ޗައިނާގެ ލޯނުދޭ އެންމެ ބޮޑެތި ފަސް ބޭންކުން ބުނަނީ މި އަހަރު އެ ގައުމުގެ ލޯނު ދޭ ފަރާތްތަކަށް ގިނަ އުދަގޫތަކާ ކުރިމަތިލާން ޖެހޭނެ ކަމަށާއި އޭގެ ތެރޭގައި އާލަމީ ވަބާގެ ބަލިމަޑުކަމާއި ދުނިޔޭގެ ސިޔާސީ މަސްރަހުގެ ނުތަނަވަސްކަމާއި އަދި ޗައިނާގެ ރިއަލް އެސްޓޭޓް އިންޑަސްޓްރީގައި އުފެދިފައިވާ ހަލަބޮލިކަމުން ދިމާވާ ގޮންޖެހުންތައް ހިމެނޭ ކަމަށެވެ.
ދުނިޔޭގައި އެންމެ ބޮޑު އަދަދުން ލޯނު ދޭ އިންޑަސްޓްރިއަލް އެންޑް ކޮމާޝަލް ބޭންކް އޮފް ޗައިނާ (އައިސީބީސީ) އިން މިއަދު ނެރުނު އަހަރީ އާމްދަނީގެ ރިޕޯޓުގައި ބުނެފައި ވަނީ ޗައިނާގައި މުދަލާއި ޚިދުމަތަށް ޑިމާންޑް ދަށްވެ، ސަޕްލައި އަށް ބުރޫ އަރައި، މީހުންގެ އިގްތިސާދީ އުއްމީދުތައް ހީނަރުވެފައިވާ ކަމަށެވެ.
އެގްރިކަލްޗަރަލް ބޭންކް އޮފް ޗައިނާ ލިމިޓެޑް (އޭޖީބޭންކް) އިން ނެރުނު އަހަރީ ރިޕޯޓުގައި ވެސް އެކަމަށް އިޝާރާތްކޮށްފައިވެ އެވެ.
ޗައިނާގެ ބޭންކިން ދާއިރާއަށް ކުރިމަތިވެފައި ވަނީ ކުރިން ދިމާވެފައި ނުވާ ވަރުގެ އުދަނގޫ އަދި މާ ހަލަބޮލި ވިޔަފާރީގެ މާހައުލެއް ކަމަށް އެ ގައުމުގެ ދެވަނައަށް އެންމެ ބޮޑު ލޯނު ދޭ ކުންފުނި، ޗައިނާ ކޮންސްޓްރަކްޝަން ބޭންކް ކޯޕް (ސީސީބީ) އިންވެސް ބުނެފައި ވެއެވެ. އަނެއްކޮޅުން ޗައިނާ ބޭންކު އޮފް ކޮމިއުނިކޭޝަނުން ބުނެފައި ވަނީ ހިއްސާދާރުންނަށް މިއަހަރު ހިއްސާއަށް ފައިދާ ދެވިދާނެ ކަމާމެދުވެސް ޝައްކު އުފެދޭ ކަމަށެވެ.
