ސްރީލަންކާގެ ޓެރަރިސްޓް ޖަމާއަތެއް ކަމަށްވާ އެލްޓީޓީ އަލުން ދިރުވުމަށް މަސައްކަތް ކުރި އިންޑިއާ ބައެއްގެ މުދާ އިންޑިއާ ސަރުކާރުން ހިފަހައްޓައިފިއެވެ. އެލްޓީޓީއަކީ 2009 ވަނަ އަހަރު ސްރީލަންކާ ސަރުކާރުން ބަލިކޮށްފައިވާ ޓެރަރިސްޓް ޖަމާއަތެކެވެ.
އިންޑިއާގެ އެންފޯސްމެންޓް ޑިރެކްޓަރޭޓުން ބުނެފައި ވަނީ މިކަމުގައި އުޅުނު މީހުންގެ އަތުން މަސްތުވާތަކެއްޗާއި ހަތިޔާރު ފެނިފައިވާ ކަމަށެވެ. މިމައްސލާގައި ތުހުމަތު ކުރެވޭ އިންޑިއާގެ ހަތަރު މީހުންގެ އަތުން 3.59 ކްރޯޑު ރުޕީސްގެ އަގުހުރި އެސެޓްތަކެއް ހޯދައި ގަނެވުނުކަމަށްވެސް އެންފޯސްމަންޓް ޑައިރެކްޓްރޭޓްއިން ބުންޏެވެ.
މި މައްސަލާގައި ތުހުމަތު ކުރެވޭ މީހުން އިންޑިއާގެ ކަމާ ބެހޭ އިދާރާގެ ސަމާލުކަމަށް އައިސްފައި ވަނީ މިދިޔަ އަހަރުގެ މާޗް މަހުގެ 18 ވަނަ ދުވަހު ޕާކިސްތާނުން ކަނޑު މަގުން ގެނައި މަސްތުވާތަކެތި ލޯޑުކޮށްފައި އޮތް ލަންކާގެ ބޯޓަކުން 3،000 ކިލޯގެ ހެރޮއިން އާއި ހަތިޔާރާއި ގޮވާތަކެތި އިންޑިއާގެ ސަރަހައްދުގެ ތެރޭން އަތުލައިގަތް މައްސަލައާ ގުޅިގެންނެވެ.
މި މީހުންގެ މިލްކިއްޔާތުގައިވާ ހަ ބިމަކާއި 12 އުޅަނދަކާއި، ނަގުދު ފައިސާ އާއި ބޭންކް އެކައުންޓުތައް ވަގުތީ ގޮތުން ވަނީ ހިފަހައްޓާފައެވެ.
މިމީހުންގެ މައްޗަށް މަނީ ލޯންޑާ ކުރުމުގެ ދައުވާވެސް އުފުލާފައި ވެއެވެ. ލަންކާ ބޯޑު މިދިޔަ އަހަރު ހިފަހައްޓާފައި ވަނީ އިންޑިއާގެ ސަރަހައްދުން ރާއްޖޭގެ އުތުރުން ކަމަށް އިންޑިއާ މީޑިއާއިން ބުނެއެވެ.
