ރަޝިއާގެ ސިފައިންގެ އެލީޓް ޔުނިޓެއްގެ އެތައް ބަޔަކު މަރުވެ، އެމީހުން ފަހަތަށް ޖެހެން ޔުކްރެއިން ސިފައިންނާއި ހަނގުރާމަވެރިން މަޖުބޫރުކޮށްފިއެވެ.
ރަޝިޔާ ސިފައިންނަށް ލިބޭ ގެއްލުންތަކަކީ ހާމަކުރާ ވާހަކަތަކެއް ނޫނެވެ. ނަމަވެސް އާއްމުކޮށް ލިބެން ހުރި މައުލޫމާތުގެ މައްޗަށް ބަލައި ބީބީސީން ވަނީ ރިޕޯޓެއް އެކުލަވާލާފައެވެ. މި ޔުނިޓުގެ ކުޅަދާނަ 39 މީހަކު ވަނީ މަރުވެފަ އެވެ.
މި މީހުންނަކީ ރަޝިޔާގެ ވައިގެ ސިފައިންގެ އިސްނެގުމާއެކު ބެލަރޫސްއިން ފުރައިގެން ޔޫކްރެއިންއަށް ދަތުރުކުރި ކޮލަމްގެ ބައެކެވެ. އެލީޓް ގްރޫޕް މަޝްހޫރުވެފައި ވަނީ "ވީޑީވީ" ގެ ރަމްޒު ނަމުންނެވެ.
ބެލަރޫސްއާ ދިމާއިން މިމީހުން ޔުކްރެއިންއަށް ވައްދާފައި ވަނީ ކިއޭވްއަށް މިސްރާބު ޖަހާ ގޮތަށް ކިއޭވް ކޮންޓްރޯލު ކުރާށެވެ. މިހާރު ލިބެން ހުރި ވީޑިއޯއިން ފެންނަނީ ޔޫކްރެއިންގެ ސްޕެޝަލް ފޯސަސްއިން ދިން ހަމަލާއަކަށްފަހު މިމީހުން (ވައިޑީވީގެ މީހުން) އުޅަނދުތައް ދޫކޮށް ގޮސްފައިވާ ތަނެވެ. އަދި އެމީހުންގެ އުޅަނދުތަކަށް ބޮޑެތި ގެއްލުމާ ކުރިމަތިލާން ޖެހިފައިވާ ތަނެވެ.
މި ޔުނިޓަކީ ރަޝިޔާގެ ސިފައިން ސްޕެޝަލް އޮޕަރޭޝަނަށް ހޮވާލާ ބައެކެވެ. މިދިޔަ މެއި މަހު އޮންލައިންކޮށް ޕޯސްޓްކުރި ވީޑިއޯއެއްގައި ޖެނެރަލަކު ވަނީ ވައިޑީވީ ޔުނިޓް ނުވަތަ 331 ވަނަ ޕެރަޝޫޓް ރެޖިމެންޓްގެ ސިފައިންނަކީ ރަޝިޔާގެ ސިފައިންގެ "އެންމެ މޮޅު" ޓީމު ކަމަށް ބުނެ ވާހަކަ ދައްކާފަ އެވެ. މި ޔުނިޓްގެ މީހުންނަކީ، ބޯލްކަން ސަރަހައްދާއި، ޗެޗްނިއާ، އަދި 2014 ވަނަ އަހަރު ޔޫކްރެއިންގެ ޑޮންބާސް ސަރަހައްދުގައި ރަޝިޔާއިން ހަމަލަތަކުގައި ހަރަކާތްތެރިވި މީހުންނެވެ. އަދި މޮސްކޯގައި ބާއްވާ ރެޑް ސްކޮޔަރ ޕެރޭޑްތަކުގައި މިމީހުން ގަވާއިދުން ބައިވެރިވެއެވެ.
މި ޓީމުގެ މީހުންނަކީ ކޮންޓްރެކްޓް އުސޫލުން މަސައްކަތް ކުރާ ޕްރޮފެޝަނަލް ބައެކެވެ.
