އިނގިރޭސިވިލާތަށް ހިޖުރަ ކުރާ މީހުންގެ އެންމެ ބޮޑު ހަތުރަކީ އިންޑިއާއިން ހިޖުރަކޮށް ހާލުގައި ޖެހުނު އާއިލާއެއްގެ ދަރިއެކެވެ.
އިނގިރޭސިވިލާތުގެ ދާޚިލީ ވަޒީރު ޕްރިތީ ޕަޓޭލް ބޭނުން ވަނީ އިނގިރޭސިވިލާތަށް ހިމާޔަތަށް އެދި ވަންނަން ބޭނުންވާ މީހުންނަށް ފުރުސަތު ނުދިނުމަށެވެ.
ގުޖުރާތުން އޭނާގެ ކާފައާއި މާމަ ހިޖުރަކޮށް ޔޫގަންޑާގައި ގުލާނުކޮށް އުޅުމުގެ ތެރޭގައި އޭނާގެ މައިންބަފައިން ހާލުގައި ޖެހިގެން، އިނގިރޭސިވިލާތަށް ހިޖުރަކޮށްގެން ޕްރިތީ ޕަޓޭލް ލިބުނީ އިނގިރޭސިވިލާތުގައެވެ. އޭނާ ކައިވެނިބައްލަވައިގެން އުޅުއްވަނީ ހުދު ނަސްލުގެ ބޭފުޅަކާއެވެ.
ޕްރިތީ ޕަޓޭލާއި އޭނާގެ ބައިމަދު މީހުންނާ ހަތުރުވެރި ބޮޑު ވަޒިރު ބޮރިސް ޖޯންސަން ބޭނުންފުޅު ވަނީ އިނގިރޭސިވިލާތަށް ހިމާޔަތަށް ވަންނަ މީހުން އެފްރިކާގެ ރުވަންޑާއަށް ފައްސާލާށެވެ. ރުވަންޑާއަކީ ކޮމަންވެލތުގެ ގައުމެކެވެ.
ރައީސް ހަބިޔަރިމާނާ އަވަހާރަކޮށްލުމަށްފަހު އުފެދުނު ޓޫޓްސީންނާއި ހޫޓޫންގެ ގަތުލުއާންމަށްފަހު ވެރިކަން ހޯއްދަވައިގެން ވެރިކަން ކުރައްވާ ޕައުލް ކަގާމޭގެ ސަރުކާރަކީ ދޯހަޅި އިންސާނީ ހައްގުތަކުގެ ރެކޯޑް އޮންނަ ސަރުކާރެކެވެ.
އިނގިރޭސި ގާނޫނީ ދާއިރާގެ ފަރާތްތަކާއި ހޯމް އޮފީހުގެ މުވައްޒަފުންވެސް ޕްރިތީ ޕަޓޭލްގެ ހިޖުރަ ކުރާ މީހުންގެ ހަތުރުވެރި ސިޔާސަތާ ދެކޮޅުވެރިއެވެ. އިނގިރޭސިވިލާތާ ފަސްހާސް މޭލު ދުރުގައި އޮންނަ ރުވަންޑާއަށް ހާލުގައި ޖެހިގެން އިނގިރޭސިވިލާތަށް ވަންނަ މީހުން ބޭރު ކުރާނަމަ، ސިވިލްސާވިސްގެ އިސް މުވައްޒަފުން މި ޕްލޭނާ ދެކޮޅަށް ނިކުންނާނެ ކަމަށް ބެލެވެއެވެ.
ޕްރިތީ ޕަޓޭލްގެ މި ރޭވުމާ ދެކޮޅަށް ސިވިލް ސާވަންޓުން އިހުތިޖާޖުކޮށް ބޮޑެތި ހިނގާލުންތައް ކުރިއަށް ގެންދާނެ ކަމުގެ އިންޒާރު ޔޫނިއަންތަކުން ވަނީ ދީފައެވެ.
ރުވަންޑާއަށް ބޭރުކުރާ މީހުން އިނގިރޭސިންނަށްޓަލަލއި ބަންދުކޮށްގެން ގެންގުޅެދޭ މަތިން ރުވަންޑާއަށް އިނގިރޭސި ސަރުކާރުން 120 މިލިއަން ޕައުންޑް ދޭން ވައުދުވެއެވެ. އަދި މިމީހުން ބެލެހެއްޓުމުގެ އޮޕަރޭޝަނަލް ހަރަދުތަކަށް ވެސް އިނގިރޭސިވިލާތުން ޚަރަދު ކުރުމަށް އެއްބަސްވެއެވެ.
އިންޑިޔާ މީހެއްތަ. ނުވާނެރަނގަޅެއް