ޗައިނާގެ ޚާރިޖީ ވަޒީރު މާދަމާ ނިއުދިއްލީއަށް މަޝްވަރާއަށް ވަޑައިގަންނަވާނެ ކަމަށް އިންޑިއާގެ މީޑިއާއިން ރިޕޯޓް ކުރެއެވެ. އިންޑިއާއާއި ޗައިނާއާ ދެގައުމުގެ ދެމެދުގެ ގުޅުން ހީނަރުވި ފަހުން އެންމެ މަތީ ފަންތީގެ ވަޒީރެއްގެ ފެންވަރުގައި މިފަދަ ދަތުރުފުޅެއްގެ ބޭނުމަކީ ކޮބައިކަން ދެ ފަރާތުން ވެސް ރަސްމީކޮށް ހާމަކޮށްފައެއް ނުވެއެވެ.
ޗައިނާގެ ގާތް އެކުވެރިއެއް ކަމަށްވާ ޕާކިސްތާނުގައި ބާއްވާ އޯގަނައިޒޭޝަން އޮފް އިސްލާމިކް ކޯޕަރޭޝަންގެ ކޮންފަރެންސެއްގައި ޚާރިޖީ ވަޒީރު ވާންގް ޔީ ވަނީ ބައިވެރިވެވަޑައިގެންފައެވެ. އެ ކޮންފަރެންސްގައި ކަޝްމީރުގެ މައްސަލާގައި އޭނާ ވާހަކަ ދެއްކެވުމުން އިންޑިއާއިން ވަނީ ވާން ޔީއަށް ނަމުން މުޚާތަކު ކުރަމުން ނުރުހުން ފާޅުކޮށް އެވާހަކަތައް ކުށްވެރި ކޮށްފައެވެ.
ވާންގ ޔީގެ މި ދަތުރުފުޅަކީ، ދެކުނު އޭޝިއާގެ ބައެއް ގައުމުތަކަށް ކުރައްވާ ދަތުރުފުޅެކެވެ. ހުކުރު ދުވަހު އޭނާ ނޭޕާލަށް ވެސް ވަޑައިގަންނަވާނެއެވެ.
ނަން ހާމަނުކުރުމަށް އެދި އިންޑިއާ ސަރުކާރުގެ މަސްދަރުން ބުނީ، ވަންގް އިންޑިއާގެ ޚާރިޖީ ވަޒީރު ސުބްރަމާނިއަމް ޖައިޝަންކަރާއި، ގައުމީ ސަލާމަތާބެހޭ މުޝީރު އަޖިތު ޑޯވަލްއާ ބައްދަލުކުރައްވާނެ ކަމަށް ބެލެވޭ ކަމަށެވެ. ނަމަވެސް މަޝްވަރާތަކުގެ އެޖެންޑާ ސާފުވެފައި ނުވާއިރު، ޔޫކްރެއިންގެ މައްސަލައާ ބެހޭ މަޝްވަރާތައް ކުރިއަށް ދާނެ ކަމަށް ލަފާ ކުރެވެއެވެ.
މިކަމާ ގުޅިގެން އިންޑިއާގެ ޚާރިޖިއްޔާއިން އަދި ވަކި އެއްޗެއް ހާމަކޮށްފައެއް ނުވާއިރު ބުދަ ދުވަހު ބޭއްވި ޑެއިލީ ނިއުސް ބްރީފިންގައި ޗައިނާގެ ޚާރިޖިއްޔާގެ ތަރުޖަމާނަކު ވިދާޅުވީ، މިކަމުގައި އޭނާ ހާމަ ކުރާނެ އެއްވެސް މައުލޫމާތެއް ނެތް ކަމަށެވެ.
ބުދަ ދުވަހު ޓްވިޓާގައި ޗައިނާއިން އިންޑިއާއަށް ކަނޑައަޅުއްވާފައި ހުންނަވާ ސަފީރު ހިއްސާކުރެއްވި އިންޑޯ ޗައިނާ ގުޅުމާ ބެހޭ ކުއާޓާލީ ބުކްލެޓްގައި ސަން ވެއިޑޮންގް ވިދާޅުވީ، ނިއުދިއްލީއާއެކު އޮންނަ ގުޅުން އަލުން އިޔާދަކުރުމަށް ބެއިޖިންއިން ޝައުގުވެރިވާ ކަމަށެވެ.
