ރަޝިޔާގެ ނޫހެއް ކަމަށްވާ ޕްރަވާޑާގައި ޝާއިއުކޮށްފައިވާ ރިޕޯޓެއްގައި ލިޔުންތެރިޔާ ލޮބޯވް ސްޓެޕުޝޯވާ ބުނެފައިވަނީ، ޔުކްރެއިންގެ ވެރިރަށުގައި އަވަށްޓެރި ގައުމުތަކުން ބާއްވާފައިވާ ބައްދަލުވުމުގައި ދައްކާފައިވާ ވާހަކަތަކުން ދޭހަ ވަނީ ޕޮލެންޑުން ތިން ވަނަ ބޮޑު ހަނގުރާމައެއް ފެށޭތޯ މަސައްކަތް ކުރަނީ ކަމަށެވެ.
ޔޫކްރެއިންގެ ވެރިރަށް ކިއޭވްގައި ރައީސް ވޮލޮޑިމީރް ޒެލެންސްކީއާ އެކު ޕޮލެންޑްގެ ބޮޑުވަޒީރު މެތިއުޒް މޮރާވިޗީއާއި، އޭނާގެ ނައިބު ޖަރޮސްލާވް ކަޒިންސްކީއާއި، ޗެކް ރިޕަބްލިކާއި ސްލޮވީނިއާގެ ރައީސް ޕީޓަރ ވިއާލާއާއި، ޔާނޭޒް ޖަންޗާ ވަނީ ބައްދަލު ވުމެއް ބާއްވާފައެވެ. މި ބައްދަލުވުމުގައި މި ބޭފުޅުން ހުށަހެޅުއްވީ ޔޫކްރެއިންގައި ސުލްހަ ބަލަހައްޓާ މިޝަނެއްގައި ނޭޓޯ ގެ ފައުޖުތައް ފޮނުވުމަށެވެ. މި ޚިޔާލަށް އެންމެ ބޮޑަށް ވާހަކަ ދެއްކެވީ ޕޮލެންޑްގެ ބޮޑުވަޒީރުގެ ނާއިބްއެވެ.
މި ވާހަކައަށް ރައްދު ދެމުން ރަޝިޔާ ސަރުކާރާ ގާތް ލިޔުންތެރިޔާ ލިޔެފައި ވަނީ މި ހުށަހެޅުމަކީ ބައިނަލްއަގްވާމީ ގާނޫނުތަކުގެ ނަޒަރިއްޔާއިން ބަލާއިރު، މުޅިން ބަލައިގަނެވޭނެ ކަމެއް ނޫން ކަމަށެވެ. އަދި މިފަދަ ނިންމުމުގެ ސަބަބުން ނޭޓޯއާއި ނޭޓޯގެ މެމްބަރު ގައުމުތައް ރަޝިއާއާ ސީދާ އަސްކަރީ ކުރިމަތިލުމެއްގައި ބައިވެރިވާން ޖެހިދާނެ ކަމުގެ އިންޒާރުވެސް އޭނާ ދިނެވެ.
ޕްރާވްޑާގައި ބުނެފައި ވަނީ ޕޮލެންޑަކީ ނޭޓޯގެ ފަރާތުން ވާހަކަ ދެއްކޭނެ ނޭޓޯގެ ތަރުޖަމާނެއް ނޫން ކަމަށެވެ. އަދި ރަޝިޔާއިން ސަރަހައްދުގެ ގެރެންޓީއަށް އެދިގެން ދައްކާ ވާހަކަތައް ނޭޓޯއަށް ފަހުމުވާކަމަށާއި އެކަން އެނގޭ ގޮތަކީ ކިއޭވްއިން ނޭޓޯއިން ދިފާއީ އެހީއަށް އެދުމުން އެކަމަށްވެސް ނޭޓޯއިން އިޖާބަދީފައި ނުވުމުން ކަމަށެވެ.
ކުރިން ރަޝިޔާގެ ބާރުގެ ދަށުގައި އޮތް ޕޮލެންޑަށް މަލާމާތް ކުރަމުން ޕްރާވްޑާއިން ބުނެފައި ވަނީ ޕޮލެންޑްގެ ސިޔާސީ ލީޑަރުންނަކީ ފޮނިކަނޑަން މޮޅު ބައެއް ކަމަށެވެ. އަދި އެމީހުންގެ ފޮނި ކެނޑުމުގެ ނަތީޖާއަކީ ގައުމު އިތުރަށް ބައިބައިވެ ބިންތައް ބީވެގެން ދިއުމެވެ. އަދި ހަތަރު ވަނަ ބުރަށް ޕޮލެންޑްގެ ބިންތައް ގެއްލެން ސިޔާސީ ލީޑަރުން ބޭނުން ވަނީތޯވެސް ވަނީ ޕްރާވްޑާއިން ވަނީ ސުއާލު ކޮށްފައެވެ.
