ރަޝިޔާގެ ވިޔަފާރިވެރިޔާ ރޯމަން އަބްރަމޮވިޗް ބޭނުންކުރި މަތިންދާބޯޓަކާއެކު ރަޝިޔާއަށް ދާދިފަހުން ދަތުރުކުރި ކަމަށް ބެލެވޭ 100 މަތިންދާ ބޯޓެއް އެމެރިކާއިން ގްރައުންޑް ކުރަން ފަށައިފިއެވެ.
އެމެރިކާގެ ޑިޕާޓްމަންޓް އޮފް ކޮމާސް އިންއިއްޔެ ވަނީ ރަޝިއާގެ ފަސިންޖަރުންނާއި ކާގޯ އުފުލާ ބޯޓުތައް ކަމަށްވާ އޭރޯފްލޮޓް، އެއާބްރިޖް ކާގޯ، އުޓާރު، ނޯޑްވިންޑް، އަޒޫރު އެއާ އަދި އެވިއަސްޓާ-ޓީޔޫ ގެ އިތުރުން އަބްރަމޮވިޗްގެ ގަލްފްސްޓްރީމް ޖީ650 މަރުކާގެ ބޯޓާއެކު ބޮއިންގް މަރުކާގެ 99 މަތިންދާ ބޯޓުގެ ލިސްޓެއް އާންމުކޮށްފައެވެ.
އެ ޑިޕާޓްމެންޓުން ނެރުނު ބަޔާނެއްގައި ބުނީ އެމެރިކާގެ އެކްސްޕޯޓް ރެގިއުލޭޝަންތަކާ ޚީލާފަށް ހުއްދައާ ނުލައި މިއިން މަތިންދާބޯޓަކަށް އެއްވެސް ހިދުމަތެއް ފޯރުކޮށްދިނުމަކީ "ޖަލު ހުކުމެއް، ޖޫރިމަނާއެއް، ނުވަތަ އެކްސްޕޯޓް ކުރުމަށް ދީފައވާ ހުއްދައެއް ހިފެހެއްޓުން ނުވަތަ އެނޫންވެސް އެހެން ފިޔަވަޅުތަކެއް" އެޅިދާނެ ކަމެއް ކަމަށެވެ.
އަދި ބޭރު ގައުމުތަކުންވެސް މި މަތިންދާ ބޯޓްތަކަށް އެއްވެސް ޚިދުމަތެއް ދިނުމަކީ މަނާ ކަމެއް ކަމަށާއި އެފަދަ ކަމެއް ކޮށްގެން ނުވާނެ ކަމަށްވެސް އިއުލާންގައި ވެއެވެ.
މިއީ، ޔޫކްރެއިންގައި ރަޝިޔާއިން އިއުލާން ކޮށްފައިވާ ހަނގުރާމަ ނިމުމަކަށް ގެނައުމަށް ރައީސް ވްލަޑިމިއަރ ޕޫޓިންއަށް ޕްރެޝަރު ކުރުމުގެ ގޮތުން، އެމެރިކާގެ ރައީސް ބައިޑަންގެ ސަރުކާރުން ރަޝިޔާގެ އޮފިޝަލުންނާއި، ކުންފުނިތަކާއި، އެނޫންވެސް ބައެއް އިދާރާތަކާ ދެކޮޅަށް ދަތިކުރުމުގެ ފިޔަވަޅުތައް އަދިވެސް އަލަމުންދާ ކަން ހާމަކޮށްދޭ ކަމެކެވެ.
ރަޝިޔާއިން ޔޫކްރެއިންގެ ސިޓީތަކަށް ދެމުންދާ ބޮމުގެ ހަމަލާގެ ސަބަބުން އެތައް މިލިއަން ބަޔަކު ވަނީ އަމިއްލަ ވަޒަން ދޫކޮށް ޔޫކްރެއިން ހިޖުރަކުރަން ފަށާފައެވެ.
