އަފްޣާނިސްތާންގައި އަފިހޫންގެ ދަނޑުވެރިކަން ކުރުން މަނާކުރުމުން ފުޅާ ދާއިރާއެއްގައި ނޭދެވޭ އިގްތިސާދީ ނަތީޖާއެއް ނުކުމެދާނެ ކަމަށް ލަފާކޮށް އަފްޣާނިސްތާނުގެ އެނަލިސްޓްސް ނެޓްވޯކުން ވަނީ ރިޕޯޓެއް ނެރެފައެވެ.
މި ރިޕޯޓުގައި، 2000 ވަނަ އަހަތު ތާލިބާނުންގެ ސަރުކާރުން އަފިހޫންގެ ދަނޑުވެރިކަން މަނާ ކުރުމާއި މިފަހަރުގެ މަނާ ކުރުމާ ދެމެދު އަޅައި ކިޔައި ދިރާކޮށްފައި ވެއެވެ.
އަފްޣާނިސްތާނުގެ އެނަލިސްޓްސް ނެޓްވޯކުން ބުނާ ގޮތުގައި، އަފްޣާނިސްތާންގެ އިގްތިސާދާއި އެކްސްޕޯޓް ބަރޯސާވެފައި ވަނީ އަފިހޫންގެ ދަނޑުވެރިކަމާއި، އަފިހޫނާއި ގަންޖާ އެކްސްޕޯޓް ކުރުމުގެ މައްޗަށެވެ.
މަސްތުވާ ތަކެތީގެ ވަބާ ފުޅާދާއިރާއެއްގައި ފެތުރިފައި ވުމާއެކު، ތާލިބާނުންގެ ސަރުކާރުން ވަނީ އަފިހޫންގެ ދަނޑުވެރިކަން މަނާ ކުރާ ކަމަށް އިއުލާން ކޮށްފައެވެ.
މިހާރު އަފްޣާނިސްތާންގައި އެންމެ ބޮޑު ޣެއިރު ގާނޫނީ އިގްތިސާދީ ހަރަކާތަކީ އަފިހޫނާއި މޯރފިން އަދި ހެރޮއިންފަދަ މަސްތުވާތަކެތީގެ ސާމާނުތައް އުފެއްދުމެވެ.
ޔޫއެންއޯޑީސީން ލަފާކުރާ ގޮތުގައި 2021 ވަނަ އަހަރު އަފްޣާނިސްތާނުގެ އިގްތިސާދުގައި 1.8 ބިލިއަން ޑޮލަރާއި 2.7 ބިލިއަން ޑޮލަރާ ދެމެދުގެ އަދަދެއްގެ ފައިސާ އަފިހޫންގެ ވިޔަފާރިއާ ގުޅިގެން ދައުރުވެފައި ވެއެވެ.
މިހާރުވެސް ކުރާނެ މަސައްކަތެއް ނެތިފައި ތިބި އާބާދީގެ އެންމެ ބޮޑު އިގްތިސާދީ ހަރަކާތަކީ އަފިހޫންގެ ދަނޑުވެރިކަން ކުރުމެވެ. އަދި ހަނަފަސްވެފައި ވުމާއި އާދައިގެ ދަނޑުގޮވާން ކުރުމަށް މޫސުމް ތަން ނުދޭތީ، ގިނަ މީހުން މި ހަރަކާތުގައި އުޅޭއިރު، އަފިހޫންގެ ދަނޑުވެރިކަން މަނާ ކުރުމުން އަފްޣާނިސްތާންގެ އިގްތިސާދަށް އިތުރު ހީނަރުކަމެއް ލިބޭނެކަމަށް ލަފާ ކޮށްފައި ވެއެވެ.
