ހިލޭސާބަހަށް މަސައްކަތް ކުރުމުގައި ދުނިޔެއަށް ނަމޫނާ ދެއްކެވި ޢަބްދުއްސައްތާރު ޢީދީގެ އަނބިކަނބަލުން، ބިލްގީސް ބާނޫ ޢީދީ މިއަދު މެންދުރު ނަމާދަށްފަހު ފަސްދާނުލައިފިއެވެ.
ޢަބްދުއްސައްތާރު ޢީދީ އަވަހާރަވުމަށްފަހު އޭނާގެ ޢީދީ ފައުންޑޭޝަނުގެ ކަންކަން ހިންގަމުން ގެންދެވީ ބިލްގީސް ބާނޫއެވެ.
އުމުރުން 74 އަހަރުގައި ބިލްގީސް ބާނޫ އަވަހާރަވީ ކުރު އާލާސްކަންފުޅެއްގައި ކަރާޗީގެ ހަސްފަތާލެއްގައި އެދުމަތި ކުރެވިފައި ވަނިކޮށެވެ.
ސިންދު ސަރުކާރުން ވަނީ އެއް ދުވަހަށް ހިތާމަ ފާޅުކުރުން ފާހަގަ ކުރުމަށް ނިންމާފައެވެ.
1947 ވަނަ އަހަރުގެ އޮގަސްޓް މަހުގެ 14 ވަނަ ދުވަހު އިންޑިއާގެ ގުޖްރާތަށް އުފަން ބިލްގީސް ބާނޫ އަކީ ޕްރޮފެޝަނަލް ނަރުހެކެވެ. އޭނާ ވަނީ އަބްދުއްސައްތާރު ޢީދީއަށް ޢީދީ ފައުންޑޭޝަން ހިންގުމުގައި ދުވަހުން ދުވަހަށް އެހީތެރިވެ ދެއްވާފައެވެ.
އެކަމަނާ ޢަބްދުއްސައްތާރު ޢީދީއާ ކައިވެނި ބައްލަވައިގަތީ 1966 ވަނަ އަހަރުގެ އޭޕްރީލް މަހުގެ ތެރޭގައެވެ. އެކަމަނާގެ ހަޔާތުގެ ހަ ދައުރަށް ވުރެ ގިނަ ދުވަސް ހޭދަކުރެއްވީ އިންސާނިއްޔަތަށް ޚިދުމަތް ކުރެއްވުމުގައެވެ. އެކަމަނާގެ ޗެރިޓީން މިހާތަނަށް ވިހެއުމަށްފަހު މަގުމައްޗަށް އެއްލާލާފައިވާ 42،000 އަށް ވުރެ ގިނަ ތުއްތު ކުދިން ސަލާމަތްކޮށްފައި ވެއެވެ. މީހުން ވިހެއުމަށްފަހު ކުދިން އެއްލާ މައްސަލައަށް ހައްލެއް ހޯދުމަށްޓަކައި ދުރު މީހުންނާ އެކަހެރި ހިސާބުތަކުގައި އޭނާ ބަހައްޓަވަން ފެށްޓެވީ ކްރިބްތަކެވެ. ދަންވަރު މީހުން އެމީހުންގެ ކުދިން މިތަންތަނަށް ދޫކޮށްލައެވެ.
މި ދެމަފިރިންނަށް ދެ ފިރިހެން ބޭފުޅުންނާއި ދެ އަންހެން ބޭފުޅުން ލިބިވަޑައިގެންފައި ވެއެވެ.
އިންސާނިއްޔަތަށް ކޮށްދެއްވާ ޚިދުމަތްތަކުގެ އަގު ވަޒަންކުރުމުގެ ގޮތުން ޕާކިސްތާނުން އެކަމަނާއަށް ވަނީ ހިލާލޭ އިމްތިއާޒާއި ރަޝިޔާއިން ދޭ ލެނިން ޕީސް ޕްރައިޒްގެ އިތުރުން 2015 ވަނަ އަހަރު މަދަރ ޓެރެސާ މެމޯރިއަލް އިންޓަރނޭޝަނަލް އެވޯޑް ފޮރ ސޯޝަލް ޖަސްޓިސްގެ އެވޯޑް ލިބިވަޑައިގެންފައެވެ.
