ސޮލަމަން އައިލެންޑްސްގައި ވެސް އަދި ސަރަހައްދުގެ ގައުމުތަކުން ދެކޮޅު ހަދަމުން ދިއުމާއެކުވެސް ސޮލޮމޮން އައިލެންޑްސްއިން ވަނީ ޗައިނާއާއެކު ސަލާމަތީ އެއްބަސްވުމެއްގައި ސޮއިކޮށްފައެވެ. ޕެސިފިކް ސަރަހައްދުގެ އަވަށްޓެރިން ދެކޭ ގޮތުގައި މި އެއްބަސްވުމަކީ މުސްތަގުބަލުގައި ސޮލޮމޮން އައިލެންޑްސްގައި ޗައިނާގެ ސިފައިން ހަރަކާތްތެރިވުމަށް ހުޅުވިގެންދިޔަ ދޮރަކަށް ވެގެންދާނެއެވެ.
މިދިޔަ މަހުގެ 30 ވަނަ ދުވަހު ޗައިނާ ސަފީރު ލީ މިންގް އާއި ސޮލޮމަން އައިލެންޑްސްގެ ފޮރިން މިނިސްޓްރީ އެންޑް އެކްސްޓާނަލް ޓްރޭޑްގެ ޕާމަނަންޓް ސެކްރެޓަރީ ވަނީ ފްރޭމްވޯކް އެގްރީމެންޓެއްގައި ސޮއިކުރައްވާފަ އެވެ. މީގެ ކުރިން މި އެއްބަސްވުމުގެ ޑްރާފްޓް ލީކުވުމުގެ ސަބަބުން އޮސްޓްރޭލިއާ އާއި ނިއުޒިލެންޑް ފަދަ ގައުމުތަކުގެ މެދުގައި ވަނީ މި ކަމާ މެދު ނުތަވަސްކަން އިތުރު ވެގެން ގޮސްފައެވެ. އެހެން ނަމަވެސް، ޗައިނާ އެމްބަސީގެ ޕްރެސް ރިލީޒެއްގައި ބުނެފައި ވަނީ މިނިވަން އަދި މުސްތަގިއްލު ދެ ގައުމުގެ ހައިސިއްޔަތުން ޗައިނާ އާއި ސޮލޮމޮން އައިލެންޑްސް އަކީ ހަމަހަމަކަމާއި އިހްތިރާމާއި އެއްގައުމުން އަނެއް ގައުމަށް ލިބޭ ފައިދާގެ މައްޗަށް ބިނާކޮށް، އާންމު އުސޫލުން ގާނޫނު ތަންފީޒު ކުރުމާއި ސަލާމަތީ ކަންކަމުގައި އެއްބާރުލުން ދިނުމަށް އަހައްމިއްޔަތުކަން ދޭ ދެ ގައުމު ކަމަށެވެ. އަދި މި ދެ ގައުމަކީ ބައިނަލްއަގުވާމީ ގާނޫނުތަކާއި އާދަކާދަތަކަށް އަހުލުވެރި ދެ ގައުމުކަމަށްވެސް ބުންޏެވެ.
ޗައިނާ އެމްބަސީން ބުނީ މި އެއްބަސްވުމުގެ ސަބަބުން ކާރިސާތަކަށް އިޖާބަދިނުމާއި، އިންސާނީ އެހީއާއި، ތަރައްގީގެ އެހީ އާއި އިޖުތިމާއީ ހަމަޖެހުން ދެމެހެއްޓުން ފަދަ ދާއިރާތަކުން ދެގައުމުގެ ގުޅުން އިތުރަށް ބަދަހިވެ، އަދި އާދަޔާ ޚިލާފް ނޮން ޓްރެޑިޝަނަލް ސެކިއުރިޓީ ޗެލެންޖްތަކަށް ހައްލު ހޯދުމަށް ދެގައުމުގެ ދެމެދުގައި އެއްބާރުލުން އިތުރުކުރެވިގެން ދާނެ ކަމަށެވެ.
ޕެސިފިކް ސަރަހައްދުގެ ގިނަ ގައުމުތަކުން ޗައިނާ ސިފަކުރަނީ ސަލާމަތަށް އޮތް ބޮޑު ނުރައްކަލެއްގެ ގޮތުގައެވެ. މި ވާހަކަތަކަށް ޗައިނާއިން ބުނެފައި ވަނީ މިއީ އެގައުމުގެ އަގު ވައްޓާލުމަށް ފަތުރަމުންދާ ދޮގު ވާހަކަތަކެއް ކަމަށެވެ.
