މިޔަންމާގެ ސިފައިން ރޮހިންޔާ ދަރިކޮޅުގެ މުސްލިމުންނާ ދެކޮޅަށް ހިންގާ ލާއިންސާނީ ޖަރީމާތަކުގައި ނަސްލު ނައްތާލުމާއި އިންސާނިއްޔަތާ ހިލާފު ޖަރީމާތައް ހިންގާފައިވާ ކަމަށް އެމެރިކާއިން ރަސްމީކޮށް ނިންމައިފިއެވެ. މިޔަންމާގެ ސިފައިން ރޮހިންޔާ ދަރިކޮޅުގެ މުސްލިމުންނާ ދެކޮޅަށް ހިންގަމުންދާ ލާއިންސާނީ ޖަރީމާތަކާ ގުޅިގެން އެމެރިކާގެ ޚާރިޖީ ވަޒީރު އެންޓޮނީ ބްލިންކެން ވިދާޅުވީ، ރޮހިންޔާ ދަރިކޮޅުގެ މީހުންނާ ދެކޮޅަށް ދެމުންދާ ޖަރީމާތަކަކީ "ފުޅާ ދާއިރާއެއްގައި އަދި ރޭވިގެން އިންތިޒާމެއްގެ މަތިން" ދެމުންދާ ހަމަލާތަކެއް ކަމަށެވެ. އަދި އޭނާ ވިދާޅުވީ ލިބިފައިވާ ހެކިތަކުން މައިގަނޑު ގޮތެއްގައި އެނގެނީ، ބައިމަދު މުސްލިމް ނަސްލެއް ނައްތާލުމުގެ ސާފު ނިޔަތެއް މިޔަންމާގެ ސިފައިންގެ ވިސްނުމުގައި އޮތްކަން ހާމަވާ ކަމަށެވެ.
ނަސްލު ނައްތާލުމުގެ ޖަރީމާ މިޔަންމައިން ހިންގަމުން ގެންދާ ކަން އެމެރިކާއިން އިއުލާން ކުރުމުން މިޔަންމާގެ ޖެނެރަލުން ޖަވާބުދާރީ ކުރުވުމަށް ކުރަމުންދާ މަސައްކަތްތަކަށް އިތުރު ބާރެއް ލިބިގެން ދާނެއެވެ. ރައްޖެއަކީ މިމައްސަލާގައި ދައުވާ ކުރާ އެއް ގައުމެވެ.
އަދި މިޔަންމާ ސިފައިންގެ އިތުރު ޖަރީމާތައް ހުއްޓުވުމަށް އެހީތެރިވެދޭނެ ކަމަށް އެމެރިކާއިން ބުނާ ބުނުމަށް މިކަމުގެ ސަބަބުން އިތުރު ބަރެއް އެޅިގެންދާނެ ކަމަށް ބެލެވެއެވެ.
ވޮޝިންޓަންގައި ހުންނަ ޔޫއެސް ހޮލޮކާސްޓް މެމޯރިއަލް މިއުޒިއަމްގައި ދެއްވި ތަގުރީރުގައި އެމެރިކާގެ އެންމެ އިސް ޑިޕްލޮމޭޓް ވަނީ، މިޔަންމާ ސިފައިން މަދަނީންނަށް ބަޑިޖަހައި ހެދި ކަމަށާއި، އަންހެނުން ރޭޕްކޮށްފައިވާ ކަމަށާއި، މީހުންނަށް ރަހުމު ކުދަކޮށް އަނިޔާކުރި ކަމުގެ ވާހަކަތައް ވިދާޅުވެ ދެއްވާފައެވެ.
