ސްރީލަންކާގައި ދުވާލަކު 10 ގަޑި އިރަށްވެސް ކަރަންޓު ކަނޑާލަން ޖެހިދާނެ ކަމަށް މީޑިއާއިން ބުނެއެވެ. ޑެއިލީ މިރަރ ނޫހަށް މަޢުލޫމާތު ލިބިފައިވާ ގޮތުގައި، އިންޖީނުގެތަކަށް ބޭނުންވާ ތެޔޮ އަވަހަށް ފޯރުކޮށް ނުދެވިއްޖެނަމަ، އަންނަ ހަފްތާއިން ފެށިގެން ދުވާލަކު 10 ގަޑިއިރަށްވުރެ ގިނައިރު ކަރަންޓް ކަނޑާލަން ޖެހުމަކީ އެކަށީގެންވާ ކަމެކެވެ.
އިއްޔެއާ ހަމައަށް ކެލަނިޓިސާ ޕަވަރ ޕްލާންޓްގެ މަސައްކަތްތައް މުޅިން ހުއްޓުމަކަށް އައިސްފައިވެއެވެ. މިކަމުގެ ސަބަބުން މިއަދުން ފެށިގެން ގިނަ ސަރަހައްދުތަކުން 10 ގަޑިއިރަށް ކަރަންޓް ކަނޑަމުން ގޮސްފައި ވެއެވެ.
އެހެން ޕްލާންޓްތައް ނިއްވާނުލުމަށްޓަކައި ސްރީލަންކާގެ ކަރަންޓާ ބެހޭ އިދާރާގެ މަސްއޫލުވެރިން ވަނީ ތެލުގެ ސަޕްލައި އަވަސް ކޮށްދިނުމަށް އެދިފައެވެ. އަދި ބޭނުންވާ މިންވަރަށް ތެޔޮ ފޯރުކޮށް ނުދެވިއްޖެ ނަމަ އަންނަ ހަފުތާއިން ފެށިގެން ކަރަންޓް ކަނޑާލާމިންވަރު 10 ގަޑިއިރަށް ވުރެ މައްޗަށް ދާނެ ކަމަށްވެސް ބުނެއެވެ.
މާޗް މަހުގެ 2 ވަނަ ދުވަހު ޑެއިލީ މިރަރ އިން ރިޕޯޓުކޮށްފައިވާ ގޮތުގައި މާޗް މަހުގެ 5 ވަނަ ދުވަހުގެ ނިޔަލަށް ކަރަންޓްގެ މައްސަލަ ހައްލުކުރައްވާނެ ކަމަށް ފިނޭންސް މިނިސްޓަރު ބާސިލް ރާޖަޕަކްސަ ވަނީ ކެބިނެޓްގައި ވިދާޅުވެފައެވެ.
ފާޑު ކިޔާ ފަރާތްތަކުން ބުނަނީ މި ވާހަކައަކީ އެއްވެސް ހަގީގަތެއް ނެތް ވާހަކަތަކެއް ކަމަށާއި މާޗް މަހުގެ ނިޔަލަށް ކަރަންޓް ކެނޑުން 10 ގަޑިއިރަށް އިތުރު ވެގެންދާނެ ކަމަށެވެ.
ސްރީލަންކާގައި 10 ގަޑިއިރަށް ކަރަންޓް ކަނޑާލާނެ ވާހަކަ ތަކުރާރުކޮށް ޑެއިލީ މިރަރ އިން މިދިޔަ ހަފްތާގައި ލިޔަމުން ދިޔައިރު، ސްރީލަންކާގެ ޕަބްލިކް ޔުޓިލިޓީސް ކޮމިޝަނުން ވަނީ އެކަން ދޮގުކުރުމަށް އަވަސްވެގަނެ، ސިލޯން ޕެޓްރޯލިއަމް ކޯޕަރޭޝަން (ސީޕީސީ) އިން ޕަވަރ ޕްލާންޓްތަކަށް އެކަށީގެންވާ ޑީސަލް ސަޕްލައި ކޮށްދޭނެ ކަމުގެ ޔަގީންކަން ދީފައިވާ ކަމަށް ބުނެފައެވެ. އަދި މި ގޮތަށް ހަމަޖެހިގެންދިއުމުން ދުވާލަކު 10 ގަޑިއިރަށް ކަރަންޓް ކަނޑާލަން ނުޖެހޭނެކަމަށްވެސް ވަނީ ބުނެފައެވެ.
