ޕާކިސްތާން ރުޕީސްގެ އަގު އެކްސްޗޭންޖް މާކެޓްގައި މިއަދު ވެއްޓިގެން ދިއުމުން އެގައުމުގެ އެކްސްޗޭންޖް ކޮމްޕެނީސް އެސޯސިއޭޝަންގެ ޖެނެރަލް ސެކްރެޓަރީ ޒަފަރު ޕަރަޗާ ވިދާޅުވީ މިއަދަކީ "ޕާކިސްތާނުގެ ތާރީހުގައި ކަޅު ދުވަހެއް" ކަމަށެވެ.
އޭނާ ވިދާޅުވީ އިގްތިސާދީ ކާރިސާއަކަށް ދާއިރު ރުޕީސްއަށް ބާރު ބޮޑު ވެފައިވާ ކަމަށެވެ. އަދި ޕާކިސްތާންގެ "ސިޔާސީ މަސްރަހު ގޯސްވުމުން ފައިސާގެ ބާޒާރު ދަނީ ހީނަރުވަމުން." ކަމަށް އޭނާ ވިދާޅުވިއެވެ.
މީގެ އިތުރުން ޕަރަޗާ ވިދާޅުވީ އިންޓަނޭޝަނަލް މަނިޓަރީ ފަންޑްގެ ލޯނު ވަގުތީ ގޮތުން ހުއްޓާލުމާ ގުޅޭ ޚަބަރުތަކުން ބާޒާރު އިތުރަށް ހަލަބޮލި ވެގެން ހިނގައްޖެ ކަމަށެވެ.
ޕާކިސްތާންގެ އިގްތިސާދީ ހާލަތުގެ ސަބަބުން ރުޕީސްއަށް ޕްރެޝަރު ދަނީ ބޮޑު ވަމުންނެވެ. ފައިނޭންޝަލް ޑޭޓާ އެންޑް އެނަލިޓިކްސް ޕޯޓަލްއެއް ކަމަށްވާ މެޓްސް ގްލޯބަލް އިން ބުނި ގޮތުގައި މާޗް މަހުގެ 8 ވަނަ ދުވަހުން ފެށިގެން ގާނޫނު ހަދާ މަޖިލީހުގައި އިތުބާރު ނެތް ކަމުގެ މައްސަލަ ހުށަހެޅި ހިސާބުން ރުޕީސްގެ އަގު ވަނީ 3 ޕަސަންޓަށް ވެއްޓެން ފަށާފައެވެ.
