ޕާކިސްތާނުގައި ދުސްތޫރީ ކާރިސާއެއް ކުރިމަތިކޮށްފައި މިވަނީ، ޕާކިސްތާނުގައި ވެރިކަން ބަދަލުކުރުމަށް އެމެރިކާއިން އިދިކޮޅު ފަރާތްތަކާ ގުޅިގެން މަސައްކަތް ކުރަމުންދާ ކަމަށް ތުހުމަތު ކޮށެވެ. ޕާކިސްތާންގެ ޑޯން ނޫހުން މި މައްސަލާގައި ލިއެފައިވާ ކޮމެންޓްރީއެއްގައި ބުނެފައި ވަނީ ޕާކިސްތާންގެ ވަގުތީ ބޮޑު ވަޒީރު އިމްރާން ޚާން އަމިއްލަ އެދުންފުޅަށް ކުރައްވާ މަސައްކަތަކީ އެގައުމަށް ކުރައްވާ ބޭއިންސާފެއް ކަމަށެވެ. އިމްރާން ޚާންގެ ތުހުމަތުތައް ބިނާ ކުރައްވާފައި ވަނީ މި މަހުގެ 7 ވަނަ ދުވަހު އެމެރިކާގެ ވެރިރަށް ވޮޝިންޓަންގައި ޕާކިސްތާނާއި އެމެރިކާގެ މަސްއޫލުވެރިންނާ ދެމެދު ބޭއްވި ބައްދަލުވުމެއްގެ ނޯޓްތައް އަސާސަކަށް ބައްލަވައި ގެންނެވެ.
ނޭޝަނަލް އެސެމްބްލީ އުވާލުމަށް ރައީސަށް ދާދިފަހުން ލަފާދެއްވި ވަގުތީ ބޮޑުވަޒީރު އިމްރާން ޚާން ތުހުމަތު ކުރައްވާ ގޮތުގައި، މި ބައްދަލުވުމުގެ ނޯޓުތަކުގައި، ޕާކިސްތާނުގައި އިދިކޮޅު ޕާޓީތަކުން އެމެރިކާގެ ކަމާބެހޭ ފަރާތްތަކާ ގުޅިގެން، އޭނާގެ އިތުބާރު ނެތްކަމުގެ ވޯޓެއްގައި އޭނާ މަގާމުން ދުރުކުރުމަށް މަސައްކަތް ކުރާކަމުގެ ހެކި ތައް ވަނީ ހިމަނާފައެވެ. ނަމަވެސް އެމެރިކާ ސަރުކާރުން ވަނީ އެ ތުހުމަތުތައް ދޮގުކޮށްފައެވެ.
މަކަރުވެރި ރޭވުމެއްގެ ތުހުމަތުތައް ތަހްގީގު ކުރުމުގެ ބަދަލުގައި، ނުވަތަ އިތުބާރު ނެތްކަމުގެ މައްސަލައާ ކުރިމަތިލުމުގެ ބަދަލުގައި، ތަހްރީކޭ އިންސާފް ޕާޓީގެ ސަރުކާރުން ވަނީ ނޭޝަނަލް އެސެމްބްލީ އުވާލައި، ދުސްތޫރީ އަނދަވަޅަކަށް ދައުލަތް ވައްޓާލައިފަ އެވެ.
ޕާކިސްތާން ސުޕްރީމް ކޯޓުން މިހާރު ބަހުސް ކުރަމުން ދަނީ އިތުބާރު ނެތްކަމުގެ ވޯޓު ނެގުން ހުއްޓުވައި، އޭގެ ފަހުން ގާނޫނު ހަދާ މަޖިލީހުގެ ތިރިގެ، އުވާލުމަށް މަޖިލީހުގެ ނާއިބް ރައީސް ނިންމެވި ނިންމެވުމުގެ ގާނޫނީ ސައްހަކަމާ މެދުގައެވެ.
