ސްރީލަންކާގެ ކެބިނެޓް އެއްކޮށް ރޭ އިސްތިއުފާ ދެއްވުމަސްފަހު މިއަދު އައު ހަތަރު ވަޒީރަކު އައްޔަން ކުރައްވައިފިއެވެ. ރައީސް ގޯޓާބަޔަ ރާޖަޕަކްސަގެ ކުރިފުޅުމަތީގައި އާ ހަތަރު ވަޒީރަކު މަގާމުގެ ހުވާ ކުރައްވާފައި މިވަނީ، ސިޔާސީ މަސްރަހު ވަރަށް ބޮޑަށް ނުތަނަވަސްވެފައިވާ ދަނޑިވަޅެއްގައި، މުޅި ވަޒީރުންގެ ކެބިނެޓް އިސްތިއުފާ ދެއްވިތާ ގަޑިއިރުތަކެއް ފަހުންނެވެ.
މާލީ ވަޒީރު ކަމުގެ މަގާމަށް އައްޔަން ކުރައްވާފައި ވަނީ ރައިސްގެ ކޮއްކޮގެ ބަދަލުގައި އަލީ ސަބްރީ (ފޮޓޯ) އެވެ. އަދި ފޮރިން މިނިސްޓަރގެ މަގާމު އަލުން ދެއްވާފއި ވަނީ ކުރިންވެސް އެމަގާމުގައި ހުންނެވި ޖީއެލް ޕީރިސް އަށެވެ.
އަލީ ސޮބްރީ ކުރިން ހުންނެވީ ޖަސްޓިސް މިނިސްޓަރގެ މަގާމުގައެވެ. ގާނޫނީ ވަކީލު އަލީ ސޮބްރީ ވަނީ، ސްރީލަންކާގެ ރައިސްގެ ގިނަ ގާނޫނީ މައްސަލަތަކުގައި އޭނާއަށް ވަކާލާތު ކޮށްދެއްވާފައެވެ.
މީގެ އިތުރުން އެޑިއުކޭޝަން މިނިސްޓަރު ކަން ދިނޭޝް ގުނަވަރުދަނަ އަށް އަދި ހައިވޭސް މިނިސްޓަރުކަން ޖޯންސްޓޯން ފެނާންޑޯއަށް ދެއްވާފައި ވެއެވެ. މި ބޭފުޅުން ވަނީ މިއަދު މަގަމުގެ ހުވައި ކުރައްވަފައެވެ.
