ޕާކިސްތާންގެ ގާނޫނު ހަދާ މަޖިލިސް އުވާލައި، ބޮޑުވަޒީރު އިމްރާން ޚާން ގާނޫނު އަސާސީގެ 224 ވަނަ މާއްދާގެ ދަށުން ވަގުތީ ގޮތުން މަގާމުގެ މަސްއޫލިއްޔަތުތައް އަދާކުރައްވަމުން ގެންދަވާ ގޮތަށް ހަމަޖައްސައިފިއެވެ. ޕާކިސްތާނުގެ ކުރީގެ މިނިސްޓަރ ފޮރ އިންފޮމޭޝަން އެންޑް ބްރޯޑްކާސްޓިންގ ޗައުދަރީ ފަވާދު ހުސައިން މިއަދު ވިދާޅުވީ، ފެޑެރަލް ކެބިނެޓްވެސް އުވާލާފައިވާ ކަމަށެވެ.
މިއަދު ބޭއްވި ޕާލަމެންޓްގެ ދަށުގޭގައި އިތުބާރު ނެތްކަމުގެ ވޯޓު އެޖެންޑާ ކުރުމަށްފަހު ޕާލަމެންޓްގެ ނައިބު ރައީސް ގާސިމް ސޫރީ ވަނީ ބޮޑުވަޒީރުގެ އިތުބާރު ނެތްކަމުގެ މައްސަލަ ބޭރުކޮށްލައިފައެވެ. އަދި މަޖިލިސްގެ ޖަލްސާތައް މެދު ކަނޑާލާފައެވެ. އިރުކޮޅަކުން ގައުމާ މުޚާތަބު ކުރައވައި އިމްރާން ޚާން ވިދާޅުވީ މަޖިލިސް އުވާލުމަށް ރައީސަށް ހުށަހަޅުއްވާފައިވާ ކަމަށެވެ.
ޕާކިސްތާންގެ ގާނޫނުއަސާސީ ބުނާ ގޮތުން 90 ދުވަހުގެ ތެރޭގައި އާންމު އިންތިޚާބު ބާއްވަން ޖެހެއެވެ.
