ޗައިނާގެ ބައެއް މަސްއޫލުވެރިންނާ ދެކޮޅަށް ދަތުރުފަތުރު ކުރުމުގެ ދަތިކުރުމުގެ ފިޔަވަޅުތައް އަޅާފައިވާ ކަމަށް އެމެރިކާއިން ބުނެފިއެވެ.
އެމެރިކާގެ ޚާރިޖީ ވަޒީރު އެންތޮނީ ބްލިންކެން ނެރުއްވި ބަޔާނެއްގައި ވިދާޅުވެފައިވަނީ، ދަތިކުރުމުގެ ފިޔަވަޅުތައް އަޅާފައި ވަނީ ޗައިނާގެ މަސްއޫލުވެރިންނަށް ކަމަށެވެ. އެފަރާތްތަކަކީ، ދީނީ އަދި ރޫހާނީ މަސައްކަތުގައި ހަރަކާތްތެރިވާ މީހުންނާއި ބައިމަދު ނަސްލުތަކުގެ މީހުންނާ ދެކޮޅަށާއި އިންސާނީ ހައްގުތަކަށް ވަކާލާތުކުރާ ފަރާތްތަކާ ދެކޮޅަށާއި ނޫސްވެރިންނާއި، ލޭބަރ އޯގަނައިޒަރުންނާއި، މަދަނީ ޖަމްއިއްޔާތައް އިންތިޒާމުކުރާ ފަރާތްތަކާއި އަދި ޗައިނާއާއި އެނޫންވެސް ސަރަހައްދުތަކުގައި ސުލްހަވެރި މުޒާހަރާކުރާ ފަރާތްތަކުގެ މަސައްކަތްތައް ހުއްޓުވައި އެމީހުންގެ ހަރަކާތްތަކަށް ހުރަސްއަޅާ މަސްއޫލުވެރީންނެވެ.
މިއީ، ޝިންޖިއާންގެ ހުޅަނގުގެ ސަރަހައްދުގައި އުއިގޫރު މުސްލިމުންނާ މެދު ޗައިނާއިން އަމަލުކުރަމުންދާ ގޮތުގެ އިތުރުން، ހޮންގްކޮންގްގައި ޑިމޮކްރަސީއަށް ތާއީދުކުރާ އެކްޓިވިސްޓުންނާއި، ޓިބެޓްގައި މިނިވަންކަމަށް ވަކާލާތުކުރާ އެކްޓިވިސްޓުންނާ މެދު ޗައިނާއިން އަމަލުކުރަމުންދާ ގޮތާ ދެކޮޅަށް އެމެރިކާ ސަރުކާރުން މީގެ ކުރިންވެސް ވިޒާ ދިނުމަށް އިންކާރުކޮށް އަޅާފައިވާ ފިޔަވަޅުތައް އިތުރަށް ހަރުކަށި ކުރުމަށް އަޅާ ފިޔަވަޅެކެވެ.
ބްލިންކެން ވިދާޅުވީ ލިބޭ އަނިޔާތަކާ ދެކޮޅަށް ބޭރު ގައުމުތަކުގައި ހިމާޔަތް ހޯދާ މީހުންނާއި އެމީހުންގެ ހައްގުގައި އަޑުއުފުލާ ފަރާތްތަކާއި ނަސްލީ އަދި ދީނީ ބައިމަދު މީހުންނަށް ފުރައްސާރަކޮށް، ބިރު ދައްކައި، ސުވާލުކޮށް، އެމީހުން ވަގަށް ނެގުމަށް ޗައިނާގެ މަސްއޫލުވެރިން ކުރާ މަސައްކަތްތަކަށް އެމެރިކާ އިން ދެކޮޅު ހަދާ ކަމަށެވެ.
އޭނާ ވިދާޅުވީ ދުނިޔޭގެ އެކި ކަންކޮޅުތަކުގައި އިންސާނީ ހައްގުތައް ދިފާއުކުރުމަށް އެމެރިކާ އޮތީ ތައްޔާރަށް ކަމަށާއި އަދި އިންސާނީ ހައްގަށް އަރައިގަންނަ ފަރާތްތައް ޖަވާބުދާރީކުރުވުމަށް ޑިޕްލޮމެޓިކް އަދި އިގްތިސާދީ ހުރިހާ ފިޔަވަޅުތަކެއްގެ ބޭނުންވެސް އެމެރިކާއިން އަބަދުވެސް ހިފާނެ ކަމުގައެވެ.
