ޒަމާނީ ހަނގުރާމަތަކަކީ ޓެންކޮލޮޖީއާއި ލައިގެން ކުރެވޭ ހަނގުރާމައަކަށް ވެގެންދާއިރު، ދެމެހެއްޓެނިވި ގޮތެއްގައި އަދި ރައްކާތެރި ވިއުގައެއްގައި މުވާސަލާތު ކުރުމަކީ މުހިންމު ކަމެކެވެ. އިންޑިއާއިން އަމާޒު ހިފާފައި ވަނީ ކުރިއަށް އޮތް ދެތިން އަހަރުގެ ތެރޭގައި ގިނަ ސެޓެލައިޓްތަކެއް ލޯންޗް ކުރުމަށް ކަމަށް ދިފާއީ އަދި ސަލާމަތީ ކަންކަން ބަލަހައްޓާ އިދާރާގެ މަސްދަރުތަކުން މައުލޫމާތު ދެއެވެ.
އިންޑިއާ ސިފައިން ޖައްވަށް ފޮނުވަން ބޭނުންވާ މި ސެޓެލައިޓްތަކަކީ ހަމައެކަނި މުވާސަލާތު ކުރުމަށް ހާއްސަ ސެޓެލައިޓްތަކެއް ނޫނެވެ. ނަމަވެސް މި ސެޓެލައިޓްތަކުގެ ސަބަބުން އިންޑިއާގެ ބޯޑަރުގައި ތާއަބަދު ފޯރި މަރަމުންވެސް ގެންދެވޭނެ ކަމަށްވެސް އެ ގައުމުން ބުނެއެވެ.
ޑިފެންސް މިނިސްޓަރ ރާޖްނާތު ސިން ރިޔާސަތު ބެލެހެއްޓެވި އިންޑިއާ ސިފައިނަށް ވަސީލަތްތައް ގަތުމަށް ނިންމާ ކައުންސިލުން ވަނީ، ސިފައިން ބނާ ކުރާ ޖީސެޓް 7ބީ ގެ ސެޓެލައިޓަކީ ސިފައިން އެންމެ ޒަމާނީ، މަލްޓިބޭންޑް، މިލިޓަރީ ގްރޭޑްގެ ސެޓެލައިޓަކަށް ވެގެންދާނެކަމަށް ބުނެފައެވެ.
މި ސެޓެލައިޓް ވެގެންދާނީ ހަމައެކަނި ސިފައިން އެކަނި ބޭނުން ކުރާ ސެޓެލައިޓަކަށެވެ. އަދި މިއީ ހަނގުރާމައިގެ ހާލަތުގައި ރައްކާތެރި ވިއުގައެއް ކަމަށްވެސް ވެގެންދާނެއެވެ. މި ސެޓެލައިޓް ކުރިއަށް އޮތް ދެތިން އަހަރުގެ ތެރޭގައި ލޯންޗު ކުރެވޭނެ ކަމަށް ސިފައިން ބުނެއެވެ.
