އިޒްރޭލުގެ ބޮޑު ވަޒީރު ނެފްތާލީ ބެނެޓްގެ ސަރުކާރަށް ޕާލަމެންޓްގެ މެޖޯރިތީ ގެއްލިއްޖެއެވެ. މި ކަމާ ގުޅުވައިގެން އިސްރާއީލުގެ ކުރީގެ ބޮޑުވަޒީރު އަދި ލިކޫޑް ލީޑަރު ބެންޖަމިން ނަތަންޔާހޫ، ވަނީ ބނެޓްގެ އިސްތިއުފާއަށް ގޮވލައްވާފައެވެ.
ނަތަންޔާހޫގެ މި ހަމަލާ އައިސްފައި މިވަނީ، ހިފާފައިވާ ގުދުސްގައި ހުންނަ ސަރުކާރުގެ މައި މަރުކަޒު ކުރިމަތީގައި، އިއްޔެ ހަރުކަށި ކަނާތު ފިޔައިގެ މުޒާހަރާއެއްގައި ނަތަންޔާހޫ ބައިވެރިވެވަޑައިގެން ދެއްކެވި ވާހަކައިގައެވެ.
މި މުޒާހަރާއަކީ އިސްރާއީލުގެ 11 މީހުން މަރާލި ފަލަސްތީނުގެ މީހަކު ދިން ހަމަލާތަކާ ދެކޮޅަށް މުޒާހަރާ ކުރުމުގެ ނިޔަތުގައި ކުރިއަށް ގެންދިޔަ އިހުތިޖާޖެކެވެ. ނަމަވެސް، މި އިހުތިޖާޖުގެ ފޯރި ގަދަވެގެން ގޮސް ނަތަންޔާހޫ ވަނީ މިހާރުގެ ސަރުކާރަކީ ބަލިކަށި ސަރުކާރެއްގެ ގޮތުގައި ސިފަކުރައްވައި، އީރާނުގެ ނިއުކްލިއާ މަޝްރޫއު ކުރިއަށް ގެންދިޔުމަށް ހިތްވަރު ދެއްވީ ބެނެޓްގެ ސަރުކާރުން ކަމަށް ތުހުމަތު ކުރައްވާފައެވެ. އަދި އީރާނުގެ ކުރިމަތީގައި އަދި ޓެރަރިޒަމްގެ ކުރިމަތީގައި ބަލި ކަށިވެފައި ވާތީ އޭނާ ވަނީ އިސްތިއުފާއަށް ގޮވާފައެވެ.
ބެނެޓްގެ ސަރުކާރަށް މެޖޯރިޓީ ގެއްލުނީ، ބެނެޓްގެ ޕާޓީން ޕާލަމެންޓް މެމްބަރު އާއިދާތު ސުލެއިމާނު )ފޮޓޯގައި( ޕަޓީން ވަކި ވުމުންނެވެ. އޭނާ ޕާޓީން ވަކި ވީ އެޕްރީލް މަހުގައި އޮންނަ ޔަހޫދީ ދީނީ މުނާސަބާގައި ޔީސްޓް އަޅާފައި ހުންނަ ކާނާ ހަސްފަތާލުތަކަށް ވެއްދުން މަނާކޮށްދިނުމަށް އޭނާ ހެލްތު މިނިސްޓަރަށް ދެންނެވުމުން އޭނާ އެކަމަށް އިންކާރު ކުރެއްވުމުންނެވެ. ޔީސްޓް އަޅާފައި ހުންނަ ކާނާ ކެއުން ޔަހޫދީ ދީނުގައި ހުއްދައެއް ނޫނެވެ.
