އަފްޣާނިސްތާނުގެ އަންހެނުންނާ ބެހޭ ގޮތުން މިއަދު އެގައުމުން އައު ފަތުވާއެއް ނެރެފިއެވެ. ތާލިބާނުންގެ ސުޕްރީމް ލީޑަރު މިއަދު ނެރެފައިވާ ފަތުވާގައި ބުނެފައި ވަނީ އަންހެނުންނަށް އޮފީސްތަކުގައި މަސައްކަތް ކުރުން ނުވަތަ ގެއިން ބޭރަށް ނުކުތުން މަނާ ކުރާ ކަމަށެވެ.
ހައިބަތުالله އަޚުންދްޒާދާ ނެރެފައިވާ އަފްޣާނިސްތާނުގެ އަންހެނުންނަށް އަލަށް އަމަލު ކުރަން ޖެހޭ އަމުރުގައިވާ ގޮތުން އަންހެނުން އޮފީސްތަކުގައި މަސައްކަތް ނުކުރުމާއި ގެއިން ބޭރަށް ނިކުތުން މިއަދުން ފެށިގެން މަނާވީއެވެ.
މި ފަތުވާ ނެރުމުގެ އެއްދުވަސް ކުރިން ތާލިބާނުން ވަނީ ވޮއިސް އޮފް އެމެރިކާ ގައި ޚަބަރު ލިޔުމާއި ޚަބަރު ކިޔުމުގައި އަންހެނުން ބައިވެރި ވުމާއި ޓީވީ ސްޓޭޝަންތަކުގައި އަންހެނުން މަސައްކަތް ކުރުމަކީ ހަރާމް ކަމެއް ކަމަށް އިއުލާން ކޮށްފައެވެ.
ވޮއިސް އޮފް އެމެރިކާ އަފްޣާނިސްތާނުން ހިންގާ "ޓީވީ އަޝްނާ" އާއި އަންހެނުންގެ ޝޯއެއް ކަމަށްވާ "އީޓްސަލް" އަކީ މީހުންގެ މެދުގައި މަގްބޫލު ޕްރޮގްރާމުތަކެވެ.
މީގެ ކުރިން ތާލިބާނުން ވަނީ މަހުރަމަކާ ނުލައި އަންހެނަކު 45 މޭލަށް ވުރެ ދިގު މަސާފާއަކަށް ދަތުރު ކުރުމަކީ ހަރާމް ކަމެއްކަމަށް ބުނެ އެކަންވެސް މަނާކޮށްފަ އެވެ.