ޗައިނާ އެމްބަސީން ބުނެފައި ވަނީ މި އެއްބަސްވުމުގެ ސަބަބުން ޕެސިފިކްގައި ސަލާމަތާއި ރައްކާތެރިކަން ކަށަވަރު ކުރެވޭނެކަމަށެވެ. މިއާ ޚިލާފަށް 2021 ވަނަ އަހަރު ނިއުޒީލަންޑުން ތައްޔާރު ކުރި ދިފާއީ އެސެސްމަންޓުގައި، އެ ސަރަހައްދަށް ކުރިމަތިވެދާނެ އެންމެ ނުރައްކާ ބޮޑު ކަންކަމުގެ ތެރޭގައި، މިފަދަ ބާރަކުން ވަދެގަތުން ފާހަގަ ކޮށްފައި ވެއެވެ. ނިއުޒީލެންޑުން ގަބޫލު ކުރާ ހަމަތަކާއި، އެގައުމުގެ ސަލާމަތީ މަސްލަހަތުތައް ހިއްސާ ނުކުރާ ބޭރުގެ ދައުލަތަކުން ޕެސިފިކް ކަނޑުގައި އަސްކަރީ މަރުކަޒެއް ނުވަތަ އެފަދަ ކަމަކަށް ބޭނުން ކުރެވިދާނެ އެހެން ފެސިލިޓީއެއް ގާއިމް ކުރުމުގެ ނުރައްކާ މީގައި ހިމަނާފައި ވެއެވެ. މިފަދަ ކަމެއް ކުރިމަތި ވެއްޖެނަމަ، ސަރަހައްދުގެ ސްޓްރެޓީޖިކް ބެލެންސަށް ބަދަލު އަންނާނެ ކަމަށްވެސް ބުނެފައި ވެއެވެ. އަދި، ބޭރުގެ ގައުމަކުން ވަދެގެނފިނަމަ، ޕެސިފިކް ކަނޑުގެ ޤައުމުތަކުގެ އިންފްރާސްޓްރަކްޗަރގެ ބޭނުން ހިފުމަށް ފުރުސަތު ލިބުމުގެ އިތުރުން، މިފަދަ އަސްކަރީ މަރުކަޒެއްގެ ސަބަބުން، މި ސަރަޙައްދުގެ ތެރޭގައި ޙަރަކާތްތެރިވުމުގެ ޤާބިލުކަން އިތުރުވެ، ނިއުޒިލޭންޑުގެ މަޞްލަޙަތަށް ބުރޫއަރާފަދަ ކަންކަން ކުރުމަށް އިތުރު ބާރެއް ލިބިގެންދާނެކަމުގައިވެސް ބުނެފައި ވެއެވެ.
ޗައިނާއާއެކު ސޮލޮމަން އައލެންޑްސްއިން ސޮއިކޮށްފައިވާ މި ފްރޭމްވަރކް އެގްރީމަންޓްގައި ސޮއިކުރެވުމުން، މިފަދަ މަރުކަޒެއް ވަރަށް ރަނގަޅަށް ޙަޤީޤަތަކަށް ވެގެން ދިޔައީކަމަށް ނިއުޒިލެންޑުން ދެކެއެވެ.
މީގެ ކުރިން ދެ ގައުމުން ސޮއިކުރަން އުޅޭ ކަމަށް ބުނެ، ލީކުވެފައިވާ ޑްރާފްޓްގައިވާ އިބާރާތްތަކަކީ ނުރައްކާތެރި ވާހަކަތަކެކެވެ. އޭގައިވާ ގޮތުން "ސޮލޮމޮން އައިލެންޑްސް، އެ ޖަޒީރާތަކުގެ ބޭނުންތަކާ އެއްގޮތަށް، އިޖުތިމާއީ ހަމަޖެހުން ދެމެހެއްޓުމަށާއި، ރައްޔިތުންގެ ފުރާނައާއި މުދާ ރައްކާތެރިކުރުމަށާއި، އިންސާނީ އެހީ ފޯރުކޮށްދިނުމަށާއި، ކާރިސާތަކަށް އިޖާބަ ދިނުމަށް، ނުވަތަ ދެފަރާތުން އެއްބަސްވެފައިވާ އެހެނިހެން މަސައްކަތްތަކަށް އެހީތެރިކަން ފޯރުކޮށްދިނުމަށް، ފުލުހުންނާއި، ހަތިޔާރު އެޅި ފުލުހުންނާއި، ސިފައިންނާއި، ގާނޫނު ތަންފީޒުކުރާ އެހެނިހެން ސިފައިންނާއި، ސިފައިންގެ ފައުޖުތައް ސޮލޮމޮން އައިލެންޑްސްއަށް ފޮނުވުމަށް ޗައިނާ ގާތުން އެދިދާނެއެވެ."
މީގެ އިތުރުން ޗައިނާގެ އަމިއލަ ބޭނުންތަކަށް ސޮލޮމޮން އައިލެންޑްސްގެ ރުހުމާއެކު، ސޮލޮމޮން އައިލެންޑްސްގައި ލޮޖިސްޓިކް މަސައްކަތްތައް ކުރިއަށް ގެންދިއުމަށާއި، ސޮލޮމޮން އައިލެންޑްސްގައި މަޑުކުރުމަށް ޗައިނާގެ ސިފައިންނަށް ތިބެވިދާނެ ކަމަށްވެސް ބުނެފައި ވެއެވެ. އަދި ސޮލޮމޮން އައިލެންޑްސްގައި ހިންގާ ބޮޑެތި މަޝްރޫޢުތަކުގެ ސަލާމަތާއި ރައްކާތެރިކަމަށްޓަކައި، ޗައިނާގެ ސިފައިން ބޭނުންކުރެވިދާނެ ކަމުގައި ވެސް އޭގައި ބުނެފައި އޮތެވެ.
