އަރަބި ލީގުން ޓެރަރިޒަމާ ދެކޮޅަށް ކުރާ މަސައްކަތާއި ތަފާތު ގިނަ ސަގާފަތަށް މަރުހަބާ ކިޔުމަށް އަރަބި ލީގުން ކުރަމުންދާ މަސައްކަތުގައި އިންޑިއާއިން އަބަދުވެސް ބައިވެރިވާނެ ކަމަށް އިންޑިއާގެ ފޮރިން ސެކްރެޓަރީ ހަރްޝް ވަރްދަން ޝްރިންގްލާ ވިދާޅުވެއެވެ.
ސަލާމަތީ މަޖިލީހުގައި ޝްރިންގްލާ މިފަދައިން ވާހަކަ ދެއްކެވިއިރު ގަލްފުގެ އެކި ގައުމުތަކުގައި ޓެރަރިޒަމްގެ މައްސަލަތައް މި ފަހަކަށް އައިސް އިތުރުވާކަން ފާހަގަ ވެފައި ވެއެވެ. އޭނާ ތަގްރީރު ކުރައްވާފައި ވަނީ ސަލާމަތީ މަޖިލީހާއި އަރަބި ލީގުފަދަ ސަރަހައްދީ ޖަމުއިއްޔާތަކާއެކު ގުޅުން ބަދަހި ކުރުމާ ބެހޭ ގޮތުންނެވެ.
ސަލާމަތީ މަޖިލީހުގެ ބައްދަލުވުމުގައި ތަޤްރީރު ކުރައްވަމުން ޝްރިންގްލާ ވިދާޅުވީ، ޢަރަބި ދުނިޔެއަކީ އިންސާނީ ތަހުޒީބު ފެށިގެން އައި ސަރަހައްދުކަމަށާއި އެތައް ހާސް އަހަރެއް ވަންދެން، ޢަރަބި ދުނިޔެއަކީ އިންސާނިއްޔަތަށް ޚިދުމަތް ކުރި ސަރަހައްދެއް ކަމަށެވެ. އޭނާ ވިދާޅުވީ އަރަބި ގައުމުތަކުގެ މައްސަލަތާ މެދު އަޅާފިޔަވަޅުތަކަކީ އޭގެ ސަބަބުން އެހެން ހިސާބުތަކަށްވެސް އޭގެ އަސަރު ކުރާނެ ކަންކަން ކަމަށެވެ. އަދި މިއީ ބައިނަލްއަގްވާމީ ސަލާމަތަށް އޭގެ ސަބަބުން އަސަރުކުރާނެ ކަންކަން ކަމަށެވެ.
ޝްރިންގްލާ ވިދާޅުވީ ޒަމާނީ ވިޔަފާރި މުއާމަލާތްތައް އުފެދުމުގެ މާކުރިން އިންޑިޔާ ކަނޑުގެ މަގުން އިންޑިޔާއާއި ޢަރަބި ސަރަޙައްދުގެ ވިޔަފާރި، އެތައް ސަތޭކަ އަހަރެއް ވަންދެން އިންޑިއާއާއެކު ގާއިމް ކޮށް ތަރައްގޫ ކުރެވިގެން ދިޔަ ކަމަށެވެ.
ޢަރަބި ގައުމުތަކުގައި 9 މިލިއަނަށްވުރެ ގިނަ އިންޑިއާ ރައްޔިތުން މިއަދު އެބަތިބިކަން ފާހަގަ ކުރައްވަމުން އަރަބި ގައުމުތަކާއެކު އިންޑިޔާއިން ފުޅާ ދާއިރާއެއްގައި ބާއްވާ ޕާޓްނަރޝިޕްގައި، ދަނޑުވެރިކަމާއި، ވިޔަފާރިއާއި، ތަޢުލީމުން ފެށިގެން ސާފު ހަކަތައާއި، ކައުންޓަރ ޓެރަރިޒަމާއި، އާ ޓެކްނޮލޮޖީގެ ހުރިހާ ކަމެއް ޝާމިލުވާ ކަމުގައި އޭނާ ވިދާޅުވެފައިވެއެވެ.
