އެމެރިކާގެ ޚާރިޖީ ވަޒީރު އެންޓޮނީ ޖޭ ބްލިންކެން ބުދަ ދުވަހު ވަނީ އަލަށް އިންތިޚާބުވެވަޑައިގެންނެވި ބޮޑުވަޒީރު ޝެހްބާޒް ޝަރީފަށް މަރުޙަބާ ވިދާޅުވެ، ޕާކިސްތާނާއި އެމެރިކާއާ ދެމެދު ޒަމާނުއްސުރެ އޮންނަ ގުޅުން ދަމަހައްޓާނެކަމަށް ވައުދުވެވަޑައިގެންފައެވެ.
ޕާކިސްތާނުގެ 23 ވަނަ ބޮޑުވަޒީރުކަމަށް ޝެހްބާޒް އިންތިޚާބުކޮށްފައި މިވަނީ، މިދިޔަ ހަފްތާގައި ނެގި އިތުބާރު ނެތްކަމުގެ ވޯޓަކުން، ކުރިން އެ މަގާމުގައި ހުންނެވި އިމްރާން ޚާން މަގާމުން ދުރުކޮށްގެންނެވެ.
ބްލިންކެން ރޭ ނެރުއްވި ބަޔާނެއްގައި ވިދާޅުވެފައިވަނީ ޕާކިސްތާނަކީ 75 ވަރަކަށް އަހަރު ވަންދެން އެމެރިކާއެކު ގަތް ގުޅުމެއް ބާއްވާ މުހިންމު ބައިވެރިއެއް ކަމަށާއި އެމެރިކާއިން އެ ގުޅުމުގެ އަގު ވަޒަންކުރާ ކަމަށެވެ.
އަދި އެމެރިކާއިން ދެކެނީ ދެގައުމުގެ މަސްލަހަތަށްޓަކައި ހަރުދަނާ، ފާގަތި ޑިމޮކްރެޓިކް ޕާކިސްތާނެއް އޮތުން ކަމަށްވެސް ވިދާޅުވެފައި ވެއެވެ.
ޕާކިސްތާންގެ ބޮޑުވަޒީރުގެ އޮފީހުންވެސް ވަނީ އެމެރިކާއާއެކު އެއްބާރުލުން ދިނުމުގެ ބޭނުންތެރިކަން ތަކުރާރުކޮށް ފައެވެ. "އާ ސަރުކާރުން ބޭނުންވަނީ ސަރަހައްދީ ސުލްހައާއި، ސަލާމަތާއި، ތަރައްގީގެ ލަނޑުދަނޑިތައް ހާސިލުކުރުމަށް އެމެރިކާއާއިއެކު ބިނާކުރަނިވި އަދި އީޖާބީ ގޮތެއްގައި މަސައްކަތް ކުރުމަށް،" ޝެހްބާޒްގެ ސަރުކާރުން ކުރި ޓުވީޓުގައި ވެއެވެ.
އަދި ހަމަހަމަކަމާއި، ދެފަރާތުގެ މަސްލަހަތާއި، ދެގައުމަށް ފައިދާހުރި ކަންކަމުގެ މައްޗަށް ބިނާވެފައިވާ ގުޅުން އިތުރަށް ބަދަހިކުރުމުގެ މުހިންމުކަމުގެ މައްޗަށްވެސް އިސްލާމްއާބާދުން ވަނީ އަލިއަޅުވާލާފައެވެ.
އެމެރިކާގެ ދިފާއީ ވުޒާރާގެ ތަރުޖަމާނު ޖޯން ކާރބީ ވިދާޅުވެފައި ވަނީ އެމެރިކާ ސިފައިންވެސް ޕާކިސްތާން ސިފައިންނާއެކު ގާތް ގުޅުމެއް ބާއްވާނެ ކަމަށެވެ.
"އަޅުގަނޑުމެންނަށް ފާހަގަކުރެވޭ ގޮތުގައި ޕާކިސްތާނަކީ މި ސަރަހައްދުގައި އިސް ދައުރެއް އަދާކުރާ ބައެއް. އަދި ޕާކިސްތާނާއި ޕާކިސްތާނުގެ ރައްޔިތުންނަކީ، ޤައުމުގެ އެތެރޭގެ ޓެރަރިސްޓް ޙަމަލާތަކުގެ ޝިކާރައަކަށްވެފައިވާ ބައެއް" ކަން އެމެރިކާގެ ދިފާއީ ވުޒާރާއިން ވަނީ ފާހަގަ ކޮށްފައެވެ.
އިސްލާމްއާބާދާއި ވޮޝިންޓަންގެ ގުޅުން އިމްރާން ޚާންގެ ވެރިކަމުގައި އޮތީ ވަރަށް ބޮޑަށް ދަށަށް ގޮސްފައެވެ.
