ރަޝިޔާ ސިފައިން ވަންނަ ޔުކްރެއިންގެ ސަރަހައްދުތަކުން މަސްއޫލުވެރިން ވަގަށް ނަގައި ޖަލަށްލާ ކަމަށް ތުހުމަތުކޮށްފިއެވެ. ރަޝިޔާގެ މީޑިއާ ރިޕޯޓްތައް ބުނާގޮތުން ރަޝިޔާ ސިފައިން ވަނީ ޔޫކްރެއިންގެ ސްޓޭޓް ސެކިއުރިޓީ އިދާރާގެ އިސް މަސްއޫލުވެރިއަކު ކިޔޭވް ސަރަހައްދުގައި ހިފަހައްޓާފައެވެ. މި ހަނގުރާމައިގައި ޔޫކްރެއިންގެ އެތައް ހާސް އޮފިޝަލުންނާއި، ނޫސްވެރިންނާއި، އެކްޓިވިސްޓުން ރަޝިޔާއިން ވަގަށް ނަގައި އަދި ބައެއް މީހުން ނިޒާމުން ގެއްލުވާލައި ނެތިކޮށްލާފައިވާ ކަމަށް އދން ބުނއެވެ.
އދގެ އިންސާނީ ހައްގުތަކާބެހޭ އޮފީހުން ބުނަނީ މީގެ މަހެއްހާ ދުވަސް ކުރިން ރަޝިޔާއިން ޔުކްރެއިންއަށް އަރި ޖަރީމާ ހިންގަން ފެށި ފަހުން ޔޫކްރެއިންގެ 22 އޮފިޝަލަކު ނުހައްގުން ޖަލަށްލާފައިވާ ކަމަށެވެ. މި ކަމާ ގުޅޭ ލިޔެކިޔުންތައް ލިބިފައިވާ ކަމަށާއި، އޭގެ ތެރެއިން 13 މީހަކު ފަހުން ދޫކޮށްލާފައިވާ ކަމަށެވެ.
ޔޫކްރެއިންގެ ދެކުނުގެ ސިޓީއެއް ކަމަށްވާ މެލިޓޯޕޯލްގެ މޭޔަރު އިވާން ފެޑޯރޯވް ވަގަށް ނަގައިގެން ރަޝިޔާ ސިފައިން ގެންދިޔައެވެ. އޭނާ މިނިވަން ކުރުމުގެ ކުރިން އެތައް ދުވަހެއް ވަންދެން ޖަލުގައި ބަންދުކޮށްފައި ބެހެއްޓިކަމަށް ޔޫކްރެއިންގެ ކަމާބެހޭ ފަރާތްތަކުން ބުނެއެވެ. ޔޫކްރެއިންގައި ހުންނަ އދގެ ހައްގުތަކާބެހޭ އޮފީހުގެ މަންދޫބު މެޓިލްޑާ ބޮގްނަރ ވިދާޅުވީ، މިއީ ރަޝިޔާ ފެޑެރޭޝަނުން ހިސާރުކޮށްފައިވާ ސަރަހައްދުތަކުގައި އާންމުކޮށް ރާވައިގެން ހިނގަމުންދާ ކަންތައްތަކެވެ. މިހާރު ހިނގަމުންދާ ހަމަނުޖެހުންތަކުގައި އެތައްހާސް އާންމުންނާއި، ހަނގުރާމަކުރަމުންދާ ދެ ފަރާތުގެ އަސްކަރީ މަސްއޫލުވރިންނާ ވެސް މިކަމުގައި ބައްދަލުކޮށްފައިވާ ކަމަށް ބުނެއެވެ.
މެޓިލްޑާ ބޮގްނަރ ވިދާޅުވީ، ހާލުގައި ޖެހިފައިވާ ދެކުނުގެ ޕޯޓް ސިޓީއެއް ކަމަށްވާ މަރިއުޕޯލްގައި މަރުވި ގިނަ މީހުންގެ ހަގީގަތް ހޯދުމަށް އިންސާނީ ހައްގުތަކާ ބެހޭ އޮފީހުން ނުކުޅެދިފައިވާ ކަމަށް އޭނާ ވިދާޅުވެއެވެ. އެ ސިޓީގައި މަރުވި މީހުންގެ އަދަދު 2،000 އަށް ވުރެ މައްޗަށް އަރާފައިވާއިރު، ކަމާ ބެހޭ ފަރާތްތަކުން ލަފާކުރާ ގޮތުގައި މިދިޔަ ހަފުތާގައި އާންމުން ހިޔާވަހިކަން ހޯދަމުންދިޔަ ތިއޭޓަރަކަށް ރަޝިޔާ ސިފައިން ވަނީ ބޮޑު ބަޑީގެ ހަމަލާއެއް ދީ 300 މީހުން މަރާލާފައެވެ.
