މެލޭޝިޔާ އެއަރލައިންސްގެ ފްލައިޓް އެމްއެޗް 17 ވައްޓާލާފައި ވަނީ ރަޝިޔާއިން ކަމަށް ނިންމުމާ ގުޅިގެން ރަޝިޔާއާ ދެކޮޅަށް ނެދަރލޭންޑްސް އާއި އޮސްޓްރޭލިއާގެ ސަރުކާރުން ދައުވާއެއް އުފުލައިފިއެވެ. ކެނެޑާގެ މޮންޓްރިއަލްގައި ހުންނަ އިންޓަނޭޝަނަލް ސިވިލް އޭވިއޭޝަން އޯގަނައިޒޭޝަން (އައިކާއޯ) އަށް މި މައްސަލަ ވަނީ ހުށަހަޅާފައެވެ.
މެލޭޝިއާގެ ފްލައިޓަކީ، 17 ޖުލައި 2014 ގައި އެމްސްޓަޑަމް އިން ކުއަލަލަމްޕޫރަށް ދަތުރުކުރަމުން ދިޔަ މަތިންދާ ބޯޓެކެވެ. ރަޝިޔާއިން ވަނީ ކެންބަރާއާއި ދަ ހޭގްއިން ރަޝިޔާއަށް ކުރާ ތުހުމަތުތައް ދޮގު ކޮށްފައެވެ. ބައިނަލްއަގުވާމީ ތަހުގީގަކުން ސާބިތުވެފައިވާ ގޮތުގައި، މެލޭޝިއާގެ ފްލައިޓް ވައްޓާލާފައިވަނީ، ރަޝިޔާގެ ސިފައިންގެ މަރުކަޒަކުން ޔޫކްރެއިންއަށް ފޮނުވާލި ބަކް މިސައިލް ސިސްޓަމެއް ބޭނުންކޮށްގެންނެވެ. ނެދަލޭންޑްސްގެ ސަރުކާރުން ބުނީ މި މައްސަލައިގެ ދައުވާ އުފުލާފައިވާ ވަގުތާއި ރަޝިޔާއިން ޔޫކްރެއިން ގައި ހަނގުރާމަ ފެށުމާ ގުޅުމެއް ނެތް ކަމަށެވެ.
މި ބޯޓުން ނެދަލޭންޑްސްގެ 196 މީހަކު ދަތުރު ކުރިއެވެ. އަދި ބޯޓުގައި ޖުމުލަ 298 މީހުން ތިއްބެވެ. އޮސްޓްރޭލިއާ ސަރުކާރުން ނެރުނު ބަޔާނެއްގައި ބުނެފައިވަނީ، ރަޝިޔާއިން ޔޫކްރެއިންއަށް އެއްވެސް އަސްލެއްނެތް އަދި ބޭއިންސާފުން އަރައިގަނެ، ރަޝިޔާގެ އަނިޔާވެރިކަން އިންތިހާއަށް އިތުރުކުރުމުން ދޭހަކޮށްދެނީ، ރަޝިޔާއިން ބައިނަލްއަގްވާމީ ގާނޫނުތަކާއި އދގެ ޗާޓަރާ ކަނޑައެޅިގެން ޚިލާފްވެފައިވާ ކަމަށެވެ. އަދި ރަޝިޔާގެ އުދުވާނުން ދޭހަކޮށްދެނީ ޔޫކްރެއިންގެ ސިޔާދަތާއި ވައިގެ ސަރަހައްދަށް ރަޝިޔާގެ ފުށުން ހުރި ނުރައްކާތެރި ކަމެވެ. މި ބޯޓުގައި މަރުވި މީހުންގެ ތެރޭގައި އޮސްޓްރޭލިއާގެ 38 ރައްޔިތަކު ވެސް ހިމެނެއެވެ.އެމްއެޗް 17 ވައްޓާލުމުގައި ރަޝިއާގެ ތިން މީހަކާއި ޔޫކްރެއިންގެ މީހަކު ބައިވެރިވާ ކަމަށް ބުނާ މައްސަލައަކާ ގުޅިގެން ނެދަލެންޑްސް އިން ވަނީ އެމީހުންގެ ޣައިރު ހާޒިރުގައި ޝަރީއަތްކޮށްފައެވެ. އަދި މި މައްސަލާގައި މި އަހަރުގެ ފަހުކޮޅު ހުކުމް ކުރާނެ ކަމަށް ލަފާކުރެވެއެވެ.
ޕްރޮސެކިއުޓަރުން ވަނީ މި މައްސަލާގައި ތުހުމަތު ކުރެވޭ މީހުންނަށް އުމުރު ދުވަހުގެ ޖަލު ހުކުމެއް އިއްވުމަށް އެދިފަ އެވެ.އައިކާއޯ އިން މިކަމުގައި ބަލާ އާ މައްސަލައަކީ، މި ހާދިސާގެ ޒިންމާ ދައުލަތުން އުފުލަންޖެހޭ ކަމަށް ނެދަރލެންޑްސްއާއި އޮސްޓްރޭލިއާއިން ބުނުމުން މި ހާދިސާއާ ގުޅޭ މަޝްވަރާތަކުން ރަޝިޔާއިން 2020ގައި ވަކިވުމަށް ނިންމި މައްސަލައެވެ.