ޕާކިސްތާން ސަރުކާރުން ގެންގުޅޭ ތުހުމަތުތައް ބިނާ ކޮށްފައިވާ ޔައުމިއްޔާ ޕާކިސްތާންގެ ޚާރިޖީ ވުޒާރާއަށް ލިބުނީ މާޗް މަހުގެ 7 ވަނަ ދުވަހުއެވެ.
އޭގެ ފަހުން ޕާކިސްތާނު ސަރުކާރުން އާންމުކުރި ރަސްމީ ބަޔާންތައް ރިވިއުކުރުމުން ދޭހަކޮށްދެނީ، އެމެރިކާއާއެކު އިގްތިސާދީ މައްސަލަތަކާއި އަދި އެހެނިހެން ކަންކަމުގައިވެސް އެއްބާރުލުން ހޯދުމަށް ޕާކިސްތާނުން އެ ފަހުންވެސް އަމަލީ ގޮތުން މަސައްކަތް ކޮށްފައިވާ ކަމެވެ. ޕާކިސްތާނު ސަރުކާރުން ނެރެފައިވާ ޕްރެސް ރިލީސްތަކުން ދޭހަވާ ގޮތުގައި އެމެރިކާގައި އެމްބެސެޑަރުގެ މަސްއޫލިއްޔަތާ ހަވާލުވެވަޑައިގަތް އެމްބަސެޑަރ މަސްއޫދު ޚާންއަށް ދެއްވި މަޝްވަރާތަކުގައި އިމްރާން ޚާން އެއްވެސް ވަރަކަށް މިކަހަލަ ރޭވުމުގެ ވާހަކައަށް އިޝާރާތް ކުރައްވާފައި ނުވާކަމެވެ.
އިމްރާން ޚާން، މި މަހުގެ 14 ވަނަ ދުވަހު، އޭރުގެ ޚާރިޖީ ވަޒީރު ޝާހް މެހްމޫދު ޤުރައިޝީއާއެކު، އެމެރިކާއަށް ފޮނުއްވާ އެމްބަސެޑަރާ ބައްދަލު ކުރައްވައި ވާހަކަފުޅު ދައްކަވަމުން ވިދާޅުވީ، "ޕާކިސްތާނާއި އެމެރިކާގެ ގުޅުން ބިނާވެފައި އޮތީ ދެ ފަރާތުން ހިއްސާވާ ކަންކަމުގެ މައްޗަށް ކަމަށާއި އަދި ދެފަރާތުން އެއް ލަނޑު ދަނޑިތަކެއް ހިއްސާ ކުރުމުގެ މައްޗަށް" ކަމަށެވެ. އަދި، ދެޤައުމުގެ ގުޅުން އިތުރަށް ބަދަހިކުރެއްވުމަށް މަސައްކަތް ކުރެއްވުމަށް ވެސް އިމްރާން ޚާން އެމްބެސެޑަރު އަރިހުން އެދިވަޑައިގެންނެވިއެވެ.
އިމްރާން ޚާން އާއި އޭނާގެ ޚާރިޖީ ވަޒީރު އެމްބެސެޑަރަށް ދެއްވި މަޝްވަރާތަކުގައި ސަރުކާރު ވައްޓާލުމުގެ އެއްވެސް ރޭވުމެއް އުޅޭކަމުގެ އިޝާރާތެއް އިހުސާސެއް ނުކުރެވެއެވެ. މީގެ އެންމެ ޝައުޤުވެރިކަމަކީ، މި ބައްދަލުވުން ބާއްވާފައި ވަނީ ތުހުމަތު ކުރެވޭ މެމޯ ފޮރިން އޮފީހަށް ލިބުނުތާ މަދުވެގެން ހަފްތާއެއް ހާ ދުވަސް ފަހުން ކަމެވެ.
އެމެރިކާ ސަރުކާރާކާއި ޕާކިސްތާންގެ ގުޅުން ހީނަރުވެގެން ގޮސްފައިވާ އިރު ޕާކިސްތާންގެ އައު ސަފީރު މަސްއޫދު އޭނާގެ ސަފީރުކަމުގެ ފަތްކޮޅު އެމެރިކާގެ ރައީސް ބައިޑަންއަށް އެރުވުން އޮތީ އަދި މި މަހުގެ ފަހުކޮޅުގައެވެ.
