އުތުރު ކޮރެއާގައި އިންސާނީ ހައްގުތަކާ ބެހޭ އދގެ ހާއްސަ ރެޕަޓުއާ ތޮމާސް އޮޖީއާ ކުއިންޓަނާ ވަނީ އުތުރު ކޮރެއާ ސަރުކާރުން ހިންގާ ސިޔާސީ ޖަލު ކޭމްޕްތައް ބަންދުކޮށް އެތަންތާނގައި ބަންދުކޮށްފައިވާ މީހުން މިނިވަން ކުރުމަށް ގޮވާލައްވާފައެވެ.
އޭނާ ވަނީ ދުނިޔޭގެ ބޮޑެތި ބާރުތަކުން ނިއުކްލިއަރ މައްސަލާގައި އުތުރު ކޮރެއާއާއެކު މަޝްވަރާތައް ބާއްވާއިރު ސިޔާސީ މީހުން ބަންދު ކުރާ ޖަލުތައް ބަންދު ކުރުމަށް މަޝްވަރާގައި ހިމެނުމަށްވެސް އެދިވަޑައިގެންފައެވެ.
ކުއިންޓަނާ ވިދާޅުވީ އުތުރު ކޮރެއާގެ "ކްވާންލީސޯ" ނުވަތަ ސިޔާސީ ޖަލުތަކަކީ އިންސާނިއްޔަތާ ހިލާފު ޖަރީމާތަކެއް ކަމަށެވެ. އަދި މި ޖަލުތަކުގައި މީހުންނަށް އަނިޔާ ކުރާކަމަށްވެސް އޭނާ ވިދާޅުވެއެވެ.
އުތުރު ކޮރެއާއިން ތަކުރާރުކޮށް ބުނެފައި ވަނީ ސިޔާސީ މީހުން ބަންދުކޮށްގެން އުޅޭ ޖަލުތަކެއް އުތުރު ކޮރެއާގައި ނުހުންނާނެ ކަމަށެވެ. އަދި މިއީ ހުޅަނގުގެ ބާރުތަކުން ކޮމިއުނިސްޓް ގައުމާ މެދު ގެންގުޅޭ ދެކޮޅުވެރި ސިޔާސަތެއްގެ ދަށުން އިންސާނީ ހައްގުތަކަށް ފާޑުކިއުމަށް ބޭނުންކުރަމުންދާ އުކުޅެއް ކަމަށް ޕިޔިންގޔަންގއިން ތުހުމަތުކޮށްފައި ވެއެވެ
