭނުންވާ 8 ދާއިރާއެއް ފާހަގަކޮށްފަ އެވެ.
