ބޭރު ޔުނިވަރސިޓީތަކުން އިންޑިއާގެ ޔުނިވަރސިޓީތަކާ ގުޅިގެން ދޭ ގުޅިފައިވާ ޑިގްރީ ޕްރޮގްރާމުތަކަށް ހުއްދަ ދޭން އިންޑިއާއިން ނިންމައިފިއެވެ.
އިންޑިއާގެ ޔުނިވާސިޓީ ގްރާންޓްސް ކޮމިޝަން (ޔޫޖީސީ)އިން ބުނިގޮތުގައި މި ކަމާ ބެހޭ ތަފްސީލުތައް ފަހުން ހާމަ ކުރާނެއެވެ. އިންޑިއާގެ މަތީ ތައުލީމު ދިނުމާ ބެހޭ ގަވާއިދު އެކަށައަޅާ އިދާރާއިން މިއަދު ބޭއްވި ބައްދަލުވުމެއްގައި ވަނީ ބޭރުގެ ތައުލީމީ އިދާރާތަކާ ގުޅިގެން ޑިގްރީ ޕްގްރާމުތައް އިންޑިއާގައި ހިންގުމަށް ހުއްދަ ދޭން ނިންމާފައެވެ.
އިންޑިއާގެ ގަވާއިދަށް ގެނަސްފައިވާ ބަދަލުގައި ނިންމާފައި ވަނީ، ނޭޝަނަލް އެސެސްމެންޓް އެންޑް އެކްރެޑިޓޭޝަން ކައުންސިލް އިން 3.01 ޕޮއިންޓާއެކު އެކްރެޑިޓް ކޮށްފައިވާ ނުވަތަ ނޭޝަނަލް އިންސްޓުއުޝަނަލް ރޭންކިންގ ފްރޭމްވަރކް (އެންއައިއާރްއެފް)ގެ ސަތޭކައިގެ ލިސްޓްގައި ހިމިނޭ، ކޮންމއ ތައުލީމީ މުއައްސަސާއަކަށް ބޭރުގެ ތައުލީމީ މުއައްސަސާއަކާ ގުޅިގެން ޑިގްރީ ޕްރޮގްރާމް ހިންގިދާނެކަމަށެވެ. ނަމަވެސް އެގޮތަށް ގުޅޭ ބޭރުގެ ތައުލީމީ މުއައްސަސާ ވާން ޖެހޭނީ، ތައިމްސް ހަޔަރ އެޑިއުކޭޝަން ލިސްޓްގައި ނުވަތަ ކިޔޫއެސް ވަރލްޑް ޔުނިވަރސިޓީ ރޭންކިންގގައި 500ގެ ތެރޭގައި ހިމެނޭ ތައުލީމީ މުއައްސަސާއަކަށެވެ. އަދި މިއާއެއްގޮތަށް ޑިގްރީ ދިނުމަށް ގުޅޭ ފަރާތްތަކުން ޔޫޖީސީގެ ހުއްދަ ހޯދާކަށް ނުޖެހޭނެއެވެ.
މި ޕްރޮގްރާމްގެ ދަށުން ބޭރުގެ ތައުލީމީ މުއައްސަސާއިން ދަރިވަރަށް މަދުވެގެން 30 ޕަސަންޓުގެ ކްރެޑިޓް ހޯދަން ޖެހޭނެއެވެ. އަދި ޑިސްޓެންސް މޯޑުގައްޔާއި އޮންލައިން ކޮށް ހިންގާ ޕްރޮގްރާމުތައް މި އުސޫލުގެ ދަށުން ނުހިންގޭނެއެވެ.
