އިނގިރޭސިވިލާތުގެ އެންމެ ބޮޑު ސެމީކޮންޑަކްޓަރ އުފައްދާ ކުންފުނި ޗައިނާގެ ކުންފުންޏަކުން ގަންނަން އުޅޭ މައްސަލާގެ ތަހުގީގެއް އިނގިރޭސިވިލާތުން ކުރިއަށް ނުގެންދާކަމަށް ބުނެ، ބޮޑު ވަޒީރު ބިރިން ޖޯންސަންއަށް ތުހުމަތުކޮށްފިއެވެ.
ވޭލްސްގެ ނިއުޕޯޓް ވެފަރ ފެބް ޕްލާންޓް ޗައިނާގެ އެންމެ ބޮޑު ސްމާޓްފޯން އެސެމްބްލީ ވިންގްޓެކް ކުންފުނީގެ ނެދަލޭންޑްސްގެ ސަބްސިއަޑަރީ ކުންފުންޏަށް ސިއްރުސިއްރުން ވިއްލާލާފައިވާ ކަމުގެ ރިޕޯޓްތައް އިނގިރޭސިވިލާތުގައި ވަނީ ފެންމަތިވެފައެވެ.
މީޑިއާ ރިޕޯޓްތައް ބުނާ ގޮތުން ނެދަރލެންޑްސްގެ ނެކްސްޕީރިއާއަށް އިނގިރޭސި ކުންފުނި ވިއްކުމަށް ރުހުން ދީފައި ވަނީ ސަރުކާރަށް އެނގިގެންނެވެ. ޒީޖިއާންގްގައި ހުންނަ ވިންގްޓެކް އަކީ ޗައިނާގެ ކޮމިއުނިސްޓް ޕާޓީން އެކުންފުނީގެ ތިންބައިކުޅަ އެއްބައި ހިއްސާ އޮންނަ ކުންފުންޏެއް ކަމަށް ބެލެވެއެވެ.
އިނގިރޭސިވިލާތުގެ ބިޒްނަސް ސެކްރެޓަރީ ކަވާސީ ކްވާޓެންގް އާއި ނެކްސްޕީރިއާ ވެސް ފަހުން ވަނީ އެ އެއްބަސްވުމަށް ރުހުން ދީފައިވާ ކަމަށް ދެކެވޭ ވާހަކަތައް ދޮގުކުރައްވާފަ އެވެ.
ނިއުޕޯޓް ވެފަރ ފެބް ވިއްކުމުގެ މައްސަލަ ތަހްގީގު ކޮށް ނުވަތަ ތަހްގީގު ކުރުމަށް ރާވާފައިވޭތޯ ސުވާލު ކުރުމުން އިނގިރޭސިވިލާތުގެ ސަރުކާރުން ބުނީ، މި މައްސަލައާ މެދު ވިސްނަމުންދާ ކަމަށާއި، އަދި އެއްވެސް ނިންމުމެއް ނުނިންމާ ކަމަށެވެ.
އިނގިރޭސި ބޮޑު ވަޒީރު ޖޯންސަން އަކީ ރަޝިޔާގެ މުއްސަނދި ވިޔަފާރި ވެރިންގެ ފުށުން އޭނާއާއި އޭނާގެ ޕާޓީން ބޮޑެތި ފައިދާތައް ނަގާފައިވާ ފަރާތެއް ކަމަށް ތުހުމަތު ކުރެވިފައި ވެއެވެ.
