ސްރީލަންކާއަށް ކުރިމަތިވެފައިވާ އެންމެ ބޮޑު އިގުތިސާދީ ކާރިސާއިން އަރައިގަތުމަށް، ބެއިލްއައުޓް ޕްރޮގްރާމެއް ހިންގުމަށް އިންޓަނޭޝަނަލް މަނިޓަރީ ފަންޑާއެކު މަޝްވަރާކުރަމުންދާ ދަނޑިވަޅެއްގައި ސްރީލަންކާއިން މި ހިނދުން މިހިނދަށް ބޭނުންވާ ފައިސާ ހޯދުމަށް ކޮޅުނބުން ނިއުދިއްލީގައި އެދފިއެވެ.
ސްރީލަންކާއިން އަންގާރަ ދުވަހު ބުނެފައި ވަނީ އައިއެމްއެފް އިން ބެއިލްއައުޓް ލިބެންދެން އެ ގައުމުގެ ބޭރުގެ ދަރަނި ޑިފޯލްޓް ވާނެ ކަމަށެވެ. މިފަދަ ފިޔަވަޅެއް އަލަން ޖެހުނީ، އެ ގައުމުގެ ފޮރިން އެކްސްޗޭންޖް ރިޒާވް ވަރަށް ބޮޑަށް ދަށްވުން ކަމަށް ބުނެފައި ވެއެވެ. މިއީ 1948 ވަނަ އަހަރު ސްރީލަންކާއަށް މިނިވަންކަން ލިބުނުފަހުން ދަރަނި ޑިފޯލްޓްވިކަން އިޢްލާން ކުރި ފުރަތަމަ ފަހަރެވެ.
ސްރީލަންކާގެ ހައިކޮމިޝަނަރ ވަނީ އިންޑިއާގެ ފައިނޭންސް މިނިސްޓަރ ނިރްމަލާ ސިތާރާމްއާ ބައްދަލު ކުރައްވާފައެވެ. އަދި ސްރީލަންކާ ހައިކޮމިޝަނުގެ ބަޔާނުގައި ވަނީ މި މަޝްވަރާގައި ދެޤައުމުގެ އިޤްތިޞާދީ އެއްބާރުލުން މުރާޖަޢާ ކުރުމުގެ އިތުރުން، މި ވަގުތަށް ބޭނުންވާ ފައިނޭންސިންގ އާއި އައި.އެމް.އެފް.ގެ އިކޮނޮމިކް އެޑްޖަސްޓްމަންޓް ޕްރޮގްރާމާއި، ދެޤައުމުގެ ދެމެދުގައި ވާ ގުޅުން އިތުރަށް ބަދަހިކުރުމާ ބެހޭގޮތުން ވެސް މަޝްވަރާ ކުރެވުނު ކަމަށް ބުނެފައެވެ.
އިންޑިއާއިން މިހާތަނަށް ސްރީލަންކާއަށް 2.5 ބިލިއަން ޑޮލަރުގެ މާލީ އެހީ ފޯރުކޮށްދީފައިވެއެވެ. ފެބްރުއަރީ މަހު ތެޔޮ ގަތުމަށް 500 މިލިއަން ޑޮލަރުގެ ލައިން އޮފް ކްރެޑިޓަކާއި ކާބޯތަކެއްޗާއި ބޭސް އަދި އެނޫންވެސް ޒަރޫރީ ތަކެތި ގަތުމަށް މާޗް މަހު އިތުރު އެއް ބިލިއަން ޑޮލަރުގެ ލައިން އޮފް ކްރެޑިޓެއްވެސް ދީފައި ވެއެވެ. ސާކް ފެސިލިޓީގެ ދަށުން އިންޑިއާއިން 400 މިލިއަން ޑޮލަރުގެ ކަރަންސީ ސްވޮޕެއްވެސް ފޯރުވައި ދީފައި ވެއެވެ. އޭޝިއަން ކްލިއަރިން ޔޫނިއަންއަށް ދައްކަން ޖެހޭ 515 މިލިއަން ޑޮލަރު ދެއްކުންވެސް އިންޑިއާއިން ފަސްކޮށްދީފައި ވެއެވެ.
މިދިޔަ ހަފްތާ ނިމެން އުޅެނިކޮށް، ލައިން އޮފް ކްރެޑިޓްގެ ދަށުން އިންޑިއާއިން ވަނީ އައު އަހަރާ ދިމާކޮށް 11،000 ޓަނުގެ ހަނޑޫ ވެސް ކޮލޮމްބޯއަށް ސަޕްލައި ކޮށްދީފައެވެ.
ސްރީލަންކަން ހައިކޮމިޝަނަރ މޮރަގޮޑާ ވަނީ ލަންކާ ސަރުކާރުން ބޭރުގެ ދަރަނިތައް ދެއްކުން ހުއްޓާލައިގފައި އޮތް ކަމުގެ މައުލޫމާތު ފިނޭންސް މިނިސްޓަރ ސިތާރަމަންއާ ހިއްސާކުރައްވާފައެވެ. އަދި މެދުރާސްތާގައި ސްރީލަންކާގައި ހަލުވިދުވެއްޔެއްގައި ކުރިއެރުމާއި ތަރައްޤީ ގެނައުމުގައި އިންޑިއާއިން ފުޅާ ދައުރެއް އަދާކުރެވިދާނެ ގޮތްތަކާ ބެހޭގޮތުންވެސް މި ބައްދަލުވުމުގައި މަޝްވަރާކުރެއްވިއެވެ.
އާބާދީގައި 22 މިލިއަން މީހުންގެ މައްޗަށް ހިމެނޭ ސްރީލަންކާއަށް ކުރިމަތިވެފައިވާ އިޤްތިޞާދީ ހީނަރުކަމުގެ ސަބަބުން ޤަވާއިދުން ކަރަންޓު ކެނޑެމުން ދެއެވެ. ކާބޯތަކެއްޗާއި ތެލުގެ ދަތިކަން ވަނީ އިންތިހާއަށް ބޮޑުވެފައެވެ. ބޭރު ފައިސާގެ ރިޒާވް ހިފެހެއްޓުމަށް ކޮންމެހެން ބޭނުން ނޫން ތަކެތި އެތެރެކުރުންވެސް ސަރުކާރުން ވަނީ މަނާކޮށްފައެވެ. އިގުތިސާދީ ހީނަރުކަމުގެ ސަބަބުން އާންމުން އެއްވުންތައް ވެސް ބާއްވަމުން އަންނަ އިރު، މުޒާހަރާގެ ބައިވެރިން ދަނީ ރައީސް ގޯޓާބަޔަ ރާޖަޕަކްސަގެ އިސްތިއުފާއަށް ގޮވާލަމުންނެވެ.
