އިންޑިއާއިން ބާސްމަތީ ނޫން ބާވަތުގެ ހަނޑޫ އެކްސްޕޯޓު ކުރާ މިންވަރު އިތުރު ވެގެން ހިނގައްޖެއެވެ. ނިމިގެން ދިޔަ 2021/22ގެ މާލީ އަހަރު އިންޑިއާއިން ވަނީ 6.11 ބިލިއަން ޑޮލަރުގެ ބާސްމަތީ ނޫން ބާވަތުގެ ހަނޑޫ އެކްސްޕޯޓް ކޮށްފައެވެ. އަދި އިންޑިއާއިން ހަނޑޫ 150ކަށް ގައުމަށް އެކްސްޕޯޓް ކުރެއެވެ. އިންޑިއާ ބެލެވެނީ ގޮދަނާއި ހަނޑޫ އެކްސްޕޯޓު ކުރާ ރޭޓް އަގު ހެޔޮ ގައުމަކަށެވެ.
މީގެ ކުރިން އިންޑިއާއިން މި ބާވަތުގެ ހަނޑޫ އެކްސްޕޯޓު ކުރާ މިންވަރު އުޅެނީ ދެ ބިލިއަން ޑޮލަރުގައެވެ.
އިންޑިއާއަކީ މިހާރު ގޮދަން ގިނައިން އެކްސްޕޯޓް ކުރާ ގައުމުގެ ތެރޭގައި ހިމެނިފައިވާ ގައުމެކެވެ. ޔުކްރެއިން ހަނގުރާމައާ ގުޅިގެން އިންޑިއާއިން ގޮދަނާއި ހަނޑުލުގެ ބާވަތްތައް ގަންނަން އެދޭ ފަރާތްތައް ދަނީ އިތުރު ވަމުންނެވެ.
އެންމެ ފަހުން އިންޑިއާއިން ތިން މިލިއަން ޓަނުގެ ގޮދަން ވިއްކަން ނިންމާފައި ވަނީ މިސްރަށެވެ.
އިންޑިއާއިން ބާސްމަތީ ނޫން ބާވަތުގެ ހަނޑޫ އެންމެ ގިނައިން އެތެރެ ކޮށްފައި ވަނީ ހުޅަނގު އެފްރިކާގެ ގައުމެއް ކަމަށްވާ ބެނީން އިންނެވެ. މީގެ އިތުރުން ނޭޕާލް، ބަންގްލަދޭޝް، ޗައިނާ، ކޯޓް ޑީއުއާރ، ޓޯގޯ، ސެނެގޯލް، ގިނީ، ވިއެޓްނާމް، ޖިބޫޓީ، މަޑަގަސްކަރަ، ކެމަރޫން ސޯމާލިއާ، މެލޭޝިއާ، ލައިބީރިއާ އަދި ޔޫއޭއީ ފަދަ ގައުމުތަކުން އިންޑިއާއިން ހަނޑޫ އިމްޕޯޓު ކުރެއެވެ.
ޔުކްރެއިން ހަނގުރާމައާ ގުޅިގެން ދުނިޔޭގައި ކާނާގެ އަގުތައް ވަނީ ދިހަ ޕަސެންޓަށް އުފުލިފައެވެ. އިންޑިއާއިން ބުނެފައި ވަނީ ކާޑުގެ ބާވަތުގެ ދަތިކަމެއް ނައަންނާނެ ފަދަ ގޮތަކަށް އިންޑިއާގެ ސްޓޮކުން ކާޑު އެކްސްޕޯޓު ކުރުމަށް ޑަބްލިއުޓީއޯ އިން ހުއްދަ ދޭން ވެއްޖެ ކަމަށެވެ.
