ޕާކިސްތާންގެ ބޮޑުވަޒީރު އިމްރާން ޚާން އަވަހާރަކޮށްލަން ރާވާފައިވާ ކަމުގެ މައުލޫމާތު އެގައުމުގެ ސަލާމަތީ އިދާރާތަކުން އާދީއްތަ ހާމަކޮށްފި ކަމަށް ޕާކިސްތާނުގެ އިންފޮމޭޝަން މިނިސްޓަރު ފަވާދު ޗޯދުރީ މިއަދު ވިދާޅުވެއްޖެއެވެ.
ޑޯން ނޫހުން ޗޯދުރީއާ ހަވާލާދީ ރިޕޯޓްކޮށްފައިވާ ގޮތުގައި މި ރިޕޯޓްތަކަށް ފަހު ސަރުކާރުގެ ނިންމުމާ އެއްގޮތަށް ޚާންގެ ސަލާމަތީ ކަންކަން ވަނީ ވަރުގަދަކޮށްފަ އެވެ.
މީގެ ކުރިން ޕާކިސްތާން ތަހްރީކޭ އިންސާފް (ޕީޓީއައި)ގެ ލީޑަރު ފައިސަލް ވައުދާ ވެސްވަނީ މިފަދަ ކަމެއް ހިނގަން އުޅޭ ކަމަށް މީގެ ހަފްތާއެއް ކުރިން ވިދާޅުވެފައެވެ.
ވައުދާ މިހެން ވިދާޅުވީ، އޭނާގެ ސަރުކާރު ވައްޓާލުމަށް ބޭރުގެ މަކަރުވެރި ރޭވުމެއް އުޅޭކަމުގެ ހެކި މާޗް 27 ވަނަ ދުވަހު ބޭއްވި ރެލީގައި ބޮޑުވަޒީރު ޚާން ދެއްކެވި ސިޓީފުޅަށްފަހުއެވެ.
