ޕާކިސްތާންގެ ޕާލަމެންޓްގައި ޕާކިސްތާންގެ ކުރީގެ ބޮޑު ވަޒީރު އިމްރާން ޚާންގެ އިތުބާރު ނެތްކަމުގެ ވޯޓާ މެދު ބަހުސް ކުރި ހޮނިހިރު ދުވަހުގެ ޖަލްސާ އިފްތާރަށް މެދު ކަނޑާލި ވަގުތު އިމްރާން ޚާން އޭނާގެ ކެބިނެޓްގެ މެމްބަރުންނާއި ގާނޫނީ މުސްތަޝާރުންނާއެކު ބޮޑު ވަޒީރުގެ ގަނޑުވަރުގައި ކުއްލި ބައްދަލުވުމެއް ބޭއްވެވިއެވެ.
މި ބައްދަލު ވުން ހިނގަމުން ދަނިކޮށް، ކުރިން އިއުލާން ކޮށްފައި ނުވާ ދެ ބޭފުޅަކު ކުއްލިއަކަށް ސިފައިންގެ ހެލިކޮޕްޓަރެއްގައި ވަޑައިގަތެވެ. އަދި މި ދެބޭފުޅުން އިމްރާން ޚާނާއެކު ވަކި ބައްދަލު ކުރެއްވިއެވެ.
ބީބީސީ އުރުދޫން މި ވާހަކަ ރިޕޯޓް ކުރަމުން ބުނެފައި ވަނީ މިއީ ޒުވާބުގަދަކޮށް ދިޔަ ބައްދަލުވުމެއް ކަމަށެވެ. އަދި އިމްރާން ޚާނާއި ސިފައިންނާ ދެމެދު ޚިޔާލު ތަފާތު ވިކަން މިއިން ހާމަވާ ކަމަށެވެ.
މިވާހަކައަކީ ދޮގު ވާހަކައެއްކަމަށް ޕާކިސްތާންގެ ޖާސޫސީ އިދާރާއިން ވަނީ ބުނެފައެވެ.
ނަމަވެސް އިތުބާރު ނެތްކަމުގެ ވޯޓު ހިނގަމުން ދިޔަ އިރު އިސްލާމްއާބާދުގެ ހައިކޯޓަށް މައްސަލައެއްވެސް ހުށަހެޅުނެވެ. އަދި ހައިކޯޓުގެ ޗީފް ޖަސްޓިސް ކޯޓަށް ވަޑައިގަތްކަމަށްވެސް މީޑިއާއިން ބުންޏެވެ.
މި މައްސަލައަކީ ޕާކިސްތާންގެ އާމީ ޗީފް އޮފް ސްޓާފް މަގާމުން ދުރުކުރުމަށް އިމްރާން ޚާން އުޅުއްވަނީކަމަށް ބުނެ، އެކަން ވަގުތުން ހުއްޓުވުމަށް އަމުރަކަށް އެދި ހުށަހެޅި މައްސަލައެކެވެ.
ފަހުން އިމްރާން ޚާންގެ ޕާޓީން ބުނެފައި ވަނީ އެފަދަ ކަމެއް ހިނގާފައި ނުވާ ކަމަށެވެ.
ސިފައިންގެ ތާއީދާއެކު އިންތިޚާބު ކާމިޔާބު ކުރެއްވި އިމްރާން ޚާންގެ ކޮރަޕްޝަންގެ މައްސަލަތައް އިތުރުވެ، މިނިވަންކަމަށް އަރައިގަނެ، މީޑިއާއާ ދެކޮޅަށް ފިޔަވަޅު އެޅުމުން އޭނާގެ ސަރުކާރުގެ މަގްބޫލުކަން އޮތީ ގެއްލިފައެވެ. ސިފައިންނާ އޭނާއާ ދެމެދު ދެބަސްވުން އުޅޭކަމަށް ކުރިންވެސް ވާހަކ ދެކެވުނެވެ.