މިހާރުވެސް އެމެރިކާގެ ގާނޫނު ހަދާ މަޖިލީހުގެ ތިން މެމްބަރަކު ވަނީ މަސްއޫދު ޚާންގެ ނަން ބަލައިނުގަތުމަށް ބައިޑަންގެ ސަރުކާރުގައި އެދިފައެވެ.
އެމެރިކާއިން ވަނީ ޕާކިސްތާނަށް އައު އެމްބެސެޑަރެއް ފޮނުވުމަށް ނިންމައި އެކަން ކަށަވަރުކޮށް އެފަރާތަށް ފަތްކޮޅު ހަވާލުކޮށްފައެވެ. އައު އެމްބެސެޑަރު ކަށަވަރު ކުރުމަށްފަހު އެމެރިކާގެ ޚާރިޖީ ވުޒާރާއިން ބުނެފައިވަނީ "ޕާކިސްތާނާއެކު ބައިވެރިވުމެއް އޮތުމަކީ ސަރަހައްދީ ސަލާމަތާއި، ވިޔަފާރިއާއި އިންވެސްޓްމަންޓާއި، މޫސުމީ ކާރިސާއާއި، އިންސާނީ ހައްގުތަކުގެ ރޮނގުން ކުރިއެރުމަށް މުހިންމު ކަމެއް" ކަމަށެވެ.
ހަޤީޤަތުގައިވެސް އިމްރާން ޚާންގެ ސަރުކާރާ ދެކޮޅަށް ބައިނަލްއަޤުވާމީ މަކަރުވެރި ރޭވުމެއްގައި އިދިކޮޅު ފަރާތްތައް ބައިވެރިވެފައިވާކަމަށް ޤަބޫލުކުރައްވާނަމަ، އޭނާގެ އެމްބަސެޑަރ އެމެރިކާގެ އޮފިޝަލުންނާ ބައްދަލުކުރެއްވުމުގެ ޔައުމިއްޔާތައް ދޫކުރައްވައި ވަށައިގެންވާ އެހެން ކަންތައްތަކަށް ތަހުގީގެއް ހިންގަވަން ޖެހެއެވެ. ޚާރިޖީ ގުޅުމުގެ ޔައުމިއްޔާތަކަކީ ސިޔާސީ މާލަމްތަކުގައި ބަހުސަކަށް ހަދަން ޖެހޭ އެއްޗެއް ނޫނެވެ.
މި މައްސަލާގައި ފެނިގެންދަނީ އެމްބަސީއަކާއި ފޮރިން މިނިސްޓްރީއާ ދެމެދު އާދައިގެ މަތިން ބަދަލު ކުރެވޭ ރަސްމީ މުއާމަލާތުތައް ކުރު މުއްދަތުގެ ސިޔާސީ މަންފާތަކެއް ހޯދުމަށް އަދި އެމެރިކާއާ ގުޅުން ހަލަބޮލި ކޮށްލުމަށް ޕާކިސްތާންގެ ގާނޫނު ހަދާ މަޖިލީހަށް ގެނަސްފައިވާ ތަނެވެ.
މިކަމުން އިމްރާން ޚާން އަމިއްލަ ފައިދާއަށް ކުރައްވާ މަސައްކަތުން ގެއްލުން ލިބޭނީ ހަމައެކަނި ޕާކިސްތާނުގެ އިޤްތިޞާދީ އަދި އިޖްތިމާޢީ މުސްތަޤްބަލަށް އެކަންޏެއް ނޫނެވެ. ޕާކިސްތާންގެ އަގާއި ޕާކިސްތާންގެ ސިޔާސީ ގުޅުމަށްވެސް ގެއްލުން ވަމުންދާ ތަން ދަނީ ފެންނަމުންނެވެ. (ޑޯން)