އަދި ސޮލޮމަން އައިލެންޑްސްއިން ޗައިނާގެ އެހީއަށް އެދިއްޖެނަމަ، އަދި ޗައިނާއިން އެހީވާން އެއްބަސްވާ ހިނދެއްގައި ސޮލޮމޮން އައިލެންޑްސްއިން ބޭނުންވާ ހުރިހާ ވަޞީލަތްތަކާއި އެހީތެރިކަން ފޯރުކޮށްދޭންވާނެ ކަމަށާއި އޭގެ ތެރޭގައި މީހުން އެތެރެކުރުމާއި، ހަތިޔާރާއި، އިންޓެލިޖެންސާއި، އިންފޮމޭޝަން ސަޕޯޓާއި، ލޮޖިސްޓިކް ސަޕޯޓާއި، ޤާނޫނީ ހައިސިއްޔަތާއި، ޗައިނާގެ ފަރާތްތައް ސޮލޮމަން އައިލެންޑްސްގެ ގާނޫނުން އިސްތިސްނާކުރުން ހިމެނޭކަމަށްވެސް ބުނެފައި އޮތެވެ. އަދި މިފަދަ ކަމެއްގެ ހޭދަ ހަމަޖައްސާނީ ދެފަރާތުގެ މަޝްވަރާގެ މަތިން ކަމަށާއި މިއެއްބަސްވުމުގެ ފުރަތަމަ މުއްދަތަކީ ފަސް އަހަރު ދުވަސް ކަމަށާއި، ދެ ފަރާތުން ކުރެ އެއްވެސް ފަރާތަކުން މި އެއްބަސްވުން އުވާނުލާހާ ހިނދަކު އިތުރު ފަސް އަހަރުގެ މުއްދަތަށް އޮޓަމެޓިކުން މުއްދަތު އިތުރު ކުރެވިގެން ދާނެ ކަމަށްވެސް ބުނެފައި ވެއެވެ.
މި އެއްބަސްވުމުގެ ސަބަބުން ޗައިނާއަށް ޕެސިފިކް ކަނޑުގެ ބޮޑު ސަރަހައްދެއްގައި ފައިތިލަ ސާބިތު ކުރުމަށް ފުރުސަތު ލިބިގެން ދިޔައީ ކަމަށް ބެލެވެއެވެ.
މި އެއްބަސްވުމުގެ ނުރައްކާތެރިކަމުގެ މިސާލަކީ، 2021 ވަނަ އަހަރުގެ ނޮވެމްބަރު މަހުގެ ސޮލޮމަން އައިލެންޑްސްގައި އުފެދުނުފަދަ އިޖުތިމާއީ ހަމަނުޖެހުމެއް އަނެއްކާވެސް ހިނގައިފިނަމަ، ބޮޑުވަޒީރު މަނަސެހް ސޮގަވަރޭގެ ސަރުކާރަށް ޗައިނާގެ ފުލުހުންނާއި، ސިފައިން އަދި، ޕަބްލިކް ސެކިއުރިޓީ ބިއުރޯ ނުވަތަ ޕީޕަލްސް ލިބަރޭޝަން އާމީގެ ފައުޖުގެ އެހީތެރިކަމަށް އެދެވިދާނެއެވެ.
ޗައިނާއާއެކު ސޮއިކުރާ އެއްބަސްވުމުގައި އަސްކަރީ މަރުކަޒެއްގެ ވާހަކަ ކަނޑައެޅިގެން ބަޔާންކޮށްފައި ނެތް ނަމަވެސް ލޮޖިސްޓިކަލް ސަޕޯޓާ ބެހޭ ގޮތުން މި ޑޮކިއުމެންޓްގައި ވާހަކަ ދެކެވިފައިވާއިރު މިއީ ސިފައިން ބޭތިއްބުމަށް ފުރުސަތު ދިނުން ކަމަށް ބެލެވެއެވެ. އަދި އެފަދަ ހާލަތަކަށް ގޮސްފިނަމަ، އެތަނެއް ވެގެން ދާނީ ޗައިނާ ސިފައިން ބައިތިއްބާފައި ތިބޭ ޖިބޫޓީގައި ޗައިނާއިން ހަދާފައިވާ މަރުކަޒާ އެއްފަދަ ތަނެއްގެ ގޮތުގައެވެ. އެއިރުން އެފަދަ ތަނަކަށް ޗައިނާގެ މަނަވަރުތަކުން އާދަވެގެން ދަތުރުކޮށް ހަދާނެއެވެ.
