ޔޫކްރެއިންގެ ވެރިރަށް ކައިރީގައި އޮންނަ ބުޗާގައި މީހުން މަރާފައި ވަޅުލާފައި ވުމާއި އިންސާނީ ހައްގުތަކަށް އަރައިގަތުމުގެ ޖަރީމާތައް ހިންގާފައިވާ ކަން ފެންމަތިވުމާ ގުޅިގެން، އެމެރިކާ، ވިލާތުގެ ގައުމުތައް ގުޅިގެން ބައެއް ފަރާތްތަކުން ވަނީ އދގެ އިންސާނީ ހައްގުތަކާ ބެހޭ ކައުންސިލްގެ މެމްބަރުކަން ރަޝިޔާ ސަސްޕެންޑް ކުރުމަށް އެމެރިކާއިން ސްޕޮންސަރ ކޮށްފައިވާ ގަރާރަށް ތާއީދު ކުރަން އެދިފައެވެ.
ހިއުމަން ރައިޓްސް ކައުންސިލްގެ މެމްބަރުކަމުން ރަޝިޔާ ސަސްޕެންޑް ކުރުމަށް ގޮވާލާ ގަރާރަށް މިއަދު އދގެ އާންމު މަޖިލީހުގައި ވޯޓަށް އަހާނެ ކަމަށް ބެލެވެއެވެ.
އިންޑިއާއިން ބުނަނީ ރަޝިޔާއަކީ ހޮވިފައިވާ މެމްބަރެއް ކަމުން އުސޫލުތަކަށް ތަބާވުމަށްޓަކައި މައްސަލަ ކޮމިޓީއަކުން އެތަނަށް ގޮސް ބެލުމަށްފަހު ނޫނީ ފިޔަވަޅެއް ނޭޅުމަށެވެ. އަދި އދގެ އާންމު އުސޫލުތައް ހިފެހެއްޓުމަށް އިންޑިއާއިން ވަނީ ބާރު އަޅާފައެވެ.
އެމެރިކާއާއި ޔޫރަޕުން ރަޝިޔާއާ ދެކޮޅަށް ދަތކުރުމުގެ ފިޔަވަޅު އަޅާފައިވާ ގައުމުތަކުގެ ހާރިޖީ ދާއިރާގެ މަސްއޫލުވެރިންނާއި މިނިސްޓަރުން ވަނީ މިދިޔަ ދެ ހަފުތާގެ ތެރޭގައި ދިއްލީއަށް ވަޑައިގެން، ޔޫކްރެއިންއާ މެދު އިންޑިއާއިން ގެންގުޅޭ ސިޔާސަތު ބަދަލުކުރުމަށް އާދޭސްކޮށްފައެވެ. ރަޝިޔާގެ ޚާރިޖީ ވަޒީރު ސަރްގެއި ލަވްރޯވްވެސް މިދިޔަ ހަފްތާގައި ދިއްލީއަށް ވަޑައިގެން، އިންޑިއާއިން "މިނިވަން" ސިޔާސަތެއް ގެންގުޅޭތީ އެކަމަށް ތައުރީފު ކުރައްވާފައި ވެއެވެ.
އދގެ ސަލާމަތީ މަޖިލީހާއި، އދގެ އާންމު މަޖިލީހާއި، ހިއުމަން ރައިޓްސް ކައުންސިލާއި، އިންޓަނޭޝަނަލް އެޓޮމިކް އެނާޖީ އޭޖެންސީ (އައި.އޭ.އީ.އޭ)ގައި ރަޝިޔާއަށް ފާޑުކިޔައި ހުށަހެޅުނު މަދުވެގެން 10 ގަރާރަކަށް އިންޑިއާއިން މިހާތަނަށް ވަނީ ދެކޮޅު ހަދާފައެވެ.
ރަޝިޔާއަކީ އިންޑިއާ މިނިވަން ވިއިރު އެމެރިކާއާއި އިނގިރޭސިންގެ ވާގި ލިބިގެން ޕާކސްތާނުން އިންޑިއާއާ ދެކޮޅަށް ހަމަލަތައް ދިން އިރު އިންޑިއާއަށް ވާގިވެރިވި ހަމައެކަނި ގައުމެވެ. އަދި ބަންގްލަދޭޗްގެ މިނިވަން ހަނގުރާމައިގައި އދގައި އިންޑިއާގެ ދިފާއުގައި ވާހަކަ ދައްކައި އެމެރިކާއިން ފޮނުވި ބަޑި ބޯޓްތައް ފައްސާލުމަށް ބޭ އޮފް ބެންގޯލަށް މަނަވަރު ފޮނުވި ހަމައެކަނި ގައުމެވެ.
އިންޑިއާގެ މަސްއޫލުވެރިން ވިދާޅުވަނީ މި ވޯޓަކީ ހަމައެކަނި ރަޝިއާއާއި ޔޫކްރެއިންއާ ގުޅޭ ވޯޓެއް ނޫން ކަމަށާއި އދ.ގެ އިދާރާގައި އިންތިހާބުވެފައިވާ މެމްބަރަކު ސަސްޕެންޑް ކުރުމަށް އެފަދަ ޕްރޮސީޖާއެއް ބޭނުން ކުރަން ޖެހޭތޯ ނުވަތަ ނޫންތޯ ކަނޑައެޅުމަކީވެސް އޮންނަން ޖެހޭ ކަމެއް ކަމަށެވެ.
