ޕާކިސްތާންގެ ބޮޑު ވަޒީރު އިމްރާން ޚާން ވެރިކަމުން ދުރުކުރުމަށް "ބޭރުގެ މަކަރުވެރި ރޭވުމެއް" ހިންގި ކަމަށް ބުނާ މައްސަލާގައި ވޮޝިންޓަންގެ ދައުރާ ބެހޭ ގޮތުން ބޮޑުވަޒީރު އިމްރާން ޚާން ދެއްކެވި ވާހަކަފުޅަށް ޕާކިސްތާނުގެ ނޫސްވެރިޔަކު ޝައްކު ކޮށްފިއެވެ. އެމެރިކާގެ ފަރާތުން ގައުމަށް ނުރައްކަލެއް ލިބިފައިވާނަމަ، އިސްލާމްއާބާދުގައި އޮތް އޯއައިސީގެ ބައްދަލުވުމުގައި އެމެރިކާއަށް ދައުވަތު ދިނީ ކީއްވެތޯ ނޫސްވެރިން ސުވާލު ކުރެއެވެ.
ޖިއޯ ނިއުސް ޕްރޮގްރާމް "ކެޕިޓަލް ޓޯކް" ގައި ސީނިއާ އެންކަރ ހާމިދު މީރް ސުވާލު ކުރީ އެމެރިކާއިން ޕާކިސްތާނަށް މިހާ ބޮޑު ނުރައްކަލެއް ކުރިމަތި ކުރަންވީ ކީއްވެގެން ހެއްޔެވެ؟ އަދި އެހެންވީނަމަ، މިދިޔަ މަހުގެ 21 ވަނަ ދުވަހު އިސްލާމްއާބާދުގައި އިމްރާން ޚާން ބޭއްވެވި އޯއައިސީ ކައުންސިލް އޮފް ފޮރިން މިނިސްޓާސް ކޮންފަރެންސަށް އެމެރިކާގެ އަންޑަ ސެކްރެޓަރީ އޮފް ސްޓޭޓް އުޒްރާ ޒެޔާއަށް ދައުވަތު އެރުވީ ކީއްވެގެންތޯ ސުވާލު އުފެދޭ ކަމަށްވެސް މީރް ބުނެއެވެ.
އޯއައިސީގެ މި ބައްދަލުވުމަށްފަހު ފޮރިން މިނިސްޓަރ ޝާހް މަޙްމޫދު ޤުރައިޝީ ގެ ޓުވީޓުގައި ވިދާޅުވެފައިވަނީ އެމެރިކާގެ އަންޑަރ ސެކްރެޓަރީއާއެކު ބިނާކުރަނިވި ބައްދަލުވުމެއް ބާއްވާފައިވާ ކަމަށެވެ. އަދި އޯއައިސީގެ ޚާރިޖީ ވަޒީރުންގެ ބައްދަލުވުމަށް ވަޑައިގަތުމަށް ކުރައްވާ ދަތުރުފުޅުގައި އެމެރިކާއާއި އޯއައިސީގެ ޤައުމުތަކުގެ މެދުގައި އިތުރަށް ގުޅުން ބަދަހިކުރުމަށް ބާރު އެޅިގެންދާނެ ކަމުގައިވެސް ވިދާޅުވެފައި ވެއެވެ.
ޕާކިސްތާނުން ވަނީ އެމެރިކާގެ އެމްބަސީއާ ވަގުތީ ގޮތުން ހަވާކލލުވެ ހުންނެވި ފަރާތް ފޮރިން މިނިސްޓްރީއަށް ހާޒިރުކޮށް އެމެރިކާގެ ބަސްމަގަކީ ޑިޕްލޮމެޓިކް ނޫން ބަސްމަގެއް ކަމަށް ބުނެ އިހުތިޖާޖު ކޮށްފައެވެ.
ޑިޕްލޮމެޓިކް ފަރާތްތަކުން ބުނާ ގޮތުގައި ބައިޑެންގެ ސަރުކާރު އައުމާއެކު ގޯސްވެފައިވާ ޕާކިސްތާން އެމެރިކާ ގުޅުން ދެން އިތުރަށް ގޯސްވެގެންދާނެ ކަމަށެވެ.
