ޕާކިސްތާން ބޮޑު ވަޒީރު އިމްރާން ޚާން މަގާމަށް އަނބުރައި ގެނަސް، އިމްރާން ޚާންގެ އިތުބާރު ނެތް ކަމުގެ ވޯޓު ނެގުމަށް ޕާކިސްތާން ސުޕްރީމް ކޯޓުން ދާދި ދެންމެއަކު އަމުރު ކޮށްފިއެވެ. ކޯޓުން އިސްނަގައިގެން ބެލި ޙުކުމްގައި ބުނެފައި ވަނީ ޕާކިސްތާންގެ ގާނޫނު ހަދާ މަޖިލީހުގެ ޖަލްސާއެއް ހޮނިހިރު ދުވަހުގެ 10:30އަށް ވުރެން ލަސް ނުވާ ގޮތަށް ބާއްވައި އިތުބާރު ނެތްކަމުގެ ވޯޓު ނެގުމަށެވެ. އަދި ޖަލްސާ ނިންމަން ވާނީ މި ވޯޓަށް އެހުމަށްފަހު ކަމަށްވެސް ކުރު އަމުރުގައި ބުނެފައި ވެއެވެ.
މި އަމރުގައި އިތުރަށް ވަނީ ގާނޫނު ހަދާ މަޖިލިސް އުވާލުމަށް ރައީސް ނިންމެވި ނިންމެވުންވެސް ބާޠިލު ކަމަށް ކަނޑައަޅާފައެވެ. އަދި ބޮޑު ވަޒީރާއި ވަޒީރުންނާއި މުސްތަޝާރުންނާއި ސްޓޭޓް މިނިސްޓަރުންނާއި އެންމެން އެމީހުންގެ ވަޒީފާތަކަށް ރުޖޫއަ ވުމަށްވެސް އަމުރު ކޮށްފައި ވެއެވެ.
އުއްތަމަ ފަނޑިޔާރު އުމަރު އަތާ ބަންޑިއާލް ރިޔާސަތު ބެލެހެއްޓެވި ބެންޗުން މި އަމުރު ނެރެފައި ވަނީ ފަސް ފަނޑިޔާރުންގެ އިއްތިފާގުންނެވެ.
ޙުކުމް އިއްވުމުގެ ކުރިން ސަރުކާރުން ވަނީ ސުޕްރީމް ކޯޓު ކައިރީގައި ގިނަ އަދަދަކަށް ފުލހުން ބައިތިއްބައިގެން ފޯރި މަރަން ފަށާފައެވެ.
ސުޕްރީމް ކޯޓުގެ މި ނިންމުމާއެކު އިދިކޮޅު ފަރާތްތަކުން ވަނީ އުފާ ފާޅުކޮށްފައެވެ.
